Read Da'a Kaili 1 KORINTUS 2 Bible Online

1 KORINTUS 2 - Da'a Kaili bible

1 KORINTUS 2

¹Sampesuwu-sampesuwu, tempo aku narata ri ja'i komi nanggeni Kareba Belo nggari ja'i Alatala, aku da'a notesa ante tesa-tesa to nalanga bo nagayana, aku da'a notesa nantuki noto nggari ja'i manusia ri dunia.

²Sabana nipakatantukumo ne'e motesa sangele ntanina nggari tesa Yesus Kristus bo kamatena ri kayu parika.

³Tempo aku narata ri tatongo komi nalentemo raraku pade aku nolalete ante naeka rara.

⁴Tempo aku nompatolele Kareba Belo ka komi aku da'a nompasimbuku manggeni komi momparasaya ante nompake tesa-tesa to nopu'u nggari noto manusia. Tapi aku nompatolele kareba etu ka komi ante nompopokita ka komi kuasa nggari ja'i Nosa Nagasa nu Alatala.

⁵Patujuku nowia iwetu ala pomparasaya komi ne'e aga nopu'u nggari noto manusia tapi nopu'u nggari kuasa nu Alatala mboto.

⁶Naupa iwetu kami nompasimbayu noto ka topomparasaya to naroso pomparasayana. Noto etu da'a noto nggari dunia e'i atau nggari ja'i topanggeniaka-topanggeniaka dunia to naja'a e'i to rapakalipo kuasana banepia.

⁷Tapi noto to nipatolele kami noto nggari ja'i Alatala to nitabuniakana nggari dunia e'i. Da'apa dunia nipajadi, Alatala nonia mompopanjani notona etu ka kita we'i-we'i, ala kita mamala mombarata bagia riara kuasa bo kagayana to nipogumaa.

⁸Da'a ria samba'a nggari tatongo topanggeniaka-topanggeniaka dunia to naja'a e'i to nangginjani noto Alatala etu. Sabana ane rapana noto etu ninjani ira, natantumo ira da'a nombapaku i Pue to nakuasa ri kayu parika.

⁹Tapi ewa to nitulisi riara Buku Nagasa iwe'i: “Nuapa to da'a ria sanggani nikita manusia, nuapa to da'a ria sanggani niepe ntalinga ira, bo nuapa to da'a ria sanggani nesua ri pekiri manusia etumo to nipakasadia Alatala ka tau-tau to nompotowe I'a.” [5]

¹⁰Tapi etumo to nipakanoto Alatala ka kita nggari Nosana to Nagasa. Sabana Nosa Nagasa nu Alatala nangginjani mpengele-ngele sampe narata ri nia nu Alatala to natetabuniaka.

¹¹To nangginjani pompekiri samba'a manusia aga tau etu mboto. Iwetu wo'u to nangginjani pompekiri nu Alatala aga Nosa Nagasana mboto.

¹²Kita da'a niwai ka noto nggari dunia e'i, tapi kita niwai ka Nosa Nagasa nggari ja'i Alatala mboto ala kita mamala mangginjani nuapa-nuapa to niwai Alatala ka kita ante najoi rarana.

¹³Jadi etu wo'umo to nipatolele kami. Kami da'a nompatolele tesa etu ante tesa-tesa nggari noto manusia, tapi ante tesa-tesa to nipatuduki Nosa Nagasa nu Alatala mboto. Kami nompakanoto pepatuduki to nakonona nggari ja'i Nosa Nagasa nu Alatala ka tau-tau to nipesua Nosa Nagasana etu.

¹⁴Tau-tau to da'a nipesua Nosa Nagasa nu Alatala da'a nantarima pepatuduki nggari ja'i Nosa Nagasa, sabana pepatuduki etu nirekena aga sangele tesa ntodoyo. I'a da'a namala mangginjani pepatuduki etu sabana pepatuduki etu aga namala ranjani ntau ante pekeniaka Nosa Nagasa nu Alatala.

¹⁵Tapi tau to nipesua Nosa Nagasa nu Alatala naria notona sampe i'a namala nompoposisala nuapa to nakono bo nuapa to nasala. Tapi i'a da'a namala rapakasala tau-tau to da'a nipesua Nosa Nagasa nu Alatala.

¹⁶Ewa to nitulisi riara Buku Nagasa iwe'i: “Da'a ria samba'a to nangginjani pekiri i Pue sampe i'a namala mompatuduki I'a.” [6] Tapi kita topomparasaya, pekirita nasimbayu ante pekiri Kristus!