Read Da'a Kaili 1 KORINTUS 3 Bible Online

1 KORINTUS 3 - Da'a Kaili bible

1 KORINTUS 3

¹Sampesuwu-sampesuwu, tempo aku naria ri tatongo komi aku da'a namala notesa ka komi nasimbayu ewa aku notesa ka tau-tau to nipesua Nosa Nagasa nu Alatala. Tapi aku aga notesa ka komi ewa tau-tau to natuwu nantuki dota rara manusia. Aku aga notesa ka komi ewa komi danangana riara pomparasaya komi ka Kristus.

²Aku aga nombawai ka komi panggoni ngana nggedi, da'a panggoni to nako'ona, sabana komi da'apa nompakule manggoni panggoni to nako'ona. Pade kakonona sampe we'i-we'i komi batena da'apa nompakule manggoni etu.

³Komi danatuwu nantuki dota rara manusia. Sabana naria nggari tatongo komi to nasiriati bo nosinggarau. Natantumo pokainggu ewa etu nompopokita komi danatuwu nantuki dota rara manusia. Komi danatuwu ewa tau-tau to da'a nosinjani ante Alatala.

⁴Nanotomo etu sabana naria nggari tatongo komi to nanguli, “Aku e'i topantuki i Paulus,” pade naria sanupa nanguli, “Aku e'i topantuki Apolos.” [7] Pokainggumu etu nompakanoto komi danatuwu ewa tau-tau to da'a nosinjani ante Alatala.

⁵Pekirimo! Isema Apolos? Bo isema i Paulus? Natantu kami aga batua-batua Alatala to nanggeni komi nomparasaya i Pue Yesus. Kami aga batua to nantui bago to niwai i Pue ka kami.

⁶Aku e'i notuja pade Apolos nombajunju. Tapi Alatalamo to mompakatuwu tuja-tuja.

⁷Jadi to masipato rabila da'a topotuja bara topojunju, tapi Alatala. I'amo to mompakatuwu tuja-tuja.

⁸Kakonona topotuja bo topojunju nosaongu patuju, pade ira mbau nantarima tambona nantuki bago to nipowia ira.

⁹Sabana kami bo Apolos roa sampokarajaa ante Alatala pade komimo to najadi ewa tinalu Alatala. Komimo to najadi ewa sapo nu Alatala.

¹⁰Nggari towe belo Alatala aku e'i najadi ewa samba'a topowia sapo to napandena. Ante noto nggari ja'i Alatala aku nompowia pondasi sapo, pade tau ntanina nombabangu sapo ri bunggu nu pondasi etu. Tapi ira kana mombabangu sapo etu mpakabelo-belo.

¹¹Sabana da'a ria tau to mamala mompowia pondasi ntani nggari pondasi to nipowiamo, etumo Yesus Kristus.

¹²Naria to nombabangu sapo ri bunggu mpondasi etu ante bulawa, naria to nombabangu ante salaka, naria ntanina to nombabangu ante watu to nasulina, pade naria to nombabangu ante kayu, jono bo kada mpae.

¹³Tapi pokarajaa ira samba'a bo samba'a kana rapakanoto kabelona banepia. Sabana tempo i Pue Yesus marata bali ri dunia pokarajaa ira etu kana rapakanoto. Pokarajaa ira etu kana rauji ante apu ala manoto iwenu kabelo nu pokarajaa etu.

¹⁴Ane sapo to nipowia ntau ri bunggu mpondasi etu bate-batena maroo tempo niuji ante apu, topowia sapo kana mombarata tambona nggari ja'i Alatala.

¹⁵Tapi ane sapo to nipowiana mapapu riara apu etu i'a kana marugi. I'a mboto kana masalama, tapi ewa tau sakedika namate riara apu.

¹⁶Iwenumo, sampesuwu-sampesuwu? Da'a nitora komi, komimo to najadi ewa Sapo nu Alatala pade Nosa Nagasana neto'o riara nta'i komi pura-pura?

¹⁷Isema-sema mombagero Sapo nu Alatala etu kana rasuku Alatala, sabana Sapo nu Alatala etu nagasa. Toramo! Komimo Sapo nu Alatala etu!

¹⁸Ne'e mombabagiu koromu mboto! Ane maria nggari tatongo komi to nompekiri korona nanoto riara mpanggita manusia, agina i'a menonto mompekiri ewa etu ala i'a mpu'u-mpu'u mamala majadi manoto riara mpanggita Alatala.

¹⁹Sabana tau to nireke nanoto riara mpanggita manusia nabodo riara mpanggita Alatala. Ewa to nitulisi riara Buku Nagasa iwe'i: “Alatala mompakanawu topande riara kapandena mboto.” [8]

²⁰Pade naria tesa ntanina to nanguli iwe'i: “Pue nangginjani pompekiri tau-tau topande ri dunia da'a ria gunana.” [9]

²¹Jadi ane iwetu, ne'e mana mombatoiya topanggeniaka-topanggeniaka komi, sabana kakonona komi naopu niwai ka mpengele-ngele to niparaluu.

²²Paulus, Apolos bo i Petrus niwai Alatala ka komi majadi topantulungi komi. Niwaina ka komi katuwua to nabou, pade nikabasakana komi nggari kamatena. Nuapa-nuapa to naria riara dunia e'i, nuapa-nuapa to najadi we'i-we'i, pade nuapa-nuapa to majadi banepia nipakatantu Alatala manggeni belo ka komi. Mpengele-ngele etu bagia komi,

²³pade komi najadi bagia Kristus, pade Kristus bagia nu Alatala.