Read Da'a Kaili 1 KORINTUS 4 Bible Online

1 KORINTUS 4 - Da'a Kaili bible

1 KORINTUS 4

¹Jadi Apolos ante aku kana rareke komi batua Kristus. Kami e'i wakelena to niparasaya ka tesa nggari ja'i Alatala to nitabuniaka nggaolu tapi to nipatolele we'i-we'i.

²To napokona ante samba'a wakele, i'a kana matutu mantuki dota nu madikana.

³Ane aku e'i, da'a mokuya ane aku rapakasala komi atau tau ntanina. Tapi aku da'a nompakasala koroku mboto.

⁴Da'a ninjaniku sangele riara nggatuwuku sampe aku masipato rapakasala. Tapi da'a etu to nompakatantu aku tau nanoa. Pue mbotomo to mompakatantu ane aku manoa bara da'a.

⁵Jadi ne'e komi masalisa mompakasala tau ane da'apa narata tempona. Popeamo sampe i Pue marata bali ri dunia. I'amo to mompakanoto pura-pura nuapa to nikalendu nu rumau we'i-we'i. I'amo to mompakanoto mpengele-ngele nia to naria riara nta'i manusia. Ri tempo etumo Alatala kana mombatoiya butu-butu mba'a to masipatona.

⁶Sampesuwu-sampesuwuku, to nitesaku ewa Apolos bo aku ri ba'ana nitesaku ala mantulungi komi. Patujuku ala nggari jonjo katuwu kami komi mamala meguru batuana tesa to nanguli, “Ne'e pompekiri komi meliu nggari to nitulisi riara Buku Nagasa.” Patujuku ala komi ne'e mombatoiya samba'a nggari topanggeniaka komi pade mompakasala to santanina.

⁷Komi da'a neliu nggari tau ntanina. Toramo! Pura-pura nuapa to naria ri ja'imu niwai ka komi. Jadi nokuya komi nompakalanga rara ante nanguli etu asele powiamu mboto?

⁸Iwenumo? Nipekiri komi nagana puramo ri ja'i komi, nasugimo komi riara mpengele-ngele? Nipekiri komi aga komi noparenta ewa magau pade kami da'a? O, nabelo mpu'u ane komi mpu'u-mpu'u majadi magau ala kami wo'u mamala moparenta mpasanggani-nggani ante komi!

⁹Nantuki pombarataku kami suro-suro i Pue Yesus nipajadi Alatala to neliu nggandasa ri dunia. Kami nireke nasimbayu ewa tau nikeni nisuku mamate ri ngayo ntodea. Kami aga najadi panggoni mata pura-pura isi langi bo dunia, nabeloka manusia nabeloka malaeka-malaeka i Pue.

¹⁰Kami nireke ntau todoyo sabana kami nanggeni Tesa Kristus. Tapi nantuki pompekiri komi, komimo to nanoto sabana nosaongu rara ante Kristus! Kami nalente-lente tapi nantuki pompekiri komi, komimo to naroso! Kami nisalai ntau tapi nantuki pompekiri komi, komimo to nibila!

¹¹Sampe we'i-we'i kami naoro ta'i bo nabai tambolo. Kami nopakea nte sanjia-njia, kami niboba pade da'a ria peto'o to nikaroo kami.

¹²Kami nokarajaa ntomo ante pale kami mboto ewa batua ala mangelo katuwua. Ane kami nijanjiaka ntau kami nerapi rasi nggari ja'i Alatala ka tau etu. Ane kami nipandasa ntau kami bate-batena nosabara.

¹³Ane kami niuli sinja'i ntau kami nesono ante tesa to nalusuna. Kami nireke ewa rumpu-rumpu ri dunia e'i, kami nireke ewa rangu nu dunia sampe we'i-we'i.

¹⁴Sampesuwu-sampesuwuku, tesa e'i kutulisi ka komi da'a ante patuju mompakaeya komi, tapi ala mompatuduki komi ewa ana-anaku to nipotoweku.

¹⁵Sabana naupa naria nonjobu-njobu guru nompatuduki komi, tapi da'a nadea umamu. Sabana akumo to najadi ewa umamu riara Yesus Kristus ante nanggeni Kareba Belo ka komi.

¹⁶Jadi etu sampe aku merapi ante mpu'u-mpu'u ka komi, pasialamo pokaingguku.

¹⁷Etumo patujuku nompakau i Timotius malau mpaka ri ja'i komi. I'a ewa anaku mboto to nipotoweku, samba'a topomparasaya i Pue to namala raparasaya. I'a kana mompopatora ka komi pokaingguku ewa topomparasaya Yesus Kristus nasimbayu ewa to nipatudukiku ka pura-pura topomparasaya i Pue Yesus ri umba-umba ngata.

¹⁸Naria bara sakuya mba'a tau ri tatongo komi to najadi nasombo, sabana ira nompekiri aku mana momai ri ja'i komi.

¹⁹Tapi ane rapodota i Pue aku kana masalisa momai ri ja'i komi. Pade ane aku marata kana kukita mboto ane tau-tau nasombo etu mpu'u-mpu'u nakuasa atau aga nata'u notesa-tesa.

²⁰Sabana ane samba'a tau najadi todea riara Poparenta nu Alatala, etu nanoto nikita nggari kuasa Alatala to naria riara nggatuwuna, da'a aga nggari tesa-tesana.

²¹Jadi ane aku momai ri ja'i komi ri setu nuapa rapokono komi? Rapokono komi aku momai ri ja'i komi mompatuduki komi ante tesa-tesa to nakasara, atau marata mompatuduki komi ante towe bo rara to nalusuna?