Read Da'a Kaili 1 KORINTUS 5 Bible Online

1 KORINTUS 5 - Da'a Kaili bible

1 KORINTUS 5

¹Naria lele niepeku to nanguli naria samba'a nggari tatongo komi to nogau sala ante rongo nu umana mboto. Nau ri tatongo ntau da'a nomparasaya Alatala da'a ntoto nirata pokainggu to naja'a ewa etu!

²Tapi naupa iwetu komi aga nasombo-sombo nompekiri kaja'ana etu. Kakonona komi masipato masusa mpu'u rara, pade masipato komi mompopalai tau to nompowia etu nggari tatongo komi.

³Naupa aku da'a naria ri tatongo komi we'i-we'i nirasaiku ewa aku naria mamimo ri setu. Pade aku naopumo nompakatantu pesuku to masipato rapawela ka tau to nompowia kaja'ana etu nasimbayu ewa aku naria ri tatongo komi ri setu.

⁴Jadi ane komi masiromu mpasanggani-nggani riara sanga Pue Yesus, powiamo nasimbayu ewa aku wo'u nosanggani-nggani ante komi. Ante kuasa nggari ja'i Pueta Yesus

⁵komi kana mombawai tau etu riara mpale Magau nu Seta sampe dota rarana to naja'a rapakalipo [10] ala kaopuna i'a mamala rapakasalama tempo i Pue Yesus marata bali ri dunia.

⁶Da'a masipato komi nasombo-sombo mompekiri kaja'a ntau etu. Natantu ninjani komimo sangele powia to naja'a namala mompakuja'a pura-pura todea nasimbayu ewa sakedi lau ragi namala mompopebombo pura-pura labu nu gando.

⁷Jadi tajiakamo ragi to nasaena, etumo pokainggu nasilaka, ala komi majadi magasa nasimbayu ewa labu nu gando nabou to da'apa nawela ragi. Pade niparasayaku iwetu to najadi ante komi, sabana Kristus nipatesi manjaliku silakata. I'a nasimbayu ewa ana bimba to nipatesi ri Posusa Paska nto Yahudi. [11]

⁸Jadi ewa to nipowia tempo Posusa Paska kamaimo kita mantajiaka ragi to nasae, etumo manggabasaka pokainggu to nasilaka bo naja'a. Pade kamaimo kita manggoni roti da'a nipowia ante ragi, etumo matuwu ante pokainggu to magasa bo manoa.

⁹Riara suraku bopia nitulisiku ne'e mosigalo ka tau nogau sala ante tau da'a rongona mboto.

¹⁰Tau-tau to nipatujuku da'a tau ri dunia e'i to nogau sala, to da'a ria kabasa-basana mombarata untu ka korona mboto, to nebagiu, pade to nompakoni pue-pue ntanina. Da'a ira to nipatujuku, sabana ane iwetu komi kana malai nggari dunia e'i ala ne'e mosigalo ka ira.

¹¹To nitulisiku ka komi etumo, ne'e mosigalo ka tau to nompangaku korona topomparasaya i Pue tapi ira nogau sala ante tau da'a rongo ira mboto, ira da'a ria kabasa-basana mombarata untu ka korona mboto, ira nompakoni pue-pue ntanina, ira nanguli sinja'i tau ntanina, ira topanginu, atau ira topebagiu. Ne'e mosanggani ante tau to noinggu iwetu nau aga manggoni mpasanggani-nggani!

¹²Da'a urusaku mombatangara tau-tau da'a topomparasaya. Ira kana ratangara Alatala. Tapi komi kana mombatangara tau-tau to nomparasaya. Jadi ewa to nitulisi riara Buku Nagasa, “Popalaimo tau naja'a nggari tatongo komi!” [12]