Read Da'a Kaili 1 KORINTUS 6 Bible Online

1 KORINTUS 6 - Da'a Kaili bible

1 KORINTUS 6

¹Ane maria nggari tatongo komi to nosinggarau ante roana, nokuya i'a nabia manggeni roana etu ratangara ntau da'a nomparasaya Alatala? Nokuya i'a da'a nanggeni roana etu ratangara topomparasaya i Pue?

²Iwenumo? Da'a ninjani komi topomparasaya i Pue kana mombatangara pura-pura isi langi bo dunia banepia? Jadi ane isi langi bo dunia kana ratangara komi, natantumo komi kana mompakule mombatangara parakara-parakara to nanga'ana ri tatongo komi mboto!

³Da'a ninjani komi kita topomparasaya kana mombatangara malaeka-malaeka i Pue? Jadi natantumo komi kana mompakule mombatangara parakara biasa riara nggatuwu komi eo-eo!

⁴Jadi ane maria parakara biasa ewa etu nokuya komi nanggeni roamu ratangara tau-tau to da'a nomparasaya?

⁵Aku nanguli tesa etu ala mompakaeya komi. Natantumo naria samba'a nggari tatongo komi to nanoto sampe i'a mamala mombatangara parakara ri olo komi topomparasaya!

⁶Tapi etu da'a najadi. Komi aga nanggeni roamu topomparasaya ratangara ntopotangara to da'a nomparasaya i Pue!

⁷Posinggarau komi samba'a bo samba'a etu tandaina komi nidagimo sabana pokainggu komi etu da'a ntoto masipato ka topomparasaya. Kakonona nabelopa ane komi mompakamba koromu rapakaja'a ntau atau rabagiu ntau.

⁸Tapi etu da'a nipowia komi! Komi mbotomo nompakaja'a bo nombabagiu roa-roamu topomparasaya!

⁹Iwenumo? Da'a ninjani komi tau-tau to nadenggo rara da'a ntoto mamala mombarata bagia riara Poparenta nu Alatala? Ne'e masalanjala! Tau-tau nogau sala ante tau da'a rongona mboto, tau-tau to nompakoni pue-pue ntanina, tau-tau nebualo, bo tau-tau nogau sala langgai mbau langgai besi mbau besi, ira pura-pura da'a ntoto mamala mombarata bagia riara Poparenta nu Alatala.

¹⁰Wa'a wo'u ante topangangga, tau-tau da'a ria kabasa-basana mombarata untu ka korona mboto, tau-tau nanginu sampe malangu, tau-tau nanguli sinja'i roana, bo topebagiu. Ira wo'u da'a ntoto mamala mombarata bagia riara Poparenta nu Alatala.

¹¹Bopia bara sakuya mba'a nggari tatongo komi noinggu iwetu wo'u. Tapi silaka komi etu nitapasimo. Katuwu komi nipakagasamo, komi najadi tau nanoa riara mpanggita Alatala. Etu pura-pura najadi nggari pomparasayamu ka Pue Yesus Kristus bo nggari kuasa Nosa Nagasa nu Alatala.

¹²Bara naria to nanguli iwe'i: “Pura-pura pokainggu nipaloga ka aku.” Tapi toramo, da'a pura-pura pokainggu nanggeni belo ka aku. “Pura-pura pokainggu nipaloga ka aku,” tapi aku da'a mompaloga sangele mombakuasai aku.

¹³Naria wo'u to nanguli iwe'i: “Panggoni nipowia ala rakoni, pade ta'ita nipowia rapangisi panggoni.” Tapi toramo, Alatala kana mompakaropu panggoni bo ta'ita banepia. Korota da'a nipowia ala mogau sala ante tau da'a rongota mboto tapi ala mombabila i Pue. Pade Puemo to manggeniaka korota.

¹⁴Ante kuasana mboto Alatala nompakatuwu bali i Pue Yesus nggari kamatena, pade iwetu wo'u I'a kana mompakatuwu bali kita nggari kamateta.

¹⁵Da'a ninjani komi korota ewa sipa nu koro Kristus? Jadi masipato kita mompake korota to najadi ewa sipa nu koro Kristus ala mogau sala ante besi bajinga? Natantumo da'a ntoto masipato!

¹⁶Da'a ninjani komi tau to nogau sala ante besi bajinga najadi saongu koro ante i'a? Sabana naria to nitulisi riara Buku Nagasa iwe'i: “Ira romba'a kana majadi samba'a.” [13]

¹⁷Tapi tau to najadi topomparasaya i Pue kana majadi saongu rara ante I'a.

¹⁸Ne'e ntoto mogau sala ante tau da'a rongomu mboto. Sabana pura-pura silaka ntanina to nipowia manusia nompakaja'a tau ntanina. Tapi ane i'a mogau sala ante tau da'a rongona mboto i'a mompakaja'a korona mboto.

¹⁹Iwenumo? Da'a ninjani komi koromu najadi ewa sapo mpepue to nipeto'o Nosa Nagasa nu Alatala? I'a naria riara nta'i komi. I'a nipopana'u Alatala ka komi. Jadi koromu da'a komi puena tapi Alatala puena.

²⁰Komi naopumo nitolo Alatala ante oli to nasulina. Sabana etu komi masipato matuwu ante pokainggu to mombabila Alatala.