Read Da'a Kaili 1 KORINTUS 7 Bible Online

1 KORINTUS 7 - Da'a Kaili bible

1 KORINTUS 7

¹We'i-we'i aku madota mombasono pompekutana-pompekutana to nitulisi komi riara sura. Ane samba'a tau da'a norongo etu nabelo.

²Tapi nantora pesoba-pesoba mogau sala, nabelopa ane butu mba'a langgai bo butu mba'a besi kana morongo.

³Rongo langgai kana mantuki dota rongona besi mosampaturu, pade iwetu wo'u rongo besi.

⁴Sabana da'a rongo besi to nakuasa mompakatantu nuapa to rapowia ri korona mboto, tapi rongona langgai. Pade iwetu wo'u da'a rongo langgai to nakuasa mompakatantu nuapa to rapowia ri korona mboto, tapi rongona besi.

⁵Ne'e moga'a mosampaturu ane da'apa ria kasituju mpasanggani-nggani. Komi mamala moga'a mosampaturu bara sakuya kasaena ane rongo langgai bo rongo besi mosituju ala mombarata loga mosambaya. Tapi ane maopumo tempo to nipakatantu etu, komi kana matingguli mosampaturu ala ne'e komi rapesoba Magau nu Seta mogau sala sabana komi da'a mamala manta'amaka dota nasumu.

⁶Tesaku e'i ewa morongo bara da'a morongo da'a sangele parenta nggari ja'iku, tapi etu aga sangele pombarataku.

⁷Kakonona to nipodotaku ala pura-pura tau mamala maloa nasimbayu ewa aku e'i. Tapi butu mba'a tau niwai ka pompakulena mboto nggari ja'i Alatala. Naria to niwai ka pompakule matuwu maloa sampe mamate, tapi naria ntanina da'a niwai ka pompakule ewa etu.

⁸Iwe'imo pepatudukiku ka tau da'apa norongo pade ka besi-besi tobalu: Nabelopa ane ira matuwu maloa nasimbayu ewa aku.

⁹Tapi ane ira da'a mamala manta'amaka nasu ira, agina ira morongo. Sabana nabelopa morongo pade mandasa manta'amaka nasu.

¹⁰Iwe'imo pepatudukiku ka tau-tau to norongomo. Pepatuduki e'i da'a nggari ja'iku mboto tapi nggari ja'i Pue. Rongo besi da'a mamala moga'a ante rongona langgai.

¹¹Tapi ane rapana i'a moga'a i'a kana maroo matuwu maloa atau matingguli bali ri ja'i rongona langgai. Pade samba'a rongo langgai da'a mamala mombasompo rongona besi.

¹²Pade iwe'imo pepatudukiku ka tau-tau ntanina. Pepatuduki e'i nggari ja'iku mboto da'a parenta nggari ja'i Pue. Ane samba'a topomparasaya norongomo ante besi da'a topomparasaya, pade rongona besi etu madota maroo matuwu mpasanggani-nggani, langgai etu da'a mamala mombasompo rongona besi etu.

¹³Pade ane samba'a topomparasaya besi niporongo langgai da'a topomparasaya, pade rongona langgai etu madota maroo matuwu mpasanggani-nggani ante i'a, besi etu da'a mamala moga'a ante rongona langgai etu.

¹⁴Sabana rongo langgai to da'apa nomparasaya i Pue nireke ewa bagia nu Alatala sabana nggari rongona besi etu to nomparasaya. Pade wa'a wo'u rongo besi to da'a nomparasaya nireke ewa bagia nu Alatala sabana nggari rongona langgai to nomparasaya. Ane da'a iwetu ana-ana ira kana rareke natantoru riara mpanggita Alatala nasimbayu ante ana-ana ntau da'a nomparasaya. Tapi ane ira maroo matuwu mpasanggani-nggani ana-ana ira kana rareke ewa bagia nu Alatala.

¹⁵Tapi ane rongo langgai atau rongo besi to da'a nomparasaya madota moga'a ante rongona topomparasaya, ne'e ratagi ira moga'a. Ane iwetu rongo langgai atau besi to nomparasaya da'a mana nisoko ada mporongo. Tapi toramo! Alatala madota ala komi matuwu mosinggabelo samba'a bo samba'a.

¹⁶Sabana da'apa ninjani komi nuapa to majadi. Bara rongo besi to nomparasaya mamala manggeni rongona langgai rapakasalama. Bara rongo langgai to nomparasaya mamala manggeni rongona besi rapakasalama.

¹⁷Butu mba'a tau kana matuwu nantuki to nipakatantu i Pue ka i'a. Katuwuna kana bate-batena ewa tempo i'a nipokio Alatala majadi todeana. Etumo atura to nipatudukiku ka pura-pura topomparasaya.

¹⁸Jonjona, ane samba'a tau to Yahudi to nisuna tempo i'a nipokio Alatala majadi todeana, ne'e i'a mompasimbuku mompakalipo tandai posuna etu. Iwetu wo'u ane samba'a tau da'apa nisuna tempo i'a nipokio Alatala majadi todeana, ne'e i'a merapi rasuna.

¹⁹Sabana mantuki ada mposuna atau da'a mantuki ada etu da'a napoko. To napokona etumo mantuki parenta-parenta nu Alatala.

²⁰Butu mba'a tau katuwuna kana bate-batena ewa tempo i'a nipokio Alatala majadi todeana.

²¹Ane komi najadi samba'a batua tempo komi nipokio Alatala, ne'e masusa-susa rara mompekiri etu. Tapi ane komi mombarata loga ala mana majadi tau nipobatua, pakemo loga etu.

²²Toramo! Samba'a tau to najadi batua tempo i'a nipokio i Pue najadi ewa samba'a tau da'a nipobatua sabana i'a nikabasaka i Pue nggari silakana. Pade samba'a tau da'a nipobatua tempo i'a nipokio i Pue najadi ewa samba'a batua sabana i'a nekou ri ja'i Kristus.

²³Toramo! Komi naopumo nitolo Alatala pade olina naopu nibayarina. Sabana etu ne'e sampe komi rapobatua manusia.

²⁴Jadi sampesuwu-sampesuwu, butu mba'a tau kana maroo mosanggani-nggani ante Alatala, katuwuna kana bate-batena ewa tempo i'a nipokio Alatala majadi todeana.

²⁵Ane pompekutana komi ewa tau da'apa norongo, [14] da'a ria parenta nggari ja'i Pue kupapola ka komi, tapi kutesa ka komi pombarataku mboto. Pade tesaku e'i masipato raparasaya komi sabana aku niwai noto nggari ja'i Pue.

²⁶Jadi iwe'imo pombarataku: Nantora mpengele-ngele kasusa riara dunia to najadi we'i-we'i, nabelopa ane katuwu komi bate-batena ewa we'i-we'i.

²⁷Ane komi norongomo, ne'e mangelo jala moga'a ante rongomu. Ane komi da'apa norongo, ne'e mana mangelo morongo.

²⁸Tapi ane rapana komi morongo, komi da'a masilaka. Pade ane samba'a randoo raporongo i'a da'a masilaka. Tapi toramo, tau-tau to morongo kana mantingayo mpengele-ngele kasusa riara nggatuwu ira. Pade to nipodotaku ala komi ne'e mawela kasusa etu.

²⁹Sampesuwu-sampesuwuku, patujuku iwe'i: Tempota mana masaeka. Jadi mompamula we'i-we'i tau-tau to norongona ne'e aga mompekiri rongona.

³⁰Pade tau-tau to nageo ante nasusa rara ne'e aga mompekiri kasusa rarana. Tau-tau to nadamba ne'e aga mompekiri kadamba nu rarana. Tau-tau to nodaga ne'e aga mompekiri balu-baluna.

³¹Pade tau-tau to nompariba'a mbara-mbara dunia e'i ne'e aga mompekiri mbara-mbara etu. Sabana dunia to ninjanita we'i-we'i mana masaeka malipo.

³²To nipodotaku ala komi matuwu ante da'a makini-kini rara. Tau da'apa norongo nompakasaungga pekirina ka bago i Pue. I'a nompekiri iwenu i'a mamala mompakadamba rara i Pue.

³³Tapi tau to norongomo kana mompakasaungga pekirina ka mpengele-ngele ri dunia e'i. I'a kana mompekiri iwenu i'a mamala mompakadamba rara rongona besi

³⁴sampe pekirina matibagi-bagi. Besi-besi to mana norongo bo randoo-randoo nompakasaungga pekiri ira ka i Pue. Ira nompekiri iwenu koro bo pekiri rara nta'i ira mamala magasa riara mpanggita Alatala. Tapi besi-besi to norongomo kana mompekiri mpengele-ngele ri dunia e'i. Ira kana mompekiri iwenu mompakadamba rara rongona langgai.

³⁵Aku nantesa e'i ka komi ala mantulungi komi. Da'a patujuku ala mompandasa komi ante mpengele-ngele atura, tapi ala komi mowia to makono bo masipato riara mpanggita Alatala. Pade patujuku ala komi maroo mantuki i Pue ante pompekiri to da'a matibagi-bagi.

³⁶Ane maria langgai to nompekiri pokaingguna da'a mana masipato ri ja'i tingeana, pade i'a mana mamala manta'amaka nasuna [15] sampe nirasaina ira kana morongo, agina i'a mompowia to nipodotana etu. Agina ira morongo, etu da'a silaka.

³⁷Tapi ane maria langgai to nompekiri nabelopa i'a da'a momporongo tingeana, pade ane katantuna etu nipowiana ante da'a nipasu'u ntau, pade ane i'a mamala mombakuasai nasuna, nabelopa ane i'a da'a morongo.

³⁸Jadi langgai to momporongo tingeana nompowia kabelona, tapi langgai to da'a morongo nompowia to neliu nggabelo.

³⁹Samba'a besi to norongomo nisoko ada mporongo ane rongona langgai danatuwu. Tapi ane rongona langgai namatemo i'a mamala raporongo langgai ntanina to nipokonona. Tapi i'a kana raporongo langgai to nomparasaya i Pue.

⁴⁰Nantuki pombarataku, masanapa i'a ane da'a raporongo bali. Etu aga pombarataku mboto, tapi naupa iwetu tesa etu masipato raepe sabana aku e'i samba'a tau to nikuasai Nosa Nagasa nu Alatala.