Read Da'a Kaili 1 KORINTUS 8 Bible Online

1 KORINTUS 8 - Da'a Kaili bible

1 KORINTUS 8

¹Ane pompekutana komi ewa panggoni to nipakoni ka pue-pue ntanina, iwe'imo pesonoku: Komi nanguli, “Kita pura-pura naria pangginjanita.” Nakonomo etu, tapi toramo, pangginjani nompakasombo tau tapi towe nompakaroso rara ntau.

²Tau to nompekiri nariamo pangginjanina tapi i'a da'a nompotowe tau ntanina, kakonona da'apa nangginjani ante nanoto ewa to masipato ranjanina.

³Tapi tau to nompotowe Alatala, i'amo to niposinjani Alatala.

⁴Jadi ane mantesa panggoni to nipakoni ka pue-pue ntanina, ninjanitamo parantau-parantau to nipake tempo nompakoni pue-pue ntanina etu nombagambara sangele to da'a ria. Pade ninjanita wo'u Alatala aga samba'a lau, da'a ria ntanina.

⁵Naria mamimo nadea ngele to nipesomba manusia to niuli ira pue bo karampua, nabeloka ri langi nabeloka ri dunia. Tapi naupa iwetu to niparasaya tau ntanina,

⁶ninjanita Alatala aga samba'a lau. I'amo Umata to nompajadi mpengele-ngele to naria ri langi bo dunia. I'amo to najadi patuju katuwuta. Pade aga samba'a lau Pueta, etumo Yesus Kristus. Nggari I'amo sampe mpengele-ngele ri langi bo dunia nipajadi, pade nggari I'amo sampe kita matuwu.

⁷Tapi naupa iwetu, da'a pura-pura tau nangginjani etu. Naria topomparasaya to nabiasa nompakoni pue-pue ntanina da'apa ira nomparasaya Kristus. Jadi sampe we'i-we'i ane ira manggoni panggoni to nipakoni ka pue-pue ntanina, panggoni etu nireke ira mpu'u-mpu'u panggoni nu pue-pue etu. Ante nanggoni panggoni etu nirasai ira nasilaka sabana pomparasaya ira da'apa naroso.

⁸Kakonona panggoni da'a manggeni kita mompakamosu Alatala. Ane kita da'a manggoni panggoni etu posinggamosuta ante Alatala da'a mantambai makura. Pade ane kita manggoni panggoni etu kita da'a mantambai mamosu ante Alatala.

⁹Tapi sampesuwu-sampesuwu, pakabelo-belo ala ne'e sampe tau-tau to nalente pomparasayana rapakagero pomparasayana sabana komi nomparasaya pura-pura panggoni namala rakoni.

¹⁰Patujuku iwe'i: Rapana komi to nangginjani pura-pura panggoni mamala rakoni malau manggoni ri sapo mpesomba nu pue-pue ntanina. Pade rapana maria samba'a roamu topomparasaya to da'apa naroso pomparasayana manggita komi manggoni ri setu. Manggita etu natantumo i'a wo'u kana mabia manggoni panggoni to nipesomba ka pue-pue ntanina etu.

¹¹Tapi ante iwetu roamu topomparasaya etu to nitolo ante lei Kristus kana rapakagero pomparasayana sabana “pangginjani” komi etu.

¹²Pade ane komi mompowia silaka iwetu ri ja'i sampesuwumu ante mompakagero pomparasayana to nalentena, komi wo'u mompowia silaka ri ja'i Kristus mboto.

¹³Jadi sampesuwu-sampesuwu, ane panggoni to nikoniku mompakagero pomparasaya sampesuwuku, aku mana manggoni panggoni etu ala ne'e aku mompakagero pomparasayana.