Read Da'a Kaili 2 KORINTUS 1 Bible Online

2 KORINTUS 1 - Da'a Kaili bible

2 KORINTUS 1

¹Sura e'i nggari ja'iku i Paulus to nionggotaka najadi suro Yesus Kristus nantuki dota Alatala, bo nggari ja'i sampesuwuta i Timotius, ka todea topomparasaya Alatala ri ngata Korintus pade ka pura-pura topomparasaya ri njumaongu Propinsi Akhaya.

²Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.

³Kana ratoiyata Alatala, Uma nu Pueta Yesus Kristus. I'a Umata to naasi matana manggita kita bo I'amo Alatala to nompakaroso rarata riara mpengele-ngele.

⁴I'a nompakaroso rara kami riara mpengele-ngele kasusa bo kapari, ala ante karoso rara to nitarima kami nggari ja'ina kami wo'u mamala mompakaroso rara tau-tau ntanina to nombarasai kasusa bo kapari.

⁵Sabana nasimbayu ewa kami mpu'u-mpu'u nombarasai kasusa bo kapari ewa to nirasai Kristus, iwetu wo'u rara kami mpu'u-mpu'u nipakaroso Kristus.

⁶Ane kami mombarasai kasusa bo kapari, etu majadi ala kami mamala mompakaroso rara komi, pade ala komi mamala rapakasalama. Ane rara kami rapakaroso riara kasusa bo kapari, etu majadi ala komi wo'u mamala rapakaroso rara sampe komi maroo manta'amaka kasusa bo kapari nasimbayu ewa kami.

⁷Etu sampe kami mpu'u-mpu'u nanjarumaka komi. Sabana ninjani kami ane komi mombarasai kasusa bo kapari ewa to nirasai kami, rara komi wo'u kana rapakaroso nasimbayu ewa kami.

⁸Sampesuwu-sampesuwu, to nipodota kami ala komi mangginjani iwenu kasusa bo kapari to nirasai kami ri Propinsi Asia. Pepandasa to nawela kami natomo mpu'u, neliu nggari pompakule kami sampe naopumo rara kami matuwu.

⁹Nirasai kami ewa kami nisuku mamate. Tapi etu najadi ala kami ne'e manjarumaka karoso kami mboto tapi manjarumaka Alatala to nakuasa mompakatuwu bali tau namate.

¹⁰I'amo to nompakasalama kami nggari pepandasa to nompakawiora rara etu sampe kami da'a namate. Pade I'a bate-batena mompakasalama kami. I'amo to nisarumaka kami mompakasalama kami nggari kasusa bo kapari banepia.

¹¹Etu kana majadi ante petulungi posambaya komi. Sabana ane madea tau momposambaya kami Alatala kana mantulungi kami. Ante iwetu madea tau kana manguli tarima kasi ka Alatala manggita asele nu posambaya ira etu.

¹²Naria sangele to nompakadamba rara kami iwe'i: Pokainggu kami riara dunia e'i bate-batena nanoa bo nagasa riara mpanggita Alatala, neliu-liupa tempo kami nosanggani-nggani ante komi. Pokainggu kami da'a nantuki noto manusia tapi nantuki towe belo nu Alatala.

¹³Sabana to nitulisi riara sura kami mamala rabasa komi bo ranjani komi ante nanoto, da'a ria patuju ntanina natetabuniaka riarana. We'i-we'i komi da'apa nangginjani patuju kami ante nabelo. Tapi nisarumakaku kana marata tempona komi mpu'u-mpu'u mangginjani patuju kami, ala tempo karata i Pue Yesus banepia komi mamala madamba-damba mompekiri kami nasimbayu ewa kami kana madamba-damba mompekiri komi.

¹⁵Niparasayaku komi mpu'u-mpu'u kana madamba mompekiri aku iwetu. Etu sampe nipakatantuku ane malau mpaka ri Propinsi Makedonia aku kana mesai ri ja'i komi ronggani ala komi mamala mantarima rasi nggari ja'iku ronggani kadeana. Patujuku mesai mantalioda komi ntani ruru pade mapola mpaka ri Propinsi Makedonia. Pade tempo manjili nggari Makedonia patujuku mesai mantalioda komi karongganina ala komi mamala mantulungi aku mompapola polumakoku mpaka ri Bagia Yudea.

¹⁷Tapi niaku etu nabalimo. Bara naria to nompekiri aku norongu rara tempo aku nompakatantu polumakoku etu. Atau ira nompekiri aku aga nompakatantu niaku nantuki dotaku mboto, sanggani nanguli, “Iyo,” sanggani nanguli, “Da'a.”

¹⁸Tapi sampesuwu-sampesuwu, nasimbayu ewa Alatala namala raparasaya, janji kami wo'u namala raparasaya. Tesa kami ka komi natantu, da'a sanggani nanguli, “Iyo,” pade sanggani nanguli, “Da'a.”

¹⁹Sabana Yesus Kristus, Ana nu Alatala, to nipatolele i Silas, i Timotius bo aku mboto ka komi, da'a tau norongu rara. I'a da'a sanggani nanguli, “Iyo”, pade sanggani nanguli, “Da'a.” Tesana bate-batena namala raparasaya.

²⁰Pura-pura pojanji Alatala ka kita kana rapakadupa sabana kita nosaongu rara ante Kristus. Etu sampe kita namala manguli, “Nakono mpu'u pojanji-pojanji Alatala.” Pade ante iwetu Alatala nibila bo nitoiya.

²¹Alatala mbotomo to mompakaroso kita pura-pura, nabeloka kami nabeloka komi wo'u, sabana kita mosaongu rara ante Kristus. Alatalamo to nompelisi kita majadi bagiana

²²pade niwaina ka kita Nosana to Nagasa ewa tandaina kita bagiana. Nosana to Nagasa etu najadi panjokota to nompakanoto nuapa to nijanjina ka todeana natantumo kana ratarimata.

²³Sampesuwu-sampesuwu, aku da'a nodawa. Alatala mboto sabiku. I'a nangginjani isi rara nta'iku. Ninjanina aku da'a nomai mantalioda komi ri ngata Korintus sabana aku da'a nadota mompakasusa rara komi.

²⁴Da'a patujuku momparenta ka komi nuapa to masipato raparasaya komi, sabana naroo mamimo pomparasaya komi. Tapi kami aga madota mokarajaa mpasanggani-nggani ante komi ala komi rapakadamba rara.