Read Da'a Kaili 2 KORINTUS 10 Bible Online

2 KORINTUS 10 - Da'a Kaili bible

2 KORINTUS 10

¹We'i-we'i aku, i Paulus e'i, madota merapi sangele ka komi. Naria bara sakuya mba'a tau ri setu to nanguli iwe'i: “Tempo i Paulus naria ri tatongota i'a nekou, tapi tempo nosinggakawao pade nabia i'a.” Jadi ante naede bo nalusu rara nasimbayu ewa kaede bo kalusu rara Kristus mboto

²aku merapi ka komi, ne'e mompasu'u aku moinggu mako'o ri ja'i komi tempo aku momai ri setu. Sabana aku nopatuju moinggu mako'o iwetu ri ja'i tau-tau ri setu to nanguli pokaingguku nasimbayu ewa tau-tau ri dunia to da'a nekou ri ja'i Alatala.

³Toramo! Naupa kami natuwu riara dunia kami da'a nosibali mangewa kaja'ana ante pompakule manusia biasa.

⁴Parewa mposibali to nipake kami da'a parewa mposibali nggari dunia e'i, tapi parewa to nabaraka nggari ja'i Alatala. Ante parewa etu kami mompakaropu akala-akala tau-tau to nangewa Alatala.

⁵Kami mompakaropu mpengele-ngele pompekiri to nadenggona bo mpengele-ngele pompekiri to nasombona to nombalawa tau mangginjani Alatala. Kami mompakatundu mpengele-ngele pompekiri ri ja'i Kristus.

⁶Jadi ane komi pura-pura nompakanoto komi mpu'u-mpu'u natundumo ri ja'i kami, nasadiamo kami mombasuku ira to da'a natundu.

⁷Sampesuwu-sampesuwu, pekirimo to nanoto ranjani komi. Ane maria tau mpu'u-mpu'u nompekiri i'a bagia Kristus, kana ratorana kami wo'u bagia Kristus nasimbayu ewa i'a.

⁸Naupa aku mombatoiya kuasa to niwai Kristus ka kami meliu nggari to masipatona, aku da'a maeya mata. Sabana kuasa etu niwai i Pue ka kami ala mompakaroso pomparasaya komi, da'a ala mombagero komi.

⁹Da'a patujuku mompakaeka komi ante sura-suraku.

¹⁰Sampe niuliku iwetu sabana ninjaniku nariamo tau to nanguli iwe'i: “Sura-sura i Paulus nataja bo nako'o, tapi ane i'a mboto naria ri tatongota, i'a aga noinggu nalente-lente, pade pantesana da'a ntoto ria batuana.”

¹¹Tapi kana ranjani tau-tau to nanguli iwetu ane kami momai ri ja'i komi, pokainggu kami kana masimbayu pura ante tesa to nitulisi kami riara sura-sura.

¹²Da'a nabia kami manguli koro kami nasimbayu ante ira to nombatoiya koro ira mboto! Da'a nabia kami mompakasimbayu koro kami ante ira! Ira nositoiya mboto samba'a bo samba'a. Ira nantoiya koro ira nantuki panggita ira mboto. Natantumo nadoyo mpu'umo tau-tau etu!

¹³Tapi kami da'a ntoto nasimbayu ante ira! Ane kami mombatoiya koro mboto kami da'a mombaliunaka to masipatona, sabana kami aga mombatoiya pokarajaa to niparasaya Alatala ka kami. Pade komi pura-pura ri Korintus nesua bagia mpokarajaa to niparasaya ka kami etu.

¹⁴Da'a nasala ane kami mombatoiya asele mpokarajaa kami ri tatongo komi, sabana kamimo to nanggeni Kareba Belo ewa Kristus ka komi.

¹⁵Kami da'a nombaliunaka to masipatona ante nanguli asele mpokarajaa tau ntanina asele mpokarajaa kami mboto. Tapi kami nanjarumaka pomparasaya komi kana mantambai maroso sampe kaopuna mantambai mabete asele mpokarajaa kami ri tatongo komi.

¹⁶Ante iwetu kami mamala mapola mompatolele Kareba Belo sampe ri bagia-bagia ntanina meliu nggari bagia komi. Kami da'a madota mombatoiya koro kami mboto ewa asele mpokarajaa tau-tau ntanina.

¹⁷Ewa to nitulisi riara Buku Nagasa iwe'i: “Tau to madota mombatoiya sangele, i'a kana mombatoiya nuapa to nipowia i Pue.” [13]

¹⁸Sabana tau to nikonoa Alatala da'a tau to nombatoiya korona mboto tapi tau to nitoiya Alatala.