Read Da'a Kaili 2 KORINTUS 11 Bible Online

2 KORINTUS 11 - Da'a Kaili bible

2 KORINTUS 11

¹Sampesuwu-sampesuwu, kuperapi ala komi mosabara ante aku. Palogamo aku motesa madoyo sakedi we'i-we'i! Tapi nosabara mamimo komi ante aku!

²Nasusa mpu'umo raraku mompekiri komi nasimbayu ewa kasusa rara Alatala mboto! Sabana komi nasimbayu ewa samba'a randoo to nagasa pokaingguna to nipopotingeaku ante Kristus.

³Tapi nakini mpu'umo raraku, ne'e-ne'e komi raakala ntau sampe komi mana mompotowe Kristus ante mpu'u-mpu'u raramu nasimbayu ewa i Hawa niakala ule tempo nggaolu.

⁴Sabana nikitaku ewa komi nasadia mantarima ante nasana rara tau-tau to narata ri ja'imu mompatolele kareba ka komi to nantesa Yesus ntanina, da'a Kareba i Pue Yesus to nipatolele kami ka komi. Komi nasadia mantarima kuasa ntanina nggari to nitarima komi nggari ja'i Nosa Nagasa nu Alatala. Pade komi nasadia mantarima kareba ntanina nggari Kareba Belo to nitarima komi nggari ja'i kami bopia.

⁵Posabaramo komi ante aku e'i, sabana nantuki pombarataku aku e'i da'a ntoto nakura nggari tau-tau to nireke komi suro to neliu ntoto kata'una.

⁶Naupa aku da'a nata'u notesa, pangginjaniku da'a ria kakurana. Etu bate-batena nipopokita kami ka komi riara mpengele-ngele bopia.

⁷Tempo aku naria ri tatongo komi aku nompatolele Kareba Belo ka komi ante da'a ntoto nerapi gaji nggari ja'i komi. Aku nompakaede koroku nokarajaa ante paleku mboto ala manggeni belo ka komi pura-pura. Tapi nokuya komi nompekiri powiaku etu nasala?

⁸Tempo aku nomai nantulungi komi aku nitanggu todea topomparasaya nggari ngata ntanina. Namala rauli aku nompakarugi ira ala mamala mantulungi komi.

⁹Pade tempo aku ri tatongo komi ane naria to niparaluuku aku da'a nompakatomo komi. Sabana to niparaluuku etu nipakagana sampesuwu-sampesuwu topomparasaya to narata nggari Propinsi Makedonia. Aku bate-batena nompasimbuku ala ne'e mompakatomo komi mompekiri katuwuku. Pade aku bate-batena mompasimbuku iwetu.

¹⁰Da'a ria samba'a ri Propinsi Akhaya to mamala mombatagi aku motesa mombatoiya pokaingguku etu! Tesaku e'i nakono sabana pepatuduki to nakonona nggari ja'i Kristus naria riara nta'iku!

¹¹Nuapa sabana aku notesa iwetu? Bara nipekiri komi aku da'a nompotowe komi? Etu da'a nakono! Ninjani Alatala mbotomo aku nompotowe komi!

¹²Tapi aku bate-batena mantuki kabiasaku etu. Aku da'a merapi gaji nggari ja'i komi ala mompakalipo tesa tau ntanina to nangoa nanguli ira nokarajaa nasimbayu ante kami.

¹³Tau-tau ewa etu aga suro-suro topodawa! Ira topokarajaa to nadenggona, aga tumoni-moni najadi suro-suro Kristus!

¹⁴Kakonona pokainggu ira etu da'a nompakagumaa kami, sabana Magau nu Seta mboto namala mombabali korona majadi ewa malaeka to naremena.

¹⁵Jadi da'a sangele to rapogumaa ane batua-batuana wo'u tumoni-moni majadi ewa suro-suro to nantuki dota Alatala. Tapi kaopuna ira kana rabalasi ante pesuku to masipato ante powia ira.

¹⁶Sangganipa kuperapi, ne'e rapekiri komi aku e'i tau nadoyo. Tapi naupa bara maria to nompekiri iwetu, palogamo aku mombatoiya koroku mboto sakedi ewa samba'a tau nadoyo.

¹⁷Ante mombatoiya koroku mboto e'i aku da'a notesa nantuki parenta i Pue, tapi ewa samba'a tau nadoyo.

¹⁸Kakonona nadeamo tau ntanina nombatoiya koro ira bo powia to nipowia ante karoso ira mboto. Jadi aku wo'u kana mombatoiya koroku sakedi.

¹⁹Nantuki komi, komimo tau-tau to nanoto mpu'u, tapi komi aga nosabara ante tau-tau nadoyo!

²⁰Nanotomo etu sabana komi nosabara mpu'u ane maria topanggeniaka mompobatua komi, ane ira mompakaopu mbara-mbara komi, ane ira mombaakala komi, ane ira moinggu masombo-sombo ri ja'i komi, atau ane ira mombasapa lenje komi!

²¹Ante naeya mata aku kana mompangaku ka komi, kami da'a nabia moinggu iwetu ri ja'i komi! Tapi ane maria ira to nabia mombatoiya koro ira mboto aku wo'u nabia! We'i-we'i aku notesa ewa tau nadoyo!

²²Iwenumo? Ira tau-tau to Yahudi? Aku wo'u tau to Yahudi! Ira tau-tau to Israel? Aku wo'u tau to Israel! Ira muli Abraham? Aku wo'u muli Abraham!

²³Ira batua Kristus? Pantesaku e'i ewa pantesa togila! Aku batua Kristus to neliu nggabelo nggari ira! Aku nokarajaa neliu nggatomo nggari ira! Aku nisuaraka riara tarunggu neliu nggaoso nggari ira! Aku nicambu neliu nggaja'a nggari ira, pade nadea ngganimo aku ntora namate!

²⁴Limangganimo aku niporo ntau to Yahudi, butu nggani tolumpulu sasio mbela.

²⁵Tolungganimo aku niboba nto Roma ante kayu. Sanggani aku nirempe ntau ante watu. Tolungganimo sakaya bete to nipesawiku natala rara ntasi, pade naria sanggani aku nalome rara ntasi saeo sambengi.

²⁶Nadea ngganimo aku nolumako nakawao. Riara mpolumakoku etu aku nandasa nombawote ue nanggabuntu, aku nandasa nantingayo parampo, aku nipandasa tau-tau to Yahudi bo tau-tau da'a to Yahudi wo'u. Aku nipandasa riara ngata pade ri karawa baina. Aku nandasa rara ntasi pade aku wo'u nipandasa tau-tau tumoni-moni nomparasaya i Pue Yesus.

²⁷Aku bate-batena nokarajaa ntomo sampe nadea ngganimo aku da'a nakapo noturu njambengi ntua. Aku naoro ta'i bo nabai tambolo, pade naoso nanta'amaka nanggoni. Aku naoso naleni bo nakura pakea.

²⁸Pade ntanina nggari etu pura-pura, eo-eo aku nakini raraku nompekiri pura-pura todea topomparasaya.

²⁹Ane maria nggari tatongo ira to nalente pomparasayana, aku wo'u mombarasai kalentena etu. Ane maria nggari ja'i ira to nanawu riara silaka, aku wo'u masusa raraku nompekiri ira.

³⁰Ane aku nipasu'u mombatoiya koroku, agina aku mombatoiya nuapa-nuapa to nompakanoto kalenteku.

³¹Alatala, Uma nu Pueta Yesus, nangginjani aku da'a nodawa! I'amo to ratoiya sampe ri kasae-saena!

³²Tempo aku ri ngata Damsyik Gubernur to nipakakuasa Magau Aretas nompakau tantarana nanggatono bobaa bete ngata etu ala manjoko aku.

³³Tapi aku niulunjaka riara karanji lauro nggari saongu tilalaba ri tembo ngata mpaka ri sawalikuna. Ante iwetu aku nakabasaka nggariara mpale Gubernur etu.