Read Da'a Kaili 2 KORINTUS 12 Bible Online

2 KORINTUS 12 - Da'a Kaili bible

2 KORINTUS 12

¹Aku kana mompapola mombatoiya koroku. Naupa da'a ria gunana aku kana mompapola mantesa panggita to nikitaku bo pangginjani to nipopanjani Alatala ka aku.

²Aku nosinjani ante samba'a topomparasaya Kristus. Sampulu patampae naliu i'a nionggotaka sampe ri suruga katolunjunjuna. Da'a ninjaniku ane korona mpu'u-mpu'u nateonggotaka atau etu aga panggitana, tapi Alatala nangginjani.

³Kusili sangganipa, tau etu nionggotaka sampe nesua ri suruga. Da'a ninjaniku ane korona mpu'u-mpu'u nionggotaka atau etu aga sangele panggitana, tapi Alatala nangginjani. Pade ri setu i'a nangepe tesa-tesa anu da'a namala rasowadaka, tesa anu da'a namala ratesa manusia. [14]

⁵Aku mombatoiya katuwu tau etu, tapi da'a katuwuku. Ewa katuwuku mboto aku aga mombatoiya nuapa-nuapa to mompopokita kalenteku.

⁶Kakonona ane aku madota mombatoiya koroku, aku da'a noinggu nadoyo-doyo sabana tesa to kuuli etu kana makono. Tapi aku da'a madota mombatoiya katuwuku mboto ala ne'e sampe maria tau mompekiri aku meliupa nggari to nakonona. Ne'e-ne'e pompekiri ira meliu nggari pokaingguku to nikita ira riara nggatuwuku pade tesa to niepe ira nggari ja'iku.

⁷Jadi aku niwai Alatala ka sangele to nompandasa aku nasimbayu ewa karui to nantosu koroku ala aku ne'e majadi masombo nggari panggita-panggita to nikitaku. Etumo sangele suro nggari ja'i Magau nu Seta to nompandasa aku ala aku ne'e majadi masombo.

⁸Tolungganimo aku nerapi ka i Pue ante mpu'u-mpu'u raraku ala suro nggari ja'i Magau nu Seta etu rapopalai nggari ja'iku.

⁹Tapi nangulimo i Pue ka aku, “Naganamo ane naria towe beloku ri ja'imu, sabana neliu ngganoto kuasaku riara nggatuwumu ane komi nalente.” Jadi etu sampe aku kana mombatoiya kalenteku etu, ala Kristus bate-batena manggalendu aku ante kuasana.

¹⁰Jadi aku kana madamba-damba riara kalenteku. Pade aku wo'u madamba-damba ane aku rauli sinja'i, rapakasusa, rapandasa, bo mpu'u-mpu'u rapakaja'a sabana nomparasaya Kristus. Sabana tempo aku nalente iwetu, aku naroso ante kuasa Kristus.

¹¹Sampesuwu-sampesuwu, aku e'i notesa ewa samba'a todoyo, tapi komimo to nompasu'u aku nowia iwetu! Kakonona komimo to masipato mombatoiya aku, sabana naupa aku e'i nireke samba'a tau to da'a ria gunana, aku da'a ntoto nakura ane rapoposisala ante ira to nireke komi suro-suro to neliu ntoto kata'una.

¹²Sabana tandai-tandai to nompakanoto aku mpu'u-mpu'u samba'a suro i Pue Yesus to nakonona nipowiaku ante nosabara ri tatongo komi. Etumo aku nompowia tandai-tandai to nipogumaa bo kabaraka-kabaraka ri tatongo komi.

¹³Pokarajaaku ri tatongo komi nasimbayu ewa pokarajaaku ri tatongo pura-pura topomparasaya ntanina. Aga sangele posisalana powiaku ri ja'i komi, etumo aku da'a nompakatomo komi mompekiri katuwuku. Naupa powiaku etu da'a nasala, tapi aku merapi ampu ri ja'i komi.

¹⁴We'i-we'i nasadiamo aku momai mantalioda komi katolungganina, pade aku batena nopatuju da'a mompakatomo komi. Sabana to nipodotaku da'a mbara-mbara komi tapi towe komi! Da'a ngana-ngana to masipato mompasiromu kakalumana ka totu'ana, tapi totu'a to masipato mompasiromu kakalumana ka ana-ana ira!

¹⁵Jadi aku kana mombawai ka komi mpengele-ngele to naria ri ja'iku, nau koroku mboto wo'u. Ane aku mpu'u-mpu'u nompotowe komi iwetu, nokuya komi nakura nompotowe aku?

¹⁶Ninjani komi mbotomo aku da'a sanggani nompakatomo komi mompekiri katuwuku. Tapi danaria to nanguli, “Nata'u mpu'u i Paulus. I'a nombaakala kita ala mombarata untu ka korona mboto ante mombabagiu kita!”

¹⁷Iwenumo? Nariamo sanggani komi niakala tau-tau to nipakauku mpaka ri ja'i komi? Naria ira nangelo untu nggari ja'i komi?

¹⁸Aku nompakau i Titus mpaka ri ja'i komi nosanggani-nggani ante sampesuwuta ntanina etu. Nariamo sanggani i Titus nangelo untu ka korona mboto nggari ja'i komi? Natantumo da'a ria! Tapi ninjani komi mbotomo kami romba'a nosaongu rara, pade pokainggu kami ri tatongo komi nasimbayu puramo.

¹⁹Bara nipekiri komi patuju tesa kami e'i aga mebali ri ngayo komi! Tapi sampesuwu-sampesuwu to nipotoweku, etu da'a nakono! Ri ngayo Alatala mbotomo kami notesa ewa tau to nosaongu rara ante Kristus. Pade pura-pura nuapa to nitesa kami patujuna ala mompakaroso pomparasaya komi.

²⁰Sabana nakinimo raraku ane aku momai ri ja'i komi pokainggu komi da'a masimbayu ewa to nipokonoku, pade pokaingguku wo'u ri ja'i komi da'a masimbayu ewa to nipokono komi. Nakinimo raraku ane aku momai ri setu maria komi to mosinggarau, bara maria to masiriati, bara maria to marau rarana bara maria to aga mompekiri korona mboto. Nakinimo raraku maria tau manguli sinja'i bo mompakaja'a roa-roana, bara maria to masombo-sombo bo mompakagado todea topomparasaya.

²¹Nakinimo raraku ne'e-ne'e ane aku sangganipa momai ri ja'i komi, Alatala kana mompakaeya aku ri ngayo komi. Ne'e-ne'e aku mageo ri ngayo komi sabana madea nggari tatongo komi to nasilaka bopia da'apa najea nggari silaka-silaka. Bara maria to danogau sala ante tau da'a rongona mboto bara mowia to da'a ntoto masipato ewa to nabiasa nipowia ira bopia.