Read Da'a Kaili 2 KORINTUS 13 Bible Online

2 KORINTUS 13 - Da'a Kaili bible

2 KORINTUS 13

¹Tolunggani ka e'imo aku momai ri ja'i komi. Riara Buku Nagasa naria nitulisi iwe'i: “Butu-butu tesa pepangadu ri ja'i ntau kana ratakono romba'a atau tolumba'a sabi pade namala rareke nakono.” [15]

²Tempo aku naria ri tatongo komi karongganina bopia nipopatoraku tau-tau to nowia silaka bo komi pura-pura. Pade we'i-we'i naupa aku nosinggakawao ante komi kupopatora bali ka komi iwe'i: ane aku momai ri ja'i komi mana ria ampuku ri ja'i ira to nowia silaka etu.

³Komi madota manggita tandaina to mompakanoto aku mpu'u-mpu'u niposumba Kristus! Jadi etu kana rakita komi! Sabana ane Kristus mangontiaka komi I'a da'a nalente-lente, tapi I'a mpu'u-mpu'u nakuasa ri tatongo komi.

⁴Tempo Kristus nipaku ri kayu parika sampe namate nalentemo I'a. Tapi we'i-we'i I'a batena natuwu ante kuasa nggari ja'i Alatala. Iwetu wo'u kami to nosaongu rara ante I'a. Kami aga manusia to nalentena. Tapi ane mantingayo komi kami kana makuasa nasimbayu ewa Kristus ante kuasa nggari ja'i Alatala.

⁵Sampesuwu-sampesuwu, ujimo koro komi mboto ala manggita ane komi mpu'u-mpu'u natuwu ewa topomparasaya i Pue. Paresamo koro komi mboto. Natantumo Yesus Kristus naria riara nta'i komi? Ane etu da'a nanoto, batuana komi da'a mpu'u-mpu'u topomparasaya i Pue.

⁶Tapi nisarumakaku kana manoto ka komi kami e'i mpu'u-mpu'u suro i Pue to nakonona.

⁷Kami nosambaya ka Alatala ala komi ne'e mowia silaka. Patuju kami mosambaya iwetu da'a ala mompakanoto kami e'i mpu'u-mpu'u suro i Pue to nakonona. Tapi patuju kami ala komi batena mowia to nanoana. Jadi ane kami rareke ntau da'a suro i Pue to nakonona, da'a ria mokuya!

⁸Sabana kami da'a namala mompowia sangele to mangewa to nakonona. Tapi kami aga mompowia to nakonona.

⁹Nadamba mpu'u rara kami ane kami nalente bo komi naroso. Jadi kami bate-batena mosambaya ala pokainggu komi majadi mabelo pura.

¹⁰Etu sampe aku nantulisi tesa-tesa e'i ka komi tempo kita nosinggakawao. Patujuku ala ane aku momai ri ja'i komi ri setu da'a paraluu aku motesa mako'o mompakabelo pokainggu komi ante kuasa to niwai i Pue ka aku. Sabana kuasa etu niwaina ka aku ala mompakaroso komi da'a ala mombagero komi.

¹¹Jadi sampesuwu-sampesuwuku, pakadambamo rara komi. Pasimbukumo mompakabelo pokainggu komi. Tarimamo pepatudukiku e'i! Komi kana matuwu ante mosaongu pekiri bo mosaongu rara, pade mosinggabelo samba'a bo samba'a. Pade Alatala, pu'u nu towe bo katuwua nabelo kana mosanggani-nggani ante komi.

¹²Posipakasampemo tabe samba'a bo samba'a ante towe. Pade tarimamo tabe nggari ja'i pura-pura topomparasaya ri se'i.

¹³Perapi Pue Yesus Kristus mombagane komi. Perapi Pue Alatala mompotowe komi, pade perapi Nosa Nagasa nu Alatala mosanggani-nggani ante komi pura-pura. Tabe nggari ja'iku, Paulus