Read Da'a Kaili 2 KORINTUS 2 Bible Online

2 KORINTUS 2 - Da'a Kaili bible

2 KORINTUS 2

¹Sabana etu nipakatantukumo riara nta'iku iwe'i: agina aku mana malau mantalioda komi ane etu aga mompakasusa rara komi ewa to najadi bopia.

²Sabana ane aku mompakasusa rara komi isemapa to mamala mompakawoe raraku? Natantu da'a ria ntanina, aga komi to nipakasusaku!

³Pade etumo patujuku nantulisi sura etu ka komi bopia, ala ane aku momai ri ja'i komi ne'e aku rapakasusa komi to masipato mompakadamba raraku. Niparasayaku ane aku madamba komi wo'u madamba-damba.

⁴Tempo aku nantulisi sura etu ka komi aku mpu'u-mpu'u nasusa bo nagero raraku, pade aku nadea nggani nageo nakanjodu-njodu. Patujuku nantulisi sura etu da'a ala mompakasusa rara komi, tapi ala komi mamala mangginjani kabete nu toweku ri ja'i komi pura-pura.

⁵Tau to nompakasusa rara etu da'a nompakasusa raraku, tapi i'a nompakasusa rara komi pura-pura, atau ala ne'e mako'o gaga tesaku agina aku manguli, i'a nompakasusa rara sabagia nggari komi.

⁶Tapi we'i-we'i kuuli ka komi, naganamo pesuku to nipawela todea topomparasaya ka tau etu.

⁷We'i-we'i komi kana mombaampungi i'a bo mompakawoe rarana ala ne'e i'a masusa gaga sampe maopu rarana.

⁸Jadi kuperapi ka komi, popokita wo'umo ka i'a towe komi.

⁹Patujuku nantulisi sura etu ka komi bopia ala mombauji komi. Aku nadota manggita ane komi bate-batena masadia mantuki pura-pura parenta nggari ja'iku.

¹⁰Jadi naganamo we'i-we'i. Ane tau etu naopu niampungi komi pura-pura, i'a wo'u niampungikumo. Pade nuapa to niampungiku--ane mpu'u-mpu'u naria sala to masipato kuampungi--etu niampungiku riara mpanggita Kristus ala komi pura-pura mamala mosinggabelo bali.

¹¹Tau etu niampungikumo ala ne'e sampe kita raakala Magau nu Seta, sabana ninjanita mamimo akalana mombabagiu kita.

¹²Tempo aku narata ri ngata Troas ala mompatolele Kareba Belo Kristus, Pue nombabuka jala ka aku mokarajaa ri setu.

¹³Tapi nakini mpu'umo raraku sabana aku da'a nosirata ka sampesuwuta i Titus ri setu. Sabana etu nopasabimo aku ri ja'i tau-tau to Troas, pade napolamo aku mpaka ri Propinsi Makedonia.

¹⁴Tapi nosukuru mpu'u ka Alatala! Nggari I'amo kami najadi padagi sabana nosaongu rara ante Kristus. I'a nantulungi kami nompatolele Kareba Belo sampe pura-pura tau mamala mosinjani ante I'a. Kareba etu natolele mpaka ri umba-umba nasimbayu ewa soa nawongi mpu'u natienga ri umba-umba.

¹⁵Sabana riara mpanggita Alatala kami nireke nasimbayu ewa soa dupa to nienga ntau pura-pura, nabeloka ira to rapakasalama, nabeloka ira to rasuku sampe ri kasae-saena.

¹⁶Nantuki ira to rasuku sampe ri kasae-saena kami e'i nireke ewa soa ntomate, tandaina ira kana rasuku. Tapi nantuki ira to rapakasalama kami nireke ewa soa nawongi mpu'u, tandaina ira kana matuwu mabelo. Isema to nompakule mantui bago ewa etu? Natantu nantuki pompakuleta mboto da'a ria samba'a!

¹⁷Tapi kami e'i da'a nasimbayu ewa nadea tau ntanina to nompatolele Tesa nu Alatala ala mangelo untu ka koro ira mboto. Patuju kami nagasa sabana kami tau to nisuro Alatala mompatolele Tesana ante kuasa nggari ja'i Kristus. Pade Alatala mboto nanggita powia kami etu.