Read Da'a Kaili 2 KORINTUS 3 Bible Online

2 KORINTUS 3 - Da'a Kaili bible

2 KORINTUS 3

¹Bara maria to mompekiri kami nompamula wo'u mombatoiya koro kami mboto. Atau bara rapekiri ira kami wo'u nomparaluu sura ka komi bara nggari ja'i komi to nombatoiya kami ewa to nikeni tau-tau ntanina etu. Tapi etu da'a ntoto niparaluu kami!

²Sabana komi mbotomo najadi ewa sura to nombatoiya kami to nitulisi riara nta'i kami to namala rabasa bo ranjani pura-pura tau.

³Nggari pokainggu komi nanotomo ka ira asele mpobago kami nanggeni tesa Kristus ka komi. Namala rauli komi nasimbayu ewa sura to nombatoiya kami to nitulisi Kristus mboto. Sura etu da'a nitulisi ante pena bo tinta, pade da'a wo'u nitulisi ri watu mpotulisi. [1] Tapi sura etu nitulisi Nosa Nagasa nu Alatala to natuwuna riara nta'i manusia.

⁴Kami nabia nanguli iwetu riara mpanggita Alatala sabana naria kuasa Kristus riara nggatuwu kami.

⁵Da'a namala kami manguli pompakule mantui bago etu nggari ja'i kami mboto. Tapi pompakule kami nggari ja'i Alatala.

⁶I'amo to nombawai ka kami pompakule mompatuduki ka tau pojanjina to nabou. Pojanji nabou etu da'a nopu'u nggari atura-atura to nitulisi, tapi nopu'u nggari ja'i Nosa Nagasa nu Alatala. Sabana atura-atura to nitulisi aga nompakanoto tau nasilaka kana mamate, tapi Nosa Nagasa nu Alatala mombawai katuwua mabelo.

⁷Tempo pojanji nggasae to nompakanoto tau nasilaka kana mamate nipowia bo nitulisi ri watu mpotulisi, [2] reme nggari ja'i Alatala nombawanta i Musa sampe nareme mpu'umo lenjena. [3] Tau-tau to Israel da'a nompakule nompenaa lenje i Musa naupa reme etu nompamula nalipo tempo etu. Jadi ane iwetumo reme bo kagaya nu Alatala to nipopokita tempo pojanji nggasae nipowia,

⁸natantumo neliu nggabelo pojanji nabou to nipowia Nosa Nagasa nu Alatala.

⁹Ane pojanji nggasae to nompakatantu manusia nasilaka kana rasuku niwai ante tandai-tandai bo reme to nipogumaa, natantumo neliu nggabelo pojanji nabou to nompakatantu iwenu manusia mamala majadi manoa riara mpanggita Alatala.

¹⁰Kakonona namala rauli pojanji nggasae to niwai ante tandai reme bo kagaya to nipogumaa etu mana ria kuasana ane rapoposisala ante pojanji to nabou to neliu nggabelo.

¹¹Ane pojanji nggasae to da'a nasae nalaku etu nireke nakuasa bo nabelo, natantumo neliu nggakuasa bo neliu nggabelo pojanji nabou to nalaku sampe ri kasae-saena.

¹²Kami nanjarumaka pojanji Alatala to nabou etu. Jadi etu sampe kami nabia mpu'u motesa ka komi ante nanoto.

¹³Kami da'a nasimbayu ewa i Musa nggaolu to nombasalibumbu lenjena ala tau-tau to Israel da'a manggita reme i Pue malipo nggari lenjena.

¹⁴Kakonona pekiri iramo to natitutu, sabana sampe we'i-we'i tempo ira nombabasa pojanji nggasae etu riara buku-buku i Musa, pompekiri ira ewa nisalibumbu. Sabana pekiri manusia to natitutu iwetu aga namala rabuka ane tau nosaongu rara ante Kristus.

¹⁵Sampe we'i-we'i butu nggani ira nombabasa buku-buku i Musa, ewa pekiri ira danisalibumbu.

¹⁶Tapi ane samba'a tau majea pade mantuki i Pue, posalibumbu etu kana rabuka.

¹⁷To nipatuju ante Pue ri se'i etumo Nosa Nagasa nu Alatala. Pade ane Nosa Nagasa nu Alatala naria ri ja'ita, kita mpu'u-mpu'u nakabasaka nggari pura-pura nuapa to nompopoga'a kita nggari ja'i Pue.

¹⁸We'i-we'i lenjeta da'a nisalibumbu ewa lenje i Musa nggaolu. Kita mompopokita kuasa bo kareme i Pue riara nggatuwuta. Mantambai eona kita mantambai mabali majadi nasimbayu ewa i Pue mboto. Pade kabalina etu majadi nggari kuasa Nosa Nagasa i Pue.