Read Da'a Kaili 2 KORINTUS 4 Bible Online

2 KORINTUS 4 - Da'a Kaili bible

2 KORINTUS 4

¹Bago to nitui kami e'i niparasaya Alatala ka kami nggari asi matana mboto. Jadi etu sampe kami da'a naopu rara mantui bago e'i.

²Kami nanggabasaka pura-pura pokainggu narumau to nompakaeya. Kami da'a nombabagiu tau bo kami da'a nompakadenggo Tesa nu Alatala ante mombagalo pepatuduki ntanina to nasalana. Tapi kami nompatolele Tesa nu Alatala to nakonona ante nanoto. Ante iwetu kami mompopokita ka pura-pura tau kami mpu'u-mpu'u tau to nanoa riara mpanggita Alatala.

³Ane Kareba Belo to nipatolele kami nireke nagawu, etu nagawu ka tau-tau to rasuku sampe ri kasae-saena banepia sabana da'a nomparasaya.

⁴Magau nu Seta to nombabagiu manusia ri dunia e'i nompakaburo pekiri tau-tau da'a nomparasaya ala ira ne'e manggita reme nu Kareba Belo. Kareba Belo etu nompakanoto kuasa bo kagaya nu Kristus to nasimbayu ntoto ante Alatala.

⁵Kareba to nipatolele kami etu da'a kareba to nantesa koro kami mboto. Tapi kareba etu nompakanoto ka komi Yesus Kristusmo Pue pade kami e'i najadi batua komi nantuki dota i Pue Yesus.

⁶Tempo Alatala nompajadi langi bo dunia I'a nanguli, “Nggari karumauna kana meumba reme.” [4] Pade I'a wo'u nompakareme rara nta'ita ala pekirita majadi manoto. Ante iwetu kita mamala mangginjani kuasa bo kagaya nu Alatala to natikita ri lenje Kristus.

⁷Tapi kuasa bo kagaya etu niboli Alatala riara koro kami manusia biasa to nasimbayu ewa kura tana. Ante iwetu nanotomo kuasa to neliu-liuna etu nggari ja'i Alatala da'a nggari ja'i kami mboto.

⁸Kami bate-batena nitiku ntau ri umba-umba tapi kami da'a nidagi. Kami naoso naingu tapi kami da'a naopu rara.

⁹Kami bate-batena nipandasa ntau tapi kami da'a sanggani nipalasi Alatala. Kami naoso niboba sampe nadungga tapi kami da'a namate.

¹⁰Koro kami bate-batena nombarasai kasusa bo kapari ewa to nirasai i Pue Yesus tempo I'a nipatesi. Etu najadi ala kuasa nggari katuwu Yesus manoto rakita riara nggatuwu kami.

¹¹Sabana kami to natuwu bate-batena nantingayo kamatea sabana nomparasaya i Pue Yesus, ala kuasa nggari katuwu Yesus manoto rakita riara nggatuwu kami to mamala mamate.

¹²Jadi ante iwetu kami bate-batena mantingayo kamatea tapi etu manggeni komi mombarata katuwua mabelo sampe ri kasae-saena.

¹³Riara Buku Nagasa naria nitulisi iwe'i: “Aku nomparasaya, pade etu sampe aku notesa.” [5] Nasimbayu ewa etu kami wo'u nomparasaya sampe kami notesa.

¹⁴Niparasaya kami Alatala to nompakatuwu bali i Pue Yesus nggari kamatena kana mompakatuwu bali kami wo'u nasimbayu ewa I'a. Pade niparasaya kami I'a kana manggeni kami nosanggani-nggani ante komi mpaka ri ja'ina mboto.

¹⁵Pura-pura to nirasai kami etu najadi ala manggeni belo ka komi ala mantambai kadea ntau to mombarasai towe belo nu Alatala. Ante iwetu mantambai kadea ntau to mosukuru ka Alatala, sampe I'a mpu'u-mpu'u ratoiya bo rabila.

¹⁶Jadi etu sampe kami da'a naopu rara. Naupa koro kami mantambai eona mantambai malente, rara nta'i kami mantambai eona mantambai maroso.

¹⁷Kasusa to nanga'a to nirasai kami sampalai kana manggeni kami mantarima rasi bo belo sampe ri kasae-saena to neliu nggabete nggari kasusa etu.

¹⁸Jadi kami da'a nompekiri kasusa bo kapari to namala nikita ri dunia e'i, tapi kami nompekiri kabelona to da'apa namala nikita to nipakasadia ka kami. Sabana to namala nikita ri dunia e'i aga sampalai, tapi kabelona to da'apa namala nikita etu maroo sampe ri kasae-saena.