Read Da'a Kaili 2 KORINTUS 5 Bible Online

2 KORINTUS 5 - Da'a Kaili bible

2 KORINTUS 5

¹Sampesuwu-sampesuwu, ninjanita ane mageromo “tenda” to nipeto'ota ri dunia e'i, etumo koro batata, Alatala kana mombawai ka kita saongu “sapo” ri suruga, etumo koro nabou to da'a nipowia manusia to maroo sampe ri kasae-saena.

²Tapi tempo kita danatuwu ri dunia e'i kita nekakai ante nalentora rara ala mombarata koro nabou nggari suruga etu.

³Sabana ante iwetu kita batena maria koro.

⁴Tempo kita danatuwu ri dunia e'i nasusa rarata sabana natomo katuwuta. Da'a patujuta mamate bo mombawonju korota e'i, tapi kita madota rawai ka koro nabou nggari suruga etu ala korota to mamala mamate rasambei ante koro to matuwu sampe ri kasae-saena.

⁵Alatala mbotomo to nompakasadia kita ala mantarima etu pura-pura, pade niwaina ka kita Nosana to Nagasa ewa panjokota to nompakatantu nuapa to nijanjina etu kana majadi.

⁶Jadi etu sampe kami bate-batena naroso rara. Ninjani kami ane kami danatuwu ri dunia e'i kami da'apa nosanggani-nggani ante i Pue ri suruga.

⁷Pade kami natuwu ri dunia e'i ante nomparasaya Kristus, da'a sabana nanggita I'a.

⁸Jadi ewa niuliku ri ba'ana narosomo rara kami. Kakonona to nipokono kami ala mompalasi koro kami e'i pade malau meto'o mpasanggani-nggani ante i Pue.

⁹Jadi etu sampe kami tunggai mompasimbuku mompakadamba rarana, nabeloka ane kami danatuwu ri dunia e'i, nabeloka ane kami mompalasi dunia e'i.

¹⁰Sabana kita pura-pura kana mantingayo Kristus banepia ala ratangarana. Pade maopu ratangarana samba'a bo samba'a, kita kana mombarata tambo nantuki to masipato ante powiata tempo kita natuwu ri dunia e'i, bara powia nabelo atau powia naja'a.

¹¹Ninjani kami nuapa batuana maeka ri ja'i Pue. Jadi etumo sabana kami tunggai mompasimbuku manggeni tau momparasaya i Pue Yesus. Nanotomo ka Alatala pokainggu kami nanoa. Pade nisarumakaku etu nanoto wo'u ka komi pura-pura.

¹²Ante tesa e'i kami da'a mompasimbuku mombatoiya wo'umo koro kami mboto ka komi. Tapi kami aga mompakanoto ka komi sangele pokainggu kami to nabelo, ala komi mamala mombatoiya kami ri ngayo tau-tau to nangewa kami ri setu. Sabana ira aga nombatoiya tau nantuki to namala nikita, da'a nantuki inggu rara nta'ina.

¹³Ane kami noinggu nagila ewa to niuli ntau, toramo, kami noinggu iwetu ala Alatala rabila bo ratoiya. Pade ane kami noinggu nanoto etu ala manggeni belo ka komi.

¹⁴Kami noinggu iwetu sabana towe Kristus nombakuasai kami. Niparasaya kami iwe'i: ane samba'a tau namate nanjaliku kita, etu batuana kita pura-pura ewa namate.

¹⁵Pade Kristus mpu'u-mpu'u namate manjaliku kita pura-pura. Patuju nu kamatena etu ala kita to danatuwu ri dunia e'i mana matuwu mantuki dotata mboto tapi ala kita matuwu mantuki dota Kristus to namate nanjaliku kita pade to nipakatuwu bali.

¹⁶Jadi etumo sabana nompamula we'i-we'i kami mana mompekiri tau nantuki panggita manusia. Naupa bopia kami nompekiri Kristus nantuki panggita manusia, we'i-we'i kami mana mompekiri iwetu.

¹⁷Jadi tau to nosaongu rara ante Kristus najadi manusia nabou. Katuwuna nokolu naliumo pade pura-pura katuwuna najadi nabou.

¹⁸Etu pura-pura nggari ja'i Alatala. I'a nompakau Kristus marata ri dunia ala mompoposinggabelo bali kita ante I'a. Pade niparasayana ka kami bago mompatolele ka tau-tau ntanina ira wo'u mamala mosinggabelo bali ante I'a.

¹⁹To nipatuju kami iwe'i: nggari kamate Kristus Alatala nompoposinggabelo bali manusia ante I'a. Mana nirekena silaka-silaka ira. Pade niparasayana ka kami bago mompatolele Tesana to nompakanoto iwenu manusia mamala mosinggabelo bali ante I'a.

²⁰Jadi kami e'i tau-tau to nisuro Kristus. Ewa kami niposumba Alatala merapi ala komi mosinggabelo bali ante I'a. Jadi riara sanga Kristus kami merapi ka komi, waimo koro komi rapoposinggabelo bali ante Alatala.

²¹Kristus da'a ntoto nasilaka. Tapi I'a nipowia Alatala posompo silaka manjaliku kita ala kita mamala majadi manoa riara mpanggita Alatala ante mosaongu rara ante Kristus.