Read Da'a Kaili 2 KORINTUS 6 Bible Online

2 KORINTUS 6 - Da'a Kaili bible

2 KORINTUS 6

¹Jadi sampesuwu-sampesuwu, ewa roa sampokarajaa ante Alatala, kami merapi ka komi ante mpu'u-mpu'u rara, ne'e sampe towe belo nu Alatala to nitarima komi da'a ria aselena riara nggatuwu komi.

²Sabana naria Tesa nu Alatala iwe'i: “Ri tempo to nipakatantuku Aku nangepe komi. Pade Aku nantulungi komi ri eo to nipakatantuku mompakasalama manusia.” [6] Toramo mpakabelo-belo! We'i-we'imo tempona to nipakatantu Alatala etu! We'i-we'imo eo to nipakatantuna mompakasalama manusia!

³Kami da'a madota ala bago kami ewa topompatolele Kareba Belo rapakasala ntau. Jadi etumo sabana kami nompasimbuku matuwu ante pokainggu to da'a nompakaju'a rara ntau.

⁴Nau nuapa-nuapa majadi kami bate-batena noinggu nabelo ala manoto kami mpu'u-mpu'u batua nu Alatala. Naupa kami nipandasa, nipakasusa, pade niwala ntiku kasusana kami batena nanta'amaka.

⁵Kami niboba bo nisuaraka riara tarunggu. Kami nipandasa todea to nagado, kami nokarajaa ntomo, kami nabiasa da'a noturu bo kami nabiasa nakura panggoni.

⁶Ante pokainggu to nagasa, nanoto, nosabara bo nabelo kami nompopokita ka tau kami mpu'u-mpu'u batua nu Alatala. Naria pompakule nggari ja'i Nosa Nagasa nu Alatala riara nggatuwu kami, pade kami nompotowe tau-tau ntanina ante mpu'u-mpu'u rara.

⁷Nanotomo kami batua nu Alatala sabana kami nompatolele pepatuduki to nakonona, pade kuasa Alatala mboto nosanggani-nggani ante kami. Kami bate-batena noinggu nanoa. Pade pokainggu to nanoa etumo najadi ewa parewa mposibali kami ala meewa bo mebali.

⁸Kami nibila ntau, tapi nisalai tau ntanina. Kami nitoiya ntau, tapi niuli sinja'i tau ntanina. Kami nireke topebagiu, tapi kakonona kami aga notesa to nakonona.

⁹Kami nireke tau da'a ria gunana, tapi kami ninjani ntau pura-puramo. Kami nadea nggani ntora namate, tapi kitamo, kami bate-batena natuwu. Kami naoso nipandasa ntau tapi kami da'a namate.

¹⁰Kami naoso nipakasusa rara, tapi kami da'a nenonto nosukuru. Kami nakasiasi, tapi kami bate-batena nompakasugi nadea tau ntanina. Ane rakita ewa da'a ria nuapa-nuapa ri ja'i kami, tapi kakonona mpengele-ngele naria ri ja'i kami.

¹¹Sampesuwu-sampesuwu ri Korintus, kami notesa nombasuwuraka isi rara nta'i kami pura-pura ka komi. Natebukamo rara kami ri ja'i komi.

¹²Kami da'a nantabuniaka towe kami ka komi, tapi komi nantabuniaka towe komi ka kami.

¹³Kutesa ka komi ewa ka ana-anaku mboto, bukamo rara komi ri ja'iku nasimbayu ewa aku nombabuka raraku ri ja'i komi!

¹⁴Ne'e komi mosiala patuju ante tau-tau da'a nomparasaya i Pue Yesus. Iwenumo? Masipato tau to nanoana mosiala patuju ante tau to nadenggona? Masipato reme mosigalo ante karumauna?

¹⁵Masipato Kristus mosimporoa ante Magau nu Seta? Masipato topomparasaya masintuwu ante tau da'a nomparasaya?

¹⁶Masipato kita mepue ka pue-pue ntanina riara Sapo Mpepue? Natantumo pura-pura etu da'a ntoto masipato! Toramo! Kitamo to najadi ewa Sapo Mpepue nu Alatala to natuwuna. Ewa to niuli Alatala mboto iwe'i: “Aku kana meto'o ri tatongo ira. Aku kana maroo mosanggani-nggani ante ira. Aku kana majadi Alatala ira pade ira majadi todeaku.” [7]

¹⁷“Sabana etu pesuwumo komi nggari tatongo ira pade poga'amo komi nggari ja'i ira. Ne'e manggabe anu to natantoru riara mpanggitaku, pade Aku kana mantarima komi ri ja'iku.” [8]

¹⁸“Aku kana majadi Umamu pade komi kana majadi ana-anaku. Iwetumo panguli i Pue to Neliu Nggakuasa.” [9]