Read Da'a Kaili 2 KORINTUS 7 Bible Online

2 KORINTUS 7 - Da'a Kaili bible

2 KORINTUS 7

¹Sampesuwu-sampesuwu to nipotoweku, pojanji-pojanji etu nipawela ka kita. Jadi kamaimo kita mompakagasa korota nggari pura-pura nuapa to nompakatantoru koro bo pekiri rara nta'ita. Pade kamaimo kita mantambai eona mantambai magasa pokaingguta ante matuwu maeka ri ja'i Alatala.

²Sampesuwu-sampesuwu, bukamo rara komi ri ja'i kami! Da'a ria sanggani kami nompowia sala ri ja'i komi nau aga samba'a. Da'a ria sanggani kami nompakasalanjala komi. Da'a ria sanggani kami nombabagiu komi ala mompakauntu koro kami mboto.

³Aku da'a nanguli iwetu ala mompakasala komi, sabana ewa to niuliku ri ba'ana kami mpu'u-mpu'u nompotowe komi! Matuwu atau mamate kami tunggai mompotowe komi!

⁴Da'a nakaja rara kami notesa ka komi ante nanoto iwetu. Nasana mpu'umo raraku nantora komi. Naupa aku nombarasai kasusa bo kapari, da'a ria kaopu-opuna kadamba nu raraku.

⁵Tempo kami narata ri Propinsi Makedonia kasusa kami da'a ria kaopu-opuna, tapi kami nipandasa nggari umba-umba. Nggari tau-tau ntanina naria to nombabali kami, pade riara nta'i kami mboto naria eka rara.

⁶Tapi Alatala nompakaroso rara tau-tau to naopu rarana, pade I'a nompakaroso rara kami wo'u ante karata i Titus.

⁷Da'a aga karata i Titus to nompakaroso rara kami, tapi pantesana wo'u to nantesa iwenu i'a nipakaroso rara tempo i'a naria ri tatongo komi. Pade nitesana wo'u ka kami ewa kalentora rara komi manggita aku pade ewa kasusa rara komi nantora pokainggu komi bopia. Pade niulina komi mpu'u-mpu'u madota manjaliku aku ri ngayo tau-tau to nangewa aku. Jadi nangepe tesa i Titus etu nantambaimo kadamba nu raraku.

⁸Naupa isi suraku bopia nompakasusa rara komi da'a nanjoso raraku nantulisi sura etu. Kakonona nanjosomo raraku bopia sabana nikitaku suraku etu nompakasusa rara komi. Tapi kasusa rara komi etu aga sampalai.

⁹We'i-we'i nadambamo raraku, da'a sabana komi nipakasusa rara, tapi sabana kasusa rara komi etu nanggeni komi najea nggari pokainggu komi to nasala. Kasusa nu rara komi etu nipake Alatala manggeni komi majea. Jadi komi da'a nipakarugi ante sura kami etu.

¹⁰Sabana kasusa rara nggari ja'i Alatala ewa etu nanggeni tau majea nggari silaka sampe ira mamala rapakasalama. Pade da'a ria samba'a tau manjoso rarana ane etu majadi. Tapi kasusa rara to nirasai ntau to da'a nomparasaya Alatala aga manggeni ira mamate pade rapopoga'a nggari ja'i Alatala.

¹¹Kitamo nuapa to najadi ante kasusa rara nggari ja'i Alatala to nirasai komi etu. Komi mpu'u-mpu'u madota mowia to nanoana. Komi mpu'u-mpu'u nompasimbuku mompakanoto pokainggu komi nakono. Naraumo komi mompekiri silaka to nipowia roa komi etu. Naekamo rara komi. Nalentoramo rara komi manggita aku. Naraji mpu'umo komi nompowia to niparentaku etu. Nasadiamo komi nombasuku tau to nasala etu. Riara mpengele-ngele komi nompopokita komi da'a nasala riara parakara etu bopia.

¹²Jadi naupa aku nantulisi sura to nompakasusa rara komi etu, da'a patujuku ala mompakasala tau to nowia sala atau manjaliku tau to nipakaja'a tau nasala etu. Patujuku nantulisi sura etu ala riara mpanggita Alatala manoto ka komi iwenu kakonona kabete nu towe komi ri ja'i kami.

¹³Jadi nangepe asele sura kami etu rara kami nipakaroso. Pade kami da'a aga nipakaroso rara tapi kami wo'u nipakadamba mpu'umo nanggita kadamba nu rara i Titus. Sabana tempo i'a nantalioda komi ri ngata Korintus i'a mpu'u-mpu'u nipakasana rara.

¹⁴Da'apa i'a nalau nantalioda komi aku nombatoiya komi ka i'a. Pade pokainggu komi to nikitana da'a nompakaeya aku. Nasimbayu ewa pura-pura tesa kami ka komi batena nakono, iwetu wo'u tesa kami nombatoiya komi ka i Titus etu wo'u nakono.

¹⁵Pade towe i Titus ri ja'i komi nantambai kabetena tempo i'a nantora iwenu komi pura-pura natundu ri ja'ina, pade iwenu komi nantarima i'a ante nombabila i'a bo nekou ri ja'ina.

¹⁶Nadamba mpu'u raraku sabana komi namala niparasaya riara mpengele-ngele.