Read Da'a Kaili 2 KORINTUS 8 Bible Online

2 KORINTUS 8 - Da'a Kaili bible

2 KORINTUS 8

¹Sampesuwu-sampesuwu, kami madota mompakanoto ka komi nuapa to najadi nggari towe belo nu Alatala ri tatongo todea topomparasaya ri Propinsi Makedonia.

²Ira mpu'u-mpu'u nipandasa ante pesoba-pesoba to natomo mpu'u. Tapi ri tatongo pesoba etu kadamba nu rara ira nantambai kadeana sampe ira nombawai ante najoi mpu'u rara ka tau-tau ntanina, naupa ira mboto nakasiasi mpu'u.

³Ira da'a aga nombawai nantuki pompakule ira, tapi ira nombawai neliu nggari pompakule ira. Etu nikitaku mboto!

⁴Nggari dota ira mboto ira nerapi ante mpu'u-mpu'u rara ka aku ala ira wo'u mamala rawai loga masintuwu ante tau-tau ntanina mantulungi topomparasaya-topomparasaya to nakasiasi.

⁵To niwai ira neliu mpu'u nggari to nisarumaka kami. Pamulana ira nombajuju koro ira mboto ka i Pue pade wo'u ka kami nantuki dota Alatala.

⁶Jadi etu sampe kami nerapi ka i Titus ala i'a mompapola bago to nabelona mompasiromu doi petulungi to nipamulana ri tatongo komi bopia.

⁷Komimo to neliu nggabelo riara mpengele-ngele. Pomparasaya komi mpu'u-mpu'u naroso. Komi niwai ka pompakule motesa-tesa bo mompasimbayu pangginjani nggari ja'i Pue. Nabete mpu'u rara komi mantulungi tau ntanina. Pade nabete mpu'u towe komi ri ja'i kami. Sabana etu masipato wo'u komi meliu nggabelo mompajala bago mompasiromu doi petulungi etu.

⁸Tesaku ka komi etu da'a parenta. Tapi patujuku mompopanjani ka komi nuapa to nipowia tau ntanina mantulungi roana ala manggita sampe ri umba towe komi.

⁹Sabana ninjani komi mboto kabete nu towe belo Pueta Yesus Kristus. Naupa I'a mpu'u-mpu'u nakalumana I'a najadi nakasiasi mpu'u ala mantulungi komi. I'a nipakakasiasi mpu'u ala komi mamala rapakakalumana.

¹⁰Jadi iwe'imo pombarataku ewa kasiromu doi petulungi etu. Mpae naliu komimo tau-tau pamulana to nadota mompasiromu doi petulungi etu, pade komi wo'u tau-tau pamulana to nompamula nompasiromu doi etu.

¹¹Jadi we'i-we'i papolamo bago etu sampe maopu ala karaji komi mompakaopu bago etu masimbayu ante kabete nu rara komi nompamula bago etu bopia. Waimo nantuki pompakule komi samba'a bo samba'a.

¹²Sabana ane komi mombawai ante kamomi nu rara nantuki nuapa to naria ri ja'imu, pewaimu etu kana rakonoa rara Alatala. I'a da'a manjaru maka pewai to meliu pompakulemu.

¹³Da'a ntoto patujuku ala tau-tau ntanina ratulungi pade komi rapakatomo, tapi patujuku ala maria kasimbayuna riara nggatuwu komi.

¹⁴We'i-we'i komi nompakule mantulungi ira ante labina to naria ri ja'i komi. Pade tempo banepia ira wo'u mamala mantulungi komi nggari labi to maria ri ja'i ira. Ane iwetu maria kasimbayuna.

¹⁵Ewa to nitulisi riara Buku Nagasa iwe'i: “Tau to nompasiromu nadea, da'a ria pelabina, pade tau to nompasiromu sakedi da'a ria kakurana.” [10]

¹⁶Kami nosukuru ri ja'i Pue Alatala sabana I'a nompakabete rara i Titus mompekiri kabelo komi nasimbayu ewa pompekiriku mboto.

¹⁷Nanotomo etu sabana i Titus nompoiyo pomperapi kami mompapola mombaurusi kasiromu doi petulungi etu. Pade da'a aga etu, tapi nabete mpu'umo rarana mantulungi komi sampe i'a mboto nompakatantu kana malau mpaka ri ja'i komi.

¹⁸Pade kami nompakau samba'a sampesuwuta ntanina mantuki i Titus riara mpolumakona. I'a tau to mpu'u-mpu'u nibila pura-pura topomparasaya sabana pokarajaana mompatolele Kareba Belo.

¹⁹Da'a aga etu, tapi i'a wo'u nipelisi ntodea topomparasaya momporoa kami riara mpolumako kami manggeni doi petulungi etu. Kami nokarajaa mompasiromu doi petulungi etu ala i Pue rabila bo ratoiya ntau, pade ala mompopokita kabete nu rara kami mantulungi tau nakasiasi.

²⁰Patuju kami nompakau sampesuwuta etu mpasanggani-nggani ante i Titus ala ne'e maria tau manjalaraka akala kami mombaurusi pewai to nadea etu.

²¹Sabana kami madota mompowia to nanoana, nabeloka riara mpanggita Alatala, nabeloka riara mpanggita manusia.

²²Nosanggani-nggani ante i Titus bo sampesuwuta ntanina etu, nipakau kami wo'umo samba'apa, etumo sampesuwuta to nadea ngganimo nompopokita ka kami kabete nu rarana mantulungi tau ntanina. Pade we'i-we'i nantambaimo kabete nu rarana mantulungi mombaurusi kasiromu doi petulungi etu, sabana i'a mpu'u-mpu'u nanjarumaka komi.

²³Ane i Titus, i'a roaku sampokarajaa mantulungi komi. Pade romba'a sampesuwuta ntanina to mantuki i'a etu, ira tau to nisuro ntodea topomparasaya. Nggari katuwu ira nadea mpu'u tau nombabila bo nombatoiya Kristus.

²⁴Jadi kuperapi ka komi, popokitamo towe komi ka ira ala manoto ka pura-pura topomparasaya komi mpu'u-mpu'u nompotowe ira, pade ala manoto tesa-tesa kami nombatoiya komi ka ira bopia mpu'u-mpu'u nakono.