Read Da'a Kaili 2 KORINTUS 9 Bible Online

2 KORINTUS 9 - Da'a Kaili bible

2 KORINTUS 9

¹Kakonona da'a paraluu aku mantulisi ka komi ewa doi petulungi ka topomparasaya to nakasiasi ri Bagia Yudea.

²Sabana ninjaniku nabete mpu'umo rara komi mantulungi ira. Aku nantoiya komi ri ja'i to Makedonia. Niuliku ka ira, “Nasadiamo topomparasaya ri Propinsi Akhaya [11] mombawai petulungi, nompamula nggari mpae naliu.” Nangepe tesa ewa kabete rara komi madota mantulungi iwetu sabagia bete nggari ja'i ira wo'u naria dota rara mantulungi.

³Tapi naupa iwetu nipekiriku nabelopa ane aku mompakau i Titus ante roana etu ka komi mantulungi mompakasadia doi petulungi komi. Ante iwetu mpu'u-mpu'u masadia petulungi komi tempo aku marata ewa to nitesaku ka tau-tau to Makedonia. Ne'e-ne'e tesa-tesaku nombatoiya komi etu aga tesa bayangi!

⁴Sabana ane petulungi komi da'apa nasadia tempo aku marata mpasanggani-nggani ante to Makedonia, natantumo maeya mpu'u mataku, ne'epa rauli komi. Sabana niuliku ka ira komi mpu'u-mpu'u nasadia mantulungi.

⁵Jadi etu sampe nipekiriku paraluu aku merapi ka roa-roa etu ala mokolu ka aku mpaka ri ja'i komi mantulungi mompakasadia petulungi to nijanji komi bopia. Nipowiaku iwetu ala petulungi komi etu masadia tempo kami marata. Ante iwetu kana manoto petulungi komi etu niwai ante najoi rara da'a sabana nipasu'u.

⁶Pariara nta'imo tesaku e'i: Tau to nombatuja sakedi, sakedi wo'u aselena. Pade tau to nombatuja nadea kana madea wo'u aselena.

⁷Butu mba'a tau kana mombawai nantuki to nipakatantu riara nta'ina mboto. Ne'e i'a mombawai ante nakaja rara atau ante nipasu'u. Sabana Alatala nompotowe tau to nombawai ante nadamba rarana.

⁸Pade Alatala nakuasa mantambai rasi ka komi to nadea-deana sampe komi bate-batena rapakagana riara mpengele-ngele. Ante iwetu komi mamala mompowia mpengele-ngele powia to nabelona mantulungi tau-tau ntanina.

⁹Riara Buku Nagasa naria nitulisi iwe'i: “I'a nompalele rasi ka tau-tau nakasiasi. Kanoa nu rarana naroo sampe ri kasae-saena.” [12]

¹⁰Alatala nombawai sawua ka toposawu, pade niwaina panggoni rakonita. Pade iwetu wo'u I'a mombawai bo mompakadea rasi ka komi sampe komi mantambai mombawai ka tau ntanina.

¹¹Komi kana rapakasugi riara mpengele-ngele sampe komi bate-batena mamala mombawai ante najoi rara. Pade tempo kami mombawai pewai komi etu ka tau-tau nakasiasi ri Bagia Yudea madea tau kana manguli tarima kasi ka Alatala.

¹²Sabana petulungi to niwai komi etu da'a aga mantulungi mompakagana nuapa to niparaluu todea topomparasaya, tapi manggeni madea tau wo'u manguli tarima kasi ka Alatala.

¹³Ira kana mantoiya bo mombabila Alatala, sabana ante mombawai petulungi etu komi mompakanoto komi mpu'u-mpu'u natundu riara Kareba Belo Kristus to nipangaku komi. Pade ira kana mantoiya Alatala sabana komi mombawai petulungi ka ira bo tau-tau ntanina ante najoi rara.

¹⁴Pade ira kana momposambaya komi ante nalentora rara sabana manggita asele nu towe belo nu Alatala to neliu-liuna riara nggatuwu komi.

¹⁵Masipato mpu'u kita mosukuru ri ja'i Alatala sabana pewaina to da'a namala rasowadakata kabelona!