Read Da'a Kaili GALATIA 1 Bible Online

GALATIA 1 - Da'a Kaili bible

GALATIA 1

¹Sura e'i nggari ja'iku i Paulus, suro i Pue Yesus, ka topomparasaya i Pue Yesus ri Propinsi Galatia. Tabe nggari ja'iku bo nggari ja'i pura-pura topomparasaya to nosanggani ante aku ri se'i. Aku e'i najadi suro i Pue da'a nggari dota nu manusia pade da'a wo'u manusia to nangonggotaka aku. Tapi aku nionggotaka Yesus Kristus mboto bo Umata Pue Alatala to nompakatuwu bali I'a nggari kamatena.

³Perapi Umata Alatala bo Pue Yesus Kristus mombagane komi bo mombawai katuwua mabelo ka komi.

⁴Pue Yesus nombawai korona rapatesi mantolo silakata nantuki dota Umata Alatala ala I'a mamala mombakabasaka kita nggari pura-pura kaja'ana ri dunia we'i-we'i.

⁵Rabila bo ratoiyata Alatala sampe ri kasae-saena. Amin!

⁶Da'a nesua ri akalaku iwenu komi nasasinta gaga nompalasi Pue Alatala to nompokio komi majadi todeana nggari towe belo Kristus pade nantuki pepatuduki tau ntanina to niuli ira “kareba belo.”

⁷Kakonona da'a ria “kareba belo” ntanina. Aga naria tau-tau nompakagado komi ante pepatuduki ira to nasala. Ira aga madota mompakadenggo Kareba Belo to nantesa Kristus.

⁸Tapi kuuli ka komi, nau kami mboto atau malaeka nggari suruga mompatolele pepatuduki to nosisala ante Kareba Belo to nipatolele kami ka komi bopia, nasurukawumo i'a!

⁹Tempo kami danaria ri tatongo komi bopia niuli kami mami iwetu, pade we'i-we'i sangganipa kuuli, ane maria tau mompatolele pepatuduki to nosisala ante Kareba Belo to nitarima komi, nasurukawumo i'a!

¹⁰Jadi iwenumo, sampesuwu-sampesuwu? Ante nanguli iwetu aku miki ratoiya ntau? Etu da'a ntoto nakono! Aku aga madota ratoiya Alatala. Bara nipekiri komi aku aga madota mompakadamba rara manusia. Tapi etu da'a nakono, sabana ane aku danompasimbuku mompakadamba rara manusia aku da'a masipato majadi batua Yesus Kristus.

¹¹Sampesuwu-sampesuwu, kana ranjani komi Kareba Belo to nipatoleleku etu da'a Kareba Belo nggari ja'i manusia.

¹²Aku da'a nantarima Kareba Belo etu nggari ja'i manusia, pade da'a wo'u manusia to nompatuduki etu ka aku. Tapi Yesus Kristus mbotomo to nompopanjani isi Kareba Belo etu ka aku.

¹³Natantu niepe komimo tesa ewa katuwuku bopia tempo aku danantuki agama Yahudi. Ante da'a ria ampu aku nompandasa topomparasaya i Pue Yesus. Aku batena nompasimbuku mompakaropu pomparasaya ira.

¹⁴Aku neliu nggaraji nggari pura-pura sanggatuwuku to Yahudi nantuki Atura-atura agama Yahudi. Aku mpu'u-mpu'u naria dotaku nantuki ada-ada ntotu'a kami nggaolu.

¹⁵Tapi tempo aku da'apa nesuwu, nggari towe belona Alatala nompelisi aku bo nompokio aku majadi surona.

¹⁶I'a nompopanjani Anana i Pue Yesus ka aku ala aku mamala mompatolele Kareba i Pue Yesus ka tau-tau da'a to Yahudi. Tempo aku nisuro Alatala manggeni Kareba etu aku da'a nalau ri ja'i manusia merapi rapatuduki.

¹⁷Aku da'a wo'u nalau mpaka ri ngata Yerusalem manggita ira to najadi suro i Pue Yesus nokolu nggari aku. Tapi aku nalau mpaka ri tana Arab, pade nggari setu aku nanjili bali mpaka ri ngata Damsyik.

¹⁸Tolumpae kaliuna pade aku nalau mpaka ri ngata Yerusalem manggita i Petrus. Aku neto'o ri ja'ina aga sampulu limambengi kasaena.

¹⁹Tapi aku da'a nanggita suro-suro i Pue Yesus ntanina, aga Yakobus tua'i i Pue.

²⁰Parasayamo tesaku e'i! Ri ngayo Alatala mboto aku manguli, tesa to nitulisiku e'i nakono! Aku da'a nodawa!

²¹Naopu etu pade aku nalau mpaka ri Bagia Siria bo Kilikia.

²²Tapi sampe ri tempo etu topomparasaya Kristus ri Bagia Yudea da'apa nangginjani lenjeku.

²³Ira aga nangepe kareba to nanguli, “Tau to mpu'u-mpu'u nompandasa kita topomparasaya bopia we'i-we'i nompatolele Kareba Belo ewa pomparasaya ka i Pue Yesus to madota rapakaropuna bopia!”

²⁴Pade ira nantoiya Alatala sabana nuapa to najadi ante aku.