Read Da'a Kaili GALATIA 2 Bible Online

GALATIA 2 - Da'a Kaili bible

GALATIA 2

¹Pade sampulu patampae kaliuna nalau wo'umo aku mpaka ri ngata Yerusalem nosanggani ante i Barnabas. Pade aku wo'u nanggeni i Titus.

²Aku nalau mpaka ri setu sabana naria tesa nggari ja'i Alatala nompakau aku malau. Sangga naratapa ri setu aku nasiromu aga ante topanggeniaka-topanggeniaka topomparasaya. Pade nipakanotoku ka ira isi Kareba Belo to nipatoleleku ka tau-tau da'a to Yahudi. Patujuku ala pepatudukiku ne'e rasalai sampe da'a ria gunana bagoku mompatolele Kareba Belo, nabeloka to nipowiaku bopia, nabeloka to danipowiaku we'i-we'i.

³Tapi ira nantakono pepatudukiku. Etu nanoto sabana i Titus, to Yunani to nosanggani ante aku ri setu, da'a nipasu'u ira rasuna

⁴naupa naria tau ntanina nompasu'u. Iramo tau to nanguli ira topomparasaya i Pue Yesus, tapi ira nodawa. Ira nesua nggalino ri polibu etu ala manggita iwenu pokaingguta to natekabasaka nggari Atura-atura agama Yahudi sabana kita nosaongu rara ante Yesus Kristus. Patuju ira ala kita kana matundu riara Atura-atura etu.

⁵Tapi kami da'a ntoto nekou ri ja'i ira, nau aga sampalai, ala kakono nu Kareba Belo kana maria ri ja'i komi.

⁶Tapi topanggeniaka-topanggeniaka topomparasaya to nireke nalanga katuwuna nasituju ante Kareba Belo to nipatoleleku. Da'a ria nuapa-nuapa to nitambai ira riara Kareba etu. (Ane ira nalanga katuwuna atau da'a, nasimbayu riara mpanggitaku, sabana Alatala da'a nanggita lenje.)

⁷Tapi nanotomo ka ira aku niparasaya Alatala nanggeni Kareba Belo ka tau da'a to Yahudi nasimbayu ewa i Petrus niparasaya Alatala nanggeni Kareba Belo ka tau to Yahudi.

⁸Sabana Alatala nombawai pompakule ka i Petrus majadi topanggeni Kareba Belo ka tau to Yahudi, pade I'a wo'u nombawai pompakule ka aku majadi topanggeni Kareba Belo ka tau da'a to Yahudi.

⁹Tempo ira Yakobus, i Petrus bo Yohanes, to nireke topanggeniaka topomparasaya i Pue Yesus ri ngata Yerusalem, nanggita kabelo nu Alatala to niwai ka aku, etumo majadi surona, ira nosisoko pale ante aku bo i Barnabas ewa tandaina kami pura-pura roa sampokarajaa nanggeni Kareba Belo. Kami pura-pura nasituju ala aku ante i Barnabas kana manggeni Kareba Belo ka tau da'a to Yahudi bo ira manggeni Kareba Belo ka tau to Yahudi.

¹⁰Aga sangele niperapi ira, etumo ala kami mantora mantulungi tau napakasi ri ngata Yerusalem. Pade etumo bago to nipobete raraku bo nipowiaku ante mpu'u-mpu'u.

¹¹Tempo i Petrus narata ri ngata Antiokhia aku nangewa i'a ngga mata-mata sabana pokaingguna ri setu nasala.

¹²Tempo i'a lako narata i'a nanggoni mpasanggani-nggani ante topomparasaya da'a to Yahudi. Tapi sangga naratapa bara sakuya mba'a tau to nisuro Yakobus, nouramo i'a nggari ja'i ntopomparasaya da'a to Yahudi. Mana madota i'a manggoni mpasanggani ante ira, sabana i'a naeka rarana raontiaka topomparasaya to Yahudi to nanguli kita kana rasuna ala rapakasalama.

¹³Pade topomparasaya to Yahudi ntanina wo'u nompasiala pokainggu i Petrus to nadenggona sampe i Barnabas mboto natikeni nantuki pokainggu ira etu.

¹⁴Tapi tempo aku nanggita pokainggu ira etu da'a nasipato ante pepatuduki to nakono nggari Kareba Belo, aku nangontiaka i Petrus ri ngayo ira pura-pura. Niuliku, “Komi samba'a tau to Yahudi, tapi komi mana nantuki ada nto Yahudi. Komi aga natuwu nantuki kabiasa ntau da'a to Yahudi. Ane iwetu, nokuya komi madota mompasu'u tau-tau da'a to Yahudi mantuki ada-ada nto Yahudi?”

¹⁵Sampesuwu-sampesuwu, i Petrus ante aku tau to Yahudi mami nggari pesuwu kami, da'a tau da'a to Yahudi to da'a nantuki Atura-atura agama to nipapola i Musa.

¹⁶Tapi naupa iwetu ninjani kami manusia da'a nireke manoa riara mpanggita Alatala ante mantuki Atura-atura agama, tapi ante momparasaya Yesus Kristus. Kami mboto nomparasaya Yesus Kristus ala majadi manoa riara mpanggita Alatala sabana pomparasaya kami ri ja'i Kristus, da'a sabana mantuki Atura-atura agama. Sabana ante mantuki Atura-atura agama da'a ria samba'a mamala majadi manoa riara mpanggita Alatala.

¹⁷Kami topomparasaya to Yahudi manjarumaka majadi manoa riara mpanggita Alatala sabana mosaongu rara ante Kristus. Tapi ante nowia iwetu nanotomo kami topombaliunaka Atura-atura agama nasimbayu ewa ira tau da'a to Yahudi to da'a nantuki Atura-atura agama etu. Jadi iwenu? Etu batuana Kristus nantulungi tau nowia silaka? Etu da'a ntoto nakono!

¹⁸Sabana ane aku manjili manjarumaka Atura-atura agama to nikabasakakumo, pade manguli ante mantuki Atura-atura etu aku mamala majadi manoa riara mpanggita Alatala, nanotomo aku topombaliunaka Atura-atura.

¹⁹Sabana tempo aku danantuki Atura-atura agama, nanotomo ka aku da'a kupakule majadi manoa riara mpanggita Alatala ante mantuki Atura-atura agama, sabana da'a kupakule mantuki Atura-atura etu. Jadi nenontomo aku manjarumaka Atura-atura agama ala aku mamala matuwu ante mantuki nuapa to nikonoa Alatala. Tempo Kristus namate ri kayu parika, riara mpanggita Alatala aku wo'u namate nosanggani-nggani ante I'a, sabana I'a namate nanjaliku aku.

²⁰Jadi namala rauli iwe'i: mana aku to natuwu, tapi Kristus natuwu riara nta'iku. Pade katuwua to nabou to nirasaiku we'i-we'i nggari pomparasayaku ka Ana nu Alatala to nompotowe aku bo nombawai korona rapatesi manjaliku aku.

²¹Aku da'a nompoara towe belo nu Alatala etu. Sabana ane kita mamala majadi manoa riara mpanggita Alatala ante mantuki Atura-atura agama, etu batuana kamate Kristus da'a ria gunana!