Read Da'a Kaili GALATIA 3 Bible Online

GALATIA 3 - Da'a Kaili bible

GALATIA 3

¹Umba komi to Galatia to nabodo, isema to nanjalipuyo komi sampe komi mana madota mantuki pepatuduki to nakonona? Niepe komi mbotomo tesaku bopia nompakanoto iwenu asele nu kamate Yesus Kristus ri kayu parika.

²Aga sangele to madota kunjani nggari ja'i komi. Komi nantarima Nosa Nagasa nu Alatala ante nantuki Atura-atura agama, atau ante nangepe bo nomparasaya Kareba Belo? Natantumo ante nangepe bo nomparasaya Kareba Belo!

³Jadi nokuya komi nadoyo-doyo? Nompamulamo komi natuwu ewa topomparasaya i Pue Yesus ante kuasa nggari ja'i Nosa Nagasa nu Alatala. Iwenu sampe we'i-we'i komi nompasimbuku majadi nagasa ante pompakule komi mboto?

⁴Iwenumo? Da'a ria gunana pura-pura nuapa to nirasai komi etu? Natantumo naria pura gunana!

⁵Alatala nompopana'u Nosana to Nagasa ka komi ante najoi rarana bo I'a nompowia kabaraka-kabaraka ri tatongo komi. Iwenumo? Etu pura-pura nipowiana sabana komi nantuki Atura-atura agama? Natantu da'a ntoto! Tapi etu nipowiana sabana komi nangepe bo nomparasaya Kareba Belo!

⁶Etu nasimbayu ewa tesa to nitulisi riara Buku Nagasa ewa Abraham iwe'i: “Abraham nomparasaya Alatala, pade nggari pomparasayana etu i'a nireke Alatala tau nanoa.” [1]

⁷Jadi sampesuwu-sampesuwu, miki ranjani komi tau-tau to natuwu ante nomparasaya Alatala, iramo to mpu'u-mpu'u nireke muli Abraham, sabana ira wo'u nomparasaya nasimbayu ewa i'a.

⁸Ninjani Alatala nggari lamba pamulana patujuna mantarima tau da'a to Yahudi majadi manoa riara mpanggitana ane ira momparasaya I'a. Jadi I'a wo'u nokolu nompakanoto Kareba Belo ka Abraham ewa to nitulisi riara Buku Nagasa iwe'i: “Nggari mulimu banepia, pura-pura manusia ri dunia kana mombarata rasi nggari ja'iku.” [2]

⁹Abraham nomparasaya pade i'a niwai Alatala ka rasi. Jadi iwetu wo'u pura-pura tau to natuwu ante nomparasaya kana rawai Alatala ka rasi nasimbayu ewa Abraham.

¹⁰Isema-sema to nanjarumaka majadi manoa riara mpanggita Alatala ante mantuki Atura-atura agama to nipapola i Musa, iramo to nijanjiaka Alatala. Etu nanoto sabana naria tesa riara Buku Nagasa to nanguli iwe'i: “Isema-sema da'a natutu nantuki pura-pura parenta to nitulisi riara Atura-atura agama, i'amo to nijanjiaka Alatala.” [3]

¹¹Nanoto mpu'u da'a ria tau to nireke Alatala nanoa ante mantuki Atura-atura agama sabana naria tesa ntanina ri Buku Nagasa to nanguli iwe'i: “Tau to najadi nanoa riara mpanggita Alatala ante nomparasaya, i'amo to matuwu mabelo sampe ri kasae-saena.” [4]

¹²Tapi to napokona riara Atura-atura agama da'a pomparasaya. To napokona matutu matundu riara Atura agama. Sabana riara Buku Nagasa naria nitulisi iwe'i: “Isema-sema to natutu nantuki Atura-atura agama, iramo to matuwu mabelo.” [5]

¹³Kakonona kita pura-pura masipato rajanjiaka Alatala, sabana kita da'a natutu nantuki Atura-aturana. Tapi Kristus nombakabasaka kita nggari pejanjiaka etu, sabana naria tesa riara Buku Nagasa to nanguli iwe'i: “Isema-sema to namate ri kayu parika, i'amo to nijanjiaka Alatala.” [6] Jadi tempo Kristus namate ri kayu parika I'a nijanjiaka nanjaliku kita.

¹⁴Patuju Yesus Kristus nombawai korona rapatesi iwetu ala rasi to niwai Alatala ka Abraham nggaolu mamala wo'u rawai ka tau-tau da'a to Yahudi to momparasaya I'a. Ante iwetu kita pura-pura mamala rapesua Nosa Nagasa to nijanji Alatala.

¹⁵Sampesuwu-sampesuwuku, kuala saongu jonjo nggari katuwuta eo-eo. Sura pojanji to niteke manusia da'a namala rapakalipo ntau atau nitambai isina.

¹⁶Wa'a wo'u ante pojanji Alatala. I'a nombawai pojanjina ka Abraham bo mulina. Riara Buku Nagasa da'a nitulisi “bo ka muli-mulimu,” batuana ka muli Abraham to nadea. To nitulisi, “bo ka mulimu,” batuana ka muli Abraham samba'a lau, etumo Kristus.

¹⁷Patujuku iwe'i: Pojanji Alatala ante Abraham nipakaasa Alatala mboto. Jadi Atura-atura agama to niwai patatu tolumpulu mpae nggapurina da'a namala mompakalipo pojanjina ante Abraham sampe pojanji etu mana nalaku. Pojanji Alatala kana madupa pura.

¹⁸Ane rapana Abraham nantarima rasi sabana nantuki Atura-atura agama, etu batuana da'a rasi nggari pojanji Alatala, etu aga nggari powiana mboto. Tapi kakonona nggari pojanji etumo sampe Abraham nombarata rasi.

¹⁹Jadi ane iwetu nuapa patuju nu Atura-atura agama? Atura-atura agama nitambai nggapurina ala mompakanoto manusia nombaliunaka dota Alatala. Pade Atura-atura etu nalaku sampe karata nu muli Abraham to niboto riara pojanji Alatala ka Abraham nggaolu, etumo Yesus Kristus. Alatala nompakau malaeka-malaekana manggeni Atura-atura agama ka i Musa to najadi tau ntongo nompapola Atura-atura etu ka manusia.

²⁰Samba'a tau ntongo niparaluu ane maria robingga. Tapi tempo Alatala nompowia pojanjina ante Abraham, nipowiana njamba'ana, da'a ria malaeka atau tau ntongo.

²¹Jadi ane iwetu Atura-atura agama nosisala ante pojanji-pojanji Alatala? Natantumo da'a! Sabana ane rapana naria atura-atura to namala ratukita sampe kita mombarata katuwua mabelo sampe ri kasae-saena, etu batuana kita mamala rareke Alatala manoa ante mantuki Atura-atura agama.

²²Tapi tesa to naria riara Buku Nagasa nompakanoto pura-pura manusia batena nasilaka riara mpanggita Alatala. Patujuna ala aga tau to nomparasaya Yesus Kristus to mamala mantarima nuapa to nijanji Alatala, da'a tau to natundu riara Atura-atura agama.

²³Tempo nokolu da'apa ninjanita momparasaya ka i Pue Yesus, kita danisoko nu Atura-atura agama. Kita ewa niwala sampe marata tempona Alatala mompakanoto ka kita iwenu momparasaya ka i Pue Yesus ala kita mamala majadi manoa riara mpanggitana.

²⁴Jadi Atura-atura agama etu nasimbayu ewa topanggatono kita sampe karata Kristus ala kita mamala majadi manoa riara mpanggita Alatala ante momparasaya Kristus.

²⁵Tapi we'i-we'i kita mana nikatono Atura-atura agama sabana naratamo Kristus pade kita nomparasayamo.

²⁶Jadi sampesuwu-sampesuwu, komi pura-pura najadi ana nu Alatala sabana komi nomparasaya Yesus Kristus.

²⁷Komi pura-pura nidiu ewa tandaina komi topomparasaya Kristus. Jadi komi nantarima inggu-inggu Kristus riara nggatuwu komi.

²⁸Riara mpanggita Alatala mana ria posisalana ri olo ntau Yahudi bo tau da'a to Yahudi, batua bo tau da'a batua, langgai bo besi. Kita pura-pura nasimbayu riara mpanggitana sabana kita nosaongu rara ante Yesus Kristus.

²⁹Jadi ane komi bagia Kristus, komi wo'u muli Abraham. Pade masipato komi mantarima nuapa to nijanji Alatala ka Abraham.