Read Da'a Kaili GALATIA 4 Bible Online

GALATIA 4 - Da'a Kaili bible

GALATIA 4

¹To nipatujuku iwe'i: Rapana maria samba'a muli ntau nasugi. Tempo i'a danangana katuwuna nasimbayu ante samba'a batua, naupa i'a to masipato mantarima pura-pura kakalumana nu umana banepia.

²I'a nasimbayu ewa batua sabana i'a nikatono ntau to nipakatantu umana, bo kakalumanana niurusi ntau to nipakakuasa sampe marata tempona to nipakatantu umana.

³Iwetu wo'u ante kita. Katuwuta nokolu nasimbayu ewa katuwu ngana. Kita batena nisoko nu ada-ada bo atura-atura to naria riara dunia e'i.

⁴Tapi sangga naratamo tempo to nipakatantu Alatala, I'a nombasuro Anana marata ri dunia. Anana etu nipoanaka samba'a besi, pade I'a natundu riara Atura-atura agama.

⁵I'a nisuro Alatala manggabasaka kita to nisoko Atura-atura agama, ala kita mamala raonggotaka majadi ana nu Alatala.

⁶Alatala nompopana'u Nosa Nagasa nu Anana riara nta'ita sabana kita najadi anana. Pade nggari pekeniaka Nosa Nagasa riara nta'ita kita nanguli ka Alatala, “O, Yuma, Komi Umaku!”

⁷Jadi sampesuwu-sampesuwu, komi mana najadi batua, tapi komi najadi ana nu Alatala. Pade ane komi anana natantumo komi masipato wo'u mantarima pura-pura nuapa to nipakasadiana ka anana.

⁸Nokolu tempo komi da'apa nangginjani Alatala, komi najadi batua nu pue-pue ntanina to nireke komi Alatala, tapi kakonona da'a ntoto Alatala.

⁹Tapi we'i-we'i komi nangginjani Alatala--atau nabelopa rauli Alatala nangginjani komi. Jadi nokuya komi madota manjili manjoko ada-ada bo atura-atura to da'a nakuasa mantulungi komi majadi manoa riara mpanggita Alatala? Nokuya komi madota matundu bali riara ada-ada bo atura-atura etu?

¹⁰Nokuya komi nantora eo-eo mpopali, wula-wula to natantu, tempo-tempo ntanina to natantu bo mpae-mpae to nipakatantu riara Atura-atura agama?

¹¹Nakini mpu'u raraku ne'e-ne'e da'a ria gunana katiti nu iniku nompatuduki komi bopia!

¹²Sampesuwu-sampesuwu, aku merapi ante mpu'u-mpu'u raraku ala komi mompasiala pokaingguku. Sabana naupa aku tau to Yahudi aku mana mantuki ada-ada nto Yahudi ala majadi nasimbayu ewa komi tau da'a to Yahudi. Tempo aku nosanggani ante komi da'a sanggani komi nowia sala ri ja'iku.

¹³Ninjani komi mbotomo pamulana aku nompatolele Kareba Belo ka komi sabana aku naju'a.

¹⁴Tapi naupa ju'aku etu nompakarunggu rara komi, aku da'a ntoto nipoara komi atau niporau rara komi. Tapi aku nitarima komi ewa malaeka Alatala, atau ewa Yesus Kristus mboto.

¹⁵Tempo etu nasana mpu'u rara komi ri ja'iku. Tapi we'i-we'i nokuya komi mana nasana rara ri ja'iku? Nakono mpu'u tesaku e'i! Bopia komi mpu'u-mpu'u nasadia mantulungi aku. Ane namala nau mata komi mboto rasu'i rawai ka aku.

¹⁶Tapi iwenumo we'i-we'i? Aku nireke komi balimu sabana aku nantesa ka komi nuapa to nakonona?

¹⁷Tau-tau ntanina etu nompasimbuku ante mpu'u-mpu'u mangala rara komi, tapi patuju ira da'a nabelo. Ira aga madota mompopoga'a komi ante aku ala komi mpu'u-mpu'u mantuki ira.

¹⁸Kakonona nabelo ane tau nompasimbuku ante mpu'u-mpu'u mangala rarata. To napokona patuju ira kana mabelo. Wa'a wo'u aku, pade da'a aga tempo aku nosanggani ante komi.

¹⁹Ana-anaku to nipotoweku, nasimbayu ewa samba'a besi nandasa mpu'u tempo noana, iwetu wo'u aku nandasa nompekiri komi. Pade aku kana mandasa iwetu sampe inggu Kristus mpu'u-mpu'u naria nikita riara nggatuwu komi.

²⁰Aku mpu'u-mpu'u madota mosanggani-nggani ante komi we'i-we'i ala aku mamala mombabali suaraku to naro'o majadi suara nalente, sabana nasudumo raraku mompekiri komi!

²¹Umba komi to madota matundu riara Atura-atura agama ala majadi manoa riara mpanggita Alatala! Iwenu? Da'a nanoto ka komi nuapa to naria riara Atura-atura agama?

²²Ri setu nitulisi naria romba'a ana Abraham, samba'a nipoanaka i Hagar, besi to najadi batua, bo samba'apa nipoanaka i Sara, rongo Abraham to da'a najadi batua.

²³Ana nu besi to najadi batua nipoanaka nantuki dota manusia. Tapi ana nu besi to da'a najadi batua nipoanaka nantuki pojanji Alatala ka Abraham.

²⁴Tesa e'i najadi sangele porapa ka kita. Romba'a besi etu niporapaka ewa rongele pojanji. Hagar nirapaka ewa pojanji to niwai Alatala ka i Musa ri bunggu Bulu Sinai ri tana Arab. I'a nirapaka ewa tau to nantuki Atura-atura agama ala mompasimbuku majadi manoa riara mpanggita Alatala. Sabana pura-pura tau to nompasimbuku mantuki Atura-atura agama natuwu ewa batua, ira natundu riara Atura-atura etu nasimbayu ewa samba'a batua natundu ri ja'i madikana. Pade i Hagar namala wo'u nirapaka ewa ngata Yerusalem ri dunia e'i, sabana pue ngata Yerusalem natuwu ewa batua, ira aga natundu riara Atura-atura agama.

²⁶Tapi i Sara nirapaka ewa Yerusalem ri suruga. I'a namala nirapaka ewa tau to nomparasaya Alatala ala majadi manoa riara mpanggitana. Sara etu to nipoindota sabana kita da'a nipobatua Atura-atura agama nasimbayu ewa i Sara da'a najadi batua.

²⁷Pamulana i Sara nagampa, tapi kaopuna i'a noana ka samba'a ngana nantuki pojanji Alatala ka Abraham. Etu nasimbayu ewa tesa to nitulisi riara Buku Nagasa iwe'i: “Kana madamba-damba besi to nagampa, to da'a sanggani noana. Kana meliu nggadamba, komi to da'a sanggani nombarasai ju'a mpoana, sabana besi to nipalasi rongona kana meliu nggadea anana nggari besi to naria rongona.” [7]

²⁸Sampesuwu-sampesuwu, nasimbayu ewa Ishak to nipoanaka nantuki pojanji Alatala, komi wo'u najadi ana-ana Alatala nantuki pojanjina.

²⁹Tapi tempo nggaolu Ismael, to nipoanaka nantuki dota manusia, nompandasa tua'ina Ishak to nipoanaka nantuki dota Nosa Nagasa nu Alatala. Iwetu wo'u we'i-we'i, kita to nanjarumaka pojanji Alatala nipandasa ntau to nipobatua Atura-atura agama.

³⁰Tapi nuapa to niuli riara Buku Nagasa? “Popalaimo besi to najadi batua etu ante anana, sabana anana etu da'a mamala mombarata bagia nggari kakalumana umana nosanggani-nggani ante ana to nipoanaka besi to da'a najadi batua.” [8]

³¹Jadi sampesuwu-sampesuwu, kita da'a nasimbayu ewa ana nu besi to najadi batua. Kita nasimbayu ewa ana nu besi to da'a najadi batua, sabana kita da'a nipobatua Atura-atura agama, tapi kita nomparasaya pojanji Alatala.