Read Da'a Kaili GALATIA 5 Bible Online

GALATIA 5 - Da'a Kaili bible

GALATIA 5

¹Kristus nanggabasaka kita nggari Atura-atura agama ala kita mpu'u-mpu'u makabasaka. Jadi pakaroomo rara komi ala komi batena makabasaka. Ne'e mana madota rapobatua.

²Toramo! Aku, Paulus, nanguli ka komi, ane komi mompasimbuku majadi manoa riara mpanggita Alatala ante rasuna nantuki Atura-atura agama Yahudi, etu batuana Kristus da'a ntoto ria gunana ka komi!

³Sangganipa kupopatora ka komi to madota rasuna, komi kana masipato mantuki pura-pura Atura agama ntanina wo'u.

⁴Ane komi mompasimbuku majadi manoa riara mpanggita Alatala ante mantuki Atura-atura agama, noga'amo komi nggari ja'i Kristus. Nakawaomo komi nggari towe belo nu Alatala.

⁵Tapi sampesuwu-sampesuwu, ante petulungi Nosa Nagasa nu Alatala kita nanjarumaka majadi manoa riara mpanggita Alatala ante momparasaya i Pue Yesus. Pade etumo to nipopeata ante mpu'u-mpu'u rarata.

⁶Ane kita nosaongu rara ante Yesus Kristus, da'a ria posisalana ane kita nisuna atau da'a nisuna. To napokona, momparasaya i Pue Yesus. Pade pomparasayata kana rapopokitata ante mompotowe tau ntanina.

⁷Bopia pomparasaya komi nantambai eo nantambai naroso. Jadi iwenu sampe we'i-we'i komi mana madota mantuki pepatuduki to nakonona? Isema to nombalawa komi?

⁸Natantumo powia ira etu da'a nggari Alatala to nompokio komi majadi todeana.

⁹Pepatuduki ira to nasalana etu nasimbayu ewa ragi, sabana nau aga sakedi lau ragi rapake, pura-pura gando to rapowia roti kana mebombo.

¹⁰Tapi niparasayaku komi da'a mantuki pepatuduki ntanina, sabana kita nosaongu rara ante i Pue. Pade niparasayaku isema-sema to nompakagado pekiri komi kana rapawela pesuku Alatala.

¹¹Sampesuwu-sampesuwu, naria tau to nanguli aku mboto danompatuduki ada mposuna kana ratuki ala majadi manoa riara mpanggita Alatala. Tapi tesa ira etu da'a ntoto nakono! Sabana ane aku danompatuduki iwetu, natantumo aku mana rapandasa ntau to Yahudi! Ane aku danompatuduki iwetu, pepatudukiku ewa kamate i Pue Yesus ri kayu parika mana mompakaju'a rara ira to Yahudi!

¹²Agina tau-tau to nompakagado pekiri komi etu manggabiri koro ira mboto!

¹³Sampesuwu-sampesuwu, komi nipokio Alatala ala rakabasaka nggari Atura-atura agama. Tapi ne'e sampe etu majadi loga ka komi mantuki mpengele-ngele dota rara to naja'a. Tapi komi kana mosipotowe samba'a bo samba'a bo mositulungi,

¹⁴sabana pura-pura Atura agama nesua riara parenta to nanguli iwe'i: “Potowemo sanggamanusiamu ewa komi nompotowe koromu mboto.” [9]

¹⁵Tapi ane komi mosinggarau bo mosipoju'a ka rara, pakabelo-belo. Ne'e sampe komi mosipakaropu pomparasaya!

¹⁶Patujuku iwe'i: komi kana matuwu mantuki dota Nosa Nagasa nu Alatala. Ne'e aga matuwu mantuki dota rara to naja'a.

¹⁷Sabana dota rara naja'a nangewa dota Nosa Nagasa, bo dota Nosa Nagasa nangewa dota rara to naja'a. Rongele etu nosiewa sampe komi da'a namala manggawia nuapa to nipodota komi mboto.

¹⁸Tapi ane komi nikeniaka Nosa Nagasa nu Alatala, komi da'a natundu riara Atura-atura agama.

¹⁹Nanotomo pokainggu ntau to nantuki dota rara to naja'a. Jonjona iwe'i: ira nogau sala ante tau da'a rongo ira mboto, ira nowia to natantoru bo da'a nasipato.

²⁰Ira nepue ka pue-pue ntanina bo ira nombadoti tau ntanina. Ira nosipobali ante tau ntanina, ira nosibaga, ira nasiriati, ira nasasinta narau bo ira aga nompekiri koro ira mboto. Ira aga nangelo posinggarau sampe nosinjabingga.

²¹Ira naino ka mbara-mbara ntau, ira nalangu-langu bo nasiromu nanggoni mpebasa, pade nadea wo'u pokainggu ira ntanina ewa etu. Jadi ewa to niuliku ka komi bopia, sangganipa kupopatora ka komi, tau tunggai noinggu iwetu da'a ntoto mamala majadi todea riara Poparenta nu Alatala.

²²Tapi ane tau-tau to nikeniaka Nosa Nagasa nu Alatala, iwe'imo inggu ira: ira nosipotowe, ira nadamba-damba bo nasana rara. Ira nosabara bo nalusu bo nabelo rara ante tau ntanina. Ira namala raparasaya,

²³ira naede rara, pade ira nanta'amaka dota koro ira mboto. Da'a ria Atura-atura agama to nombatagi pokainggu-pokainggu ewa etu.

²⁴Isema-sema to nosaongu rara ante Kristus nompakalipo inggu-ingguna to naja'a bo dota rarana to naja'a bo dota rarana to da'a namala nipampa.

²⁵Ane kita nosaongu rara ante Nosa Nagasa nu Alatala masipato kita matuwu mantuki dota Nosa Nagasa etu wo'u.

²⁶Ne'e kita malanga rara atau mosipoju'a ka rara, bo ne'e kita masiriati samba'a bo samba'a.