Read Da'a Kaili GALATIA 6 Bible Online

GALATIA 6 - Da'a Kaili bible

GALATIA 6

¹Sampesuwu-sampesuwu, ane komi manggita roamu mompowia silaka, komi to natuwu nantuki Nosa Nagasa nu Alatala kana manggeni i'a manjili ri jala to nakonona. Tapi kawiamo etu ante nalusu rara, bo mainga ala ne'e sampe komi wo'u mawela pesoba.

²Positulungimo komi samba'a bo samba'a ala ante iwetu komi mantuki parenta Kristus.

³Ane samba'a tau nompekiri koronapa neliu nggabelo nggari roana, tanusi da'a, i'a aga nombabagiu korona mboto.

⁴Tapi nabelopa butu-butu mba'a momparesa pokaingguna mboto ala manggita ane etu nabelo atau da'a. Ane pokaingguna nabelo, mamala i'a madamba-damba mompekiri etu. Tapi ne'e i'a mompoposisala pokaingguna etu ante pokainggu tau ntanina,

⁵sabana butu-butu mba'a kana mombatanggu pokaingguna mboto.

⁶Komi to nipatuduki Tesa nu Alatala masipato mantulungi tau to nompatuduki komi ante mombabagi ka i'a nuapa-nuapa to nabelona to naria ri ja'imu.

⁷Sampesuwu-sampesuwu, ne'e sampe komi rabagiu! Alatala da'a namala rapongei-ngei! Nuapa to nituja, etu wo'u to rakato.

⁸Batuana ane pokainggu ntau aga nantuki dota rara to naja'a, i'a kana mamate bo rapopoga'a nggari ja'i Alatala sampe ri kasae-saena. Tapi ane pokaingguna nantuki dota Nosa Nagasa nu Alatala, i'a kana mombarata katuwua mabelo sampe ri kasae-saena nggari ja'i Nosa Nagasa etu.

⁹Sabana etu, ne'e kita mabasa-basa mompowia to nabelona, sabana ane kita da'a menonto mompowia to nabelona, sanggani tempo kita kana mantarima aselena.

¹⁰Jadi tempo danaria loga kita kana mompowia to nabelona ka pura-pura tau, neliu-liupa ka roa-roata topomparasaya.

¹¹Kitamo, sampesuwu-sampesuwu, aku mboto mantulisi bagia sura e'i ante paleku mboto! Nikita komi iwenu kabete nu huruf-huruf to nipakeku!

¹²Tau-tau to madota mompasu'u komi rasuna, kakonona aga miki ratoiya ntau to Yahudi ante mompopokita ira mantuki Atura-atura agama. Tapi patuju ira ala ne'e rapandasa ntau to Yahudi, sabana ira mboto nomparasaya kamate Kristus ri kayu parika.

¹³Kakonona, ira mboto, to nantuki ada mposuna, da'a natutu nantuki pura-pura Atura agama. Ira aga madota ala komi rasuna ala ira mamala mompakalanga koro ira sabana komi mantuki parenta ira etu.

¹⁴Tapi aku da'a ntoto madota mompakalanga koroku mboto; aku aga madota mompakalanga Pueta Yesus Kristus to namate ri kayu parika. Nggari kamatena nanotomo ka aku da'a ria nuapa-nuapa riara dunia to namala mompakanoa aku riara mpanggita Alatala. Jadi aku nanggabasaka pura-pura nuapa ri dunia to nisarumakaku bopia, pade aku aga manjarumaka i Pue Yesus.

¹⁵Sabana nisuna atau da'a nisuna da'a napoko. To napokona majadi manusia nabou ante momparasaya i Pue Yesus.

¹⁶Perapi Pue Alatala mompopokita asi matana bo mombawai katuwua mabelo ka tau-tau to natuwu nantuki pepatuduki e'i, pade ka pura-pura todeana ntanina.

¹⁷Jadi nompamula we'i-we'i, ne'e mana maria tau mompakasusa aku, sabana walea bela-bela ri koroku najadi tandaina aku batua i Pue Yesus.

¹⁸Sampesuwu-sampesuwu, perapi towe belo nggari ja'i Pueta Yesus Kristus mosanggani-nggani ante komi. Amin! Tabe nggari ja'iku, Paulus