Read Da'a Kaili EFESUS 1 Bible Online

EFESUS 1 - Da'a Kaili bible

EFESUS 1

¹Sura e'i nggari ja'iku i Paulus, to nionggotaka najadi suro Yesus Kristus nggari dota Alatala mboto, ka komi todea nu Alatala ri ngata Efesus to naroo nomparasaya Yesus Kristus.

²Perapi Umata Alatala bo i Pue Yesus Kristus mombagane komi bo mombawai katuwua mabelo ka komi.

³Masipato ratoiyata Alatala, Uma nu Pueta Yesus Kristus! I'a nombagane kita ante nombawai ka kita mpengele-ngele rasi ri suruga nggari Nosana to Nagasa sabana kita nosaongu rara ante Kristus.

⁴Ri lamba pamulana da'apa dunia nipajadi, Alatala nompelisi kita majadi todeana nggari powia Kristus ka kita. Patujuna ala kita matuwu magasa ante da'a ria inggu to nasala ri ngayona.

⁵Nggari towena mboto I'a nompakatantu mami nggari lamba pamulana mangonggotaka kita to nosaongu rara ante Yesus Kristus majadi anana nantuki nia bo dotana mboto.

⁶Etu sampe masipato kita mantoiya towe belona to neliu-liuna to niwaina ka kita ante kamomi nu rarana mboto sabana kita nosaongu rara ante Anana to nipotowena.

⁷Ante lei i Pue Yesus kita nitolomo, silakata niampungimo nggari towe belo nu Alatala to neliu kabetena.

⁸Towe belona etu nipopeliuna ka kita ante mpengele-ngele noto bo pangginjani.

⁹Nantuki dotana mboto Alatala nompopanjani ka kita niana to nasae natitabuniaka. Nipakatantunamo nggaolu ala niana etu kana rapakadupa Kristus

¹⁰ane maganamo tempo to nipakatantuna. Iwe'imo niana etu: Pura-pura nuapa to nariana, nabeloka to ri suruga nabeloka to ri dunia kana rapakasaongu, pade Kristus mboto majadi balengga panggeniakana.

¹¹Da'a aga etu, tapi kita nipelisi Alatala majadi bagiana sabana kita nosaongu rara ante Kristus. Nggari lamba pamulana kita nipakatantuna majadi bagiana nantuki niana mboto, sabana I'a nompowia mpengele-ngele nantuki nia bo dotana mboto.

¹²Etu sampe kami to Yahudi to nokolu nomparasaya Kristus masipato mantoiya kabelo nu Alatala to nipogumaa.

¹³Pade iwetu wo'u komi tau-tau da'a to Yahudi. Tempo komi nangepe pepatuduki to nakonona komi nomparasaya Kristus bo komi wo'u najadi bagia nu Alatala. Pepatuduki to nakonona etumo Kareba Belo to nompakanoto iwenu kita mamala rapakasalama. Pade Alatala nombawai tandai to nompakanoto komi mpu'u-mpu'u bagiana, etumo nipopana'una ka komi Nosa Nagasa to nijanjina nggaolu.

¹⁴Nosa Nagasa etumo najadi panjokota to nompakanoto nuapa to nijanji Alatala ka todeana natantumo kana ratarimata. Panjokota etu bate-batena maria ri ja'ita sampe ri kaopu nu dunia tempo kita to najadi bagia nu Alatala rakabasaka nggari pura-pura kaja'ana. Etu sampe masipato kita mantoiya kabelo nu Alatala to nipogumaa!

¹⁵Sabana etu, nompamula nggari tempo aku nangepe kareba to nanguli komi nomparasaya i Pue Yesus bo nompotowe pura-pura topomparasaya,

¹⁶da'a nenonto-nonto aku nosukuru ri ja'i Alatala sabana katuwu komi. Aku bate-batena nanggeni komi riara posambayaku.

¹⁷Aku nerapi ka Alatala, Uma nu Pueta Yesus Kristus, Umata to neliu nggakuasa, ala I'a mombawai ka komi noto nggari ja'i Nosana to Nagasa, pade mompopanjani ka komi isema I'a ala kaopuna komi mosinjani belo ante I'a.

¹⁸Aku nerapi ala I'a mombabuka pekiri komi ala manoto ranjani komi nuapa to namala rasarumaka komi nggari ja'ina to nompokio komi majadi todeana. Pade aku wo'u nerapi ala ranjani komi kabelo bo kagayana mpengele-ngele to nipakasadia Alatala ka todeana,

¹⁹pade ala ranjani komi wo'u kabete nu kuasana to nipogumaa to naria riara nggatuwuta to nomparasaya I'a. Kuasa etu nasimbayu ewa kuasana to neliu-liuna

²⁰to nipakena tempo I'a nompakatuwu bali Kristus nggari kamatena pade nombawai ka I'a pekatoko to nibilana ri pangganana ri suruga.

²¹Kristus neliu nggakuasa nggari pura-pura kuasa to naria, nabeloka kuasa balengga-balengga seta, nabeloka kuasa-kuasa to nipokaeka manusia, nabeloka kuasa pue-pue ntanina. Pade I'a neliupa nggari pura-pura tau to nalanga panggana, nabeloka to natuwu we'i-we'i nabeloka to matuwu ri tempo marata.

²²Alatala nompowia mpengele-ngele nekou ri ja'i Kristus. Pade Kristus, to nombakuasai mpengele-ngele etu, nionggotakana najadi balengga topomparasaya I'a.

²³Kita topomparasaya Yesus Kristus nasimbayu ewa koro Kristus mboto. I'amo balenggata to naria ri umba-umba ri langi bo dunia. Jadi pura-pura nuapa to naria ri ja'ina naria wo'u ri ja'ita.