Read Da'a Kaili EFESUS 2 Bible Online

EFESUS 2 - Da'a Kaili bible

EFESUS 2

¹Sampesuwu-sampesuwu, tempo komi da'apa nomparasaya i Pue Yesus komi ewa namate sabana komi batena nowia silaka bo nombaliunaka parenta-parenta Alatala.

²Komi batena natuwu nantuki kabiasa-kabiasa manusia ri dunia e'i. Komi batena nantuki dota Magau nu Seta, balengga nu kuasa-kuasa ri laerawa. I'amo to nombakuasai rara ntau to da'a natundu ri ja'i Alatala.

³Nokolu kita pura-pura noinggu nasimbayu ewa ira. Kita wo'u natuwu nantuki mpengele-ngele dota rarata to naja'a. Kita aga nompowia nuapa to nompakasana korota bo pekiri rara nta'ita mboto to naja'ana. Kakonona kita masipato rapawela pesuku nu Alatala nasimbayu ewa tau-tau ntanina to naja'ana.

⁴Tapi naasi mpu'u mata Alatala nanggita kita. Nabete mpu'u towena to nipopokitana ka kita

⁵sampe tempo kita da ewa namate sabana da'a natundu ri ja'ina, I'a nompakatuwu bali kita nosanggani-nggani ante Kristus. Toramo! Aga nggari towe belo nu Alatala komi nipakasalama.

⁶Pade kita niorena pade niwaina pekatoko to nibila nosanggani-nggani ante Yesus Kristus ri suruga sabana kita nosaongu rara ante Kristus.

⁷Patujuna ala ri tempo nggapurina kabete nu towe belona to neliu-liuna to nipakanotona ka kita nggari kabelo powia Yesus Kristus mamala rapopokita.

⁸Nggari towe belo nu Alatala komi nipakasalama sabana komi nomparasaya i Pue Yesus. Etu da'a asele powia komi mboto tapi etu pewai Alatala bayangi.

⁹Kita da'a nipakasalama ante powiata mboto. Jadi da'a ria tau to mamala mompakalanga korona ante manguli, “Aku e'i nipakasalama ante powiaku mboto!”

¹⁰Kita e'i nipajadi Alatala manusia nabou sabana kita nomparasaya Yesus Kristus. Patuju Alatala ala kita manggawia powia to nabelona to nipakatantuna mamimo ka kita nggaolu.

¹¹Jadi sampesuwu-sampesuwuku, toramo iwenu katuwu komi tempo nokolu. Komi muli ntau da'a to Yahudi pade komi niuli nto Yahudi tau da'a nisuna, etumo tau da'a todea nu Alatala. Ira to Yahudi niuli tau to nisuna, etumo tau to najadi todea nu Alatala. Tapi kakonona ada mposuna aga tandai to nipowia manusia ri koro ira.

¹²Toramo, nokolu komi da'apa nangginjani Kristus, komi da'a nipaloga mosanggani-nggani ante tau-tau to Israel to najadi todea nu Alatala. Pojanji nu Alatala ka todeana da'a nalaku riara nggatuwu komi. Komi aga natuwu riara dunia e'i ante da'a nangginjani Alatala, da'a ria panjarumaka komi nuapa-nuapa.

¹³Tapi we'i-we'i komi nosaongu rara ante Yesus Kristus. Nokolu komi nakawao nggari ja'i Alatala, tapi we'i-we'i komi nipakamosu ante I'a sabana nggari lei Kristus to nantapasi sala komi.

¹⁴Kristus mbotomo topomposinggabelo kita. I'a nompakasaongu rara tau-tau to Yahudi ante tau-tau da'a to Yahudi ante nompakalipo pura-pura posibali to nompopoga'a kita nasimbayu ewa wala nompopoga'a tau.

¹⁵Ante kamatena ri kayu parika nipopenontona Atura-atura agama to nipapola i Musa ante pura-pura parenta bo pepatudukina. Patujuna ala tau to Yahudi bo tau da'a to Yahudi rapakasaongu majadi manusia nabou to nosaongu rara ante I'a. Ante jala iwetumo I'a nompoposinggabelo kita.

¹⁶Patujuna wo'u ala nggari kamatena ri kayu parika kita to nipakasaonguna rapoposinggabelona ante Alatala sampe maropu pura posibalita.

¹⁷Kristus narata nompatolele Kareba Belo ewa posinggabelo etu ka kita pura-pura, nabeloka komi tau da'a to Yahudi to nakawao nggari ja'i Alatala, nabeloka kami tau to Yahudi to namosu ante I'a.

¹⁸Nggari powia Kristus kita pura-pura namala mantingayo Umata Alatala ante petulungi Nosana to Nagasa.

¹⁹Jadi sampesuwu-sampesuwu da'a to Yahudi, bopia komi da'a nireke todea nu Alatala, pade komi aga nireke tau topesowo. Tapi we'i-we'i mana iwetu. Komi wo'umo nireke todea nu Alatala nosanggani-nggani ante topomparasaya i Pue Yesus ntanina. Komi wo'u ananjapo nu Alatala mboto.

²⁰Kita topomparasaya i Pue Yesus nasimbayu ewa sapo to nibangu Alatala. Suro-suro i Pue Yesus bo nabi-nabi nasimbayu ewa pondasi sapo etu. Yesus Kristus mboto ewa palo mpondasi to neliu nggaroso pade komi wo'u ewa sapo to nibangu Alatala ri bunggu nu pondasi etu.

²¹Tau to nosaongu rara ante i Pue Yesus nasimbayu ewa parewa nu sapo to nisunju mpakabelo-belo sampe kaopuna majadi saongu sapo mpepue to nagasa to masipato rapeto'o i Pue.

²²Pade ewa topomparasaya i Pue Yesus komi wo'u nibangu nosanggani-nggani ante topomparasaya ntanina majadi sapo to nipeto'o nu Alatala mboto. Nanotomo I'a neto'o ri tatongota sabana naria Nosa Nagasana riara nta'ita pura-pura.