Read Da'a Kaili EFESUS 5 Bible Online

EFESUS 5 - Da'a Kaili bible

EFESUS 5

¹Sabana etu sampesuwu pura-pura, pasialamo pokainggu Alatala sabana komi anana to nipotowena.

²Pade komi kana matuwu ante towe nasimbayu ewa Kristus nompotowe kita. Nggari towena to nabete I'a nombawai korona rapatesi ala mompakasalama kita. Powiana etu nompakadamba rara Alatala nasimbayu ewa sangele pesomba to nawongi to nipesomba ka I'a.

³Komi todea nu Alatala. Jadi da'a ntoto masipato komi mogau sala ante tau da'a rongomu mboto, bara mompowia mpengele-ngele to natantoru, atau maino ante da'a ria kabasa-basana. Powia etu da'a masipato maria ri tatongo komi, nau aga rauli.

⁴Iwetu wo'u ante tesa-tesa njilaka bo tesa-tesa sambara bo kuwawa-kuwawa to da'a masipato. Etu pura-pura da'a masipato ka komi. Tapi nabelopa komi manguli tarima kasi ka Alatala.

⁵Toramo mpakabelo-belo! Tau to nogau sala ante tau da'a rongona mboto bo tau to nompowia to natantoru bo tau da'a ria kabasa-basana da'a ntoto mamala majadi todea riara Poparenta nu Alatala bo Kristus. Sabana powia etu nasimbayu kaja'ana ewa tau nompakoni pue-pue ntanina.

⁶Ne'e komi rabagiu ntau ante tesa-tesa da'a ria gunana to nanguli powia etu da'a nasala. Toramo! Nggari powia-powia etumo sampe pesuku Alatala rapawela ka tau-tau da'a natundu ri ja'ina.

⁷Sabana etu ne'e komi mowega ante ira.

⁸Komi mboto wo'u nokolu natuwu riara karumauna, tapi we'i-we'i komi najadi reme sabana komi nosaongu rara ante i Pue. Jadi komi kana matuwu ante pokainggu to masipato ka tau to najadi reme,

⁹sabana asele nu reme etu mpengele-ngele powia to nabelo bo to nanoa bo to nakono.

¹⁰Pekirimo mpakabelo-belo inggu nuapa to nompakadamba rara i Pue.

¹¹Ne'e komi mosintuwu ante tau to nanggawia powia nggarumau to da'a ria gunana. Nabelopa powia etu rapakanoto ante jonjo powiamu to nabelo nasimbayu ewa reme nombawanta karumauna.

¹²Kakonona pokainggu to nipowia ira nggalino etu mpu'u-mpu'u nompakaeya mata, nau aga ratesa-tesa.

¹³Tapi pura-pura to niwanta nu reme kana manoto rakita.

¹⁴Pade pura-pura to nipakanoto iwetu kana mabali majadi reme. Etu sampe naria niuli iwe'i: “Pembangumo komi to naturuna. Pembangumo nggari tatongo ntomate, Pade reme Kristus kana mombawanta komi.”

¹⁵Sabana etu, pekirimo mpakabelo-belo pokainggu komi. Ne'e matuwu ewa tau-tau to nadoyo, tapi komi kana matuwu ewa tau-tau to nanoto.

¹⁶Pakemo loga to naria ri ja'i komi mompowia to nabelona, sabana tempo we'i-we'i tempo to naja'a.

¹⁷Jadi ne'e komi madoyo, tapi pekirimo mpakabelo-belo ala ranjani komi nuapa to nipodota i Pue ka komi.

¹⁸Ne'e komi malangu ntule, sabana etu aga mompopeumba dota rara to naja'a. Nabelopa komi tunggai rakuasai Nosa Nagasa nu Alatala.

¹⁹Pade podademo samba'a bo samba'a ante tesa-tesa nggari buku Mazmur bo podade-podade to mantoiya Alatala bo podade-podade to niwai Nosa Nagasa nu Alatala. Komi kana modade ante madamba mombatoiya i Pue ante mpu'u-mpu'u raramu.

²⁰Tunggai posukurumo riara mpengele-ngele ka Umata Alatala ante sanga Pueta Yesus Kristus.

²¹Pekoumo komi ri ja'i roamu samba'a bo samba'a sabana komi nombabila Kristus.

²²Totu'a besi, pekoumo ri ja'i rongomu langgai ewa komi mekou ri ja'i Pue,

²³sabana totu'a langgai najadi balengga rongona besi nasimbayu ewa Kristus najadi balengga topomparasaya. I'a mboto nompakasalama topomparasaya to najadi ewa sipa nu korona.

²⁴Jadi nasimbayu ewa topomparasaya nekou ri ja'i Kristus, iwetu wo'u totu'a besi kana mekou ri ja'i rongona langgai riara mpengele-ngele.

²⁵Totu'a langgai, potowemo rongomu besi nasimbayu ewa Kristus nompotowe todeana bo nombawai korona rapatesi ala mompakasalama kita.

²⁶Etu nipowia Kristus ala kita rapakagasa bo rapatani ka I'a mboto. Kita nipegasana ante ue pediu bo tesana

²⁷ala kita mamala ratarimana ewa todeana to nabelo ntoto, ante da'a ria jeko atau silaka nuapa-nuapa, tapi nagasa pura ante da'a ria sala nuapa-nuapa.

²⁸Nasimbayu ewa Kristus nompotowe todeana, iwetu wo'u totu'a langgai kana mompotowe rongona besi nasimbayu ewa i'a nompotowe korona mboto. Isema-sema nompotowe rongona besi batuana i'a nompotowe korona mboto.

²⁹Da'apa ria lelena tau nompandasa korona mboto, tapi i'a aga nompiara bo nombajagai korona mpakabelo-belo nasimbayu ewa Kristus wo'u nompiara bo nombajagai todeana.

³⁰Etu nipowia Kristus sabana kita ewa sipa nu korona mboto.

³¹Riara Buku Nagasa naria nitulisi iwe'i: “Samba'a langgai kana mompalasi indo umana pade malau maroo ri ja'i rongona besi, pade ira romba'a kana majadi samba'a.” [2]

³²Tesa e'i nakumba batuana, tapi nantuki pangginjaniku to nipatuju nu tesa e'i etumo posinggamosu Kristus ante todeana.

³³Tapi naudamo iwenu, tesa etu nosinggawela wo'u ante komi. Butu mba'a totu'a langgai kana mompotowe rongona besi nasimbayu ewa i'a nompotowe korona mboto, pade butu mba'a totu'a besi kana mombabila rongona langgai.