Read Da'a Kaili EFESUS 6 Bible Online

EFESUS 6 - Da'a Kaili bible

EFESUS 6

¹Ngana-ngana, komi kana matundu ri ja'i indo umamu sabana etumo inggu to masipato ka topomparasaya i Pue Yesus.

²Bilamo indo bo umamu. Nggari Sampulu Parenta nu Alatala, etumo parenta pamulana to nitambai ante pojanjina.

³Pade iwe'imo pojanji etu: ane komi mombabila uma bo indomu, komi kana masana bo mandate umurumu riara dunia.

⁴Komi to najadi uma-uma nu ngana, ne'e komi mompakarau rara anamu. Tapi pakabetemo ira ante pepatuduki bo pepatora nggari ja'i Pue.

⁵Komi to najadi batua, tukimo parenta madikamu to naria ri dunia e'i. Kawiamo etu ante mombabila bo mekou ri ja'i ira ante mpu'u-mpu'u raramu nasimbayu ewa komi nekou ri ja'i Kristus mboto.

⁶Ne'e aga miki ratoiya manusia ante mokarajaa mabelo tempo komi rakita madikamu. Tapi pokarajaamo ante mpu'u-mpu'u raramu ewa batua Kristus to nantuki dota Alatala.

⁷Pokarajaa etu kana mukarajaa ante dota rara nasimbayu ewa komi mokarajaa ka i Pue, da'a aga ka manusia.

⁸Toramo! Butu mba'a tau to nompowia to nabelona, nabeloka i'a batua nabeloka da'a batua, i'a kana mantarima balasina to nabelo nggari ja'i Pue nantuki mpengele-ngele belo to nipowiana.

⁹Pade komi to najadi madika, komi wo'u kana moinggu mabelo ri ja'i batuamu. Ne'e mana komi momparangga ira, sabana ninjani komi mboto Puemu bo Pue ira samba'a lau. I'amo to naria ri suruga pade I'a da'a nanggita lenje.

¹⁰Kaopuna, komi kana maroso ante kuasa to neliu-liuna to nitarima komi nggari ja'i Pue sabana komi nosaongu rara ante I'a.

¹¹Pakemo pura-pura parewa mposibali nggari ja'i Alatala ala komi mompakule manta'amaka mangewa mpengele-ngele akala Magau nu Seta.

¹²Sabana kita da'a nosibali ka manusia tapi kita nosibali ka balengga-balengga seta, karampua-karampua, bo pue-pue ntanina riara dunia to naja'a e'i, bo mpengele-ngele seta ntanina ri laerawa.

¹³Sabana etu pakemo pura-pura parewa mposibali nggari ja'i Alatala ala komi mompakule mangewa bali-balimu ri tempo mposibali to naja'a etu. Kawiamo etu ala ane maopumo komi mosibali, komi bate-batena maroso mangewa balimu etu.

¹⁴Jadi ta'amakamo mangewa balimu ante pura-pura parewa mposibali nggari ja'i Alatala. Komi kana mantuki pepatuduki to nakonona. Etumo sulepemu. Komi kana moinggu manoa. Etumo baju asemu to nanggalendu koro batamu.

¹⁵Komi kana malulu rara manggeni Kareba Belo ewa posinggabelo manusia ante Alatala. Etumo sapatumu to naroso.

¹⁶Komi kana maroo momparasaya i Pue riara mpengele-ngele. Etumo kaliawomu. Etu kana rapake komi ala komi mompakule mantenggu mpengele-ngele parewa to naja'a to nipake Magau nu Seta nombabaga komi.

¹⁷Komi kana maroo manjarumaka Kristus to nompakasalama komi. Etumo songgo wajamu. Pade komi kana mompake Tesa nu Alatala. Etumo gumamu to niwai Nosa Nagasana ka komi.

¹⁸Kawiamo etu pura-pura ante mosambaya bo merapi tulungi ka Alatala. Posambayamo ri butu-butu loga nantuki pekeniaka Nosa Nagasa nu Alatala. Komi kana mainga tempo mosambaya bo ne'e menonto mosambaya ka pura-pura topomparasaya i Pue Yesus.

¹⁹Pade posambaya wo'u ka aku ala ane tempo aku motesa Alatala mombawai ka aku tesa-tesa to masipatona ala ante mabia aku mamala mompakanoto isi Kareba Belo to nitabuniaka nggari nggaolu.

²⁰Sabana nggari Kareba Belo etumo sampe aku najadi suro, pade we'i-we'i aku naria riara tarunggu. Posambayamo ka aku ala aku mabia mompatolele Kareba Belo sabana etumo bago to masipato kupowia.

²¹To nipodotaku ala komi mangginjani iwenu katuwuku ri se'i. Jadi etu sampe aku nompakau i Tikhikus mpaka ri ja'i komi ala i'a mamala mompakanoto etu pura-pura ka komi. I'a samba'a sampesuwuta to nipotoweku to natutu nantulungi pokarajaa i Pue.

²²I'a nipakauku mpaka ri ja'i komi ala i'a mamala mompopanjani ka komi nuapa pura to najadi ri ja'iku ri se'i, pade ala i'a mamala mompakawoe rara komi.

²³Perapi Umata Alatala bo i Pue Yesus Kristus mombawai katuwua mabelo bo towe bo karoso pomparasaya ka pura-pura topomparasaya ri setu.

²⁴Perapi Alatala mombagane pura-pura tau to nompotowe Pueta Yesus Kristus ante towe to da'a ria kaopu-opuna. Amin! Tabe nggari ja'iku, Paulus