Read Da'a Kaili FILIPI 1 Bible Online

FILIPI 1 - Da'a Kaili bible

FILIPI 1

¹Sura e'i nggari ja'i kami i Paulus bo i Timotius, batua Yesus Kristus, ka pura-pura topomparasaya Yesus Kristus to naria ri ngata Filipi, ante topanggeniaka-topanggeniaka bo topantulungi-topantulungi topomparasaya.

²Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.

³Sampesuwu-sampesuwu pura-pura, butu nggani aku nantora komi aku nosukuru ri ja'i Pue Alatalaku.

⁴Pade butu nggani aku nosambaya ka komi aku batena nosambaya ante nadamba mpu'u raraku,

⁵sabana komi nasintuwu nantulungi aku nompatolele Kareba Belo nggari ja'i Alatala, nompamula nggari eo pamulana sampe we'i-we'i.

⁶Pue Alatala mbotomo to nompamula panggawia to nabelona etu riara nta'i komi. Pade niparasayaku I'a wo'u kana mompakapola panggawia etu sampe maopu ri tempo Yesus Kristus marata bali ri dunia.

⁷Masipato aku mantora komi pura-pura ante nadamba mpu'u raraku sabana komi mpu'u-mpu'u nipotoweku. Pade komi nombarata bagia nggari towe belo to niwai Alatala ka aku, nabeloka tempo aku riara tarunggu, nabeloka tempo aku ri sawalikuna nantakono bo nompakanoto kakono Kareba Belo.

⁸Alatala mboto nangginjani iwenu kalentora raraku nantora komi ante towe nggari ja'i Yesus Kristus mboto.

⁹Iwe'imo pomperapiku ri ja'i Pue Alatala: aku mosambaya ala komi mantambai mepotowe pade mantambai mangginjani nuapa to nakonona bo mantambai kanoto pekiri komi.

¹⁰Ante iwetu komi mamala mompelisi nuapa to nabelona ala katuwu komi majadi magasa pade da'a ria salana sampe Kristus marata bali.

¹¹Aku wo'u mosambaya ala komi bate-batena mompowia to nanoana ante petulungi Yesus Kristus sampe nadea mpu'u tau mombabila bo mantoiya Alatala.

¹²Sampesuwu-sampesuwu, to nipodotaku ala komi mangginjani nuapa to najadi ri ja'iku e'i da'a naja'a. Tapi kakonona etumo to nompakatolele Kareba Belo

¹³sampe nanotomo ka pura-pura tantara to nombajagai sapo magau bo ka pura-pura tau ntanina ri se'i aku e'i nitarunggu sabana aku batua Kristus.

¹⁴Pade sabagia bete nggari topomparasaya ri se'i nantambai karoso pomparasaya ira ri ja'i Pue, sabana nanggita nuapa to najadi ri ja'iku ri tarunggu. Kaopuna nantambai kabia ira nompatolele Tesa nu Alatala ante da'a ria eka rara.

¹⁵Naria bara sakuya mba'a nggari tatongo ira to nompatolele Kareba Kristus sabana nasiriati nanggita aku, pade ira aga madota mosinggarau. Tapi naria wo'u ntanina to nompatolele Kareba Kristus ante patuju to nabelo.

¹⁶Ira etumo nompatolele ante towe sabana ninjani ira aku nionggotaka Alatala ala mantakono Kareba Belo.

¹⁷Tapi ira to nasiriati etu nompatolele Kareba Kristus sabana aga nompekiri koro ira mboto, da'a ante rara to nabelo. Nipekiri ira powia ira etu mantambai kasusaku riara tarunggu.

¹⁸Tapi da'a mokuya. Sabana nau iwenu, nabeloka etu nipowia ante patuju to nadenggo, nabeloka etu nipowia ante patuju to nanoa, Kareba Kristus kana nipatolele. Etumo nompakadamba raraku. Pade aku batena madamba-damba

¹⁹sabana ninjaniku, ante posambaya komi pade petulungi Nosa Nagasa Yesus Kristus, aku kana rakabasaka nggari tarunggu e'i.

²⁰To nipolentoraku bo nisarumakaku ala ne'e aku maeya riara mpengele-ngele, tapi ala aku we'i-we'i batena mabia ewa nokolu sampe nau aku matuwu atau mamate Kristus kana rabila bo ratoiya riara nggatuwuku.

²¹Sabana patujuku matuwu etumo mantambai mosinjani belo ante Kristus, pade ane aku mamate etu neliupa kabelona.

²²Tapi ane matuwu ri dunia e'i batuana aku mamala manggeni tau momparasaya Yesus Kristus, da'a mana ninjaniku umbana to kupelisi, matuwu atau mamate.

²³Aku niposidii rongele pompekiri. Aku mpu'u-mpu'u madota mompalasi dunia e'i malau meto'o mosanggani-nggani ante Kristus, sabana etumo to neliu kabelona.

²⁴Tapi neliu kapokona aku maroo ri dunia e'i ala mantulungi komi.

²⁵Jadi natantumo ka aku, aku damatuwu. Pade ninjaniku aku kana maroo mosanggani-nggani ante komi pura-pura ala komi mantambai maroso bo madamba momparasaya i Pue Yesus.

²⁶Ante iwetu komi kana mantambai mantoiya bo mombabila Yesus Kristus sabana aku danamalapa mosanggani ante komi.

²⁷Nuapa-nuapa majadi ri ja'iku, komi kana matuwu ante pokainggu to masipato ante Kareba Belo Kristus. Komi kana matuwu iwetu ala naupa aku marata manggita komi atau da'a, aku kana mangepe kareba to nanguli komi naroo nosaongu rara bo pekiri nanta'amaka pomparasaya to nipatuduki riara Kareba Belo.

²⁸Ne'e maeka ri ja'i balimu, tapi komi kana tunggai mabia. Ante iwetu komi mompakanoto ka balimu etu ira pura-pura to rapakaropu banepia tapi komi to rapakasalama. Etu pura-pura nggari ja'i Alatala.

²⁹Komi masipato moinggu iwetu sabana komi niwai Alatala ka loga da'a aga momparasaya Kristus, tapi wo'u mombarasai kasusa bo kapari sabana komi topomparasaya I'a.

³⁰We'i-we'i komi nombarasai kasusa nasimbayu ewa to nirasaiku to nikita komi mboto bopia pade to niepe komi bate-batena nirasaiku sampe we'i-we'i.