Read Da'a Kaili FILIPI 3 Bible Online

FILIPI 3 - Da'a Kaili bible

FILIPI 3

¹Sampesuwu-sampesuwu, kapolana, komi kana madamba-damba sabana komi nosaongu rara ante i Pue. Da'a nakaja raraku mombasili nuapa to nitulisiku ka komi bopia, sabana pepatuduki etu manggalendu komi nggari pura-pura to naja'ana.

²Komi kana mainga ri ja'i ntau to nompowia to naja'ana, to noinggu mpoasu. Komi kana mainga ri ja'i ira to nanguli komi kana rasuna ala majadi todea nu Alatala.

³Kakonona kita, da'a ira, todea nu Alatala to nakonona, sabana kita nombasomba Alatala ante pekeniaka Nosa Nagasana mboto, pade kita nadamba-damba sabana nosaongu rara ante Yesus Kristus. Kita da'a aga manjarumaka ada-ada to nitukita, ewa ada mposuna, ala rapakasalama.

⁴Kakonona aku mamala manjarumaka ada-ada etu. Ane maria tau to nompekiri i'a kana ratarima Alatala sabana i'a natutu nantuki ada-ada agama, neliu-liupa aku e'i.

⁵Aku nisuna tempo aku danoumuru walumbengi. Aku nipoanaka samba'a tau to Israel nggari muli Benyamin. Aku mpu'u-mpu'u tau to Yahudi mami, pade aku mpu'u-mpu'u natutu nantuki pura-pura Atura agama to nipapola i Musa, sabana aku tau to Parisi.

⁶Bopia newoya mpu'u raraku nantuki Atura-atura agama sampe aku nompandasa topomparasaya i Pue Yesus. Pura-pura Atura etu nitukiku, da'a ria sangele to niliunakaku.

⁷Tapi pura-pura etu to nirekeku bopia noguna riara nggatuwuku bopia, we'i-we'i nirekeku mana ria gunana sabana aku nomparasaya Kristus.

⁸Da'a aga etu, tapi pura-pura nuapa nirekeku mana ria gunana rapoposisala ante sangele to neliupa kabelona, etumo nosinjani ante Pueku Yesus Kristus. Pura-pura nikabasakakumo bo nirekeku ewa rumpu ala aku mamala mosinjani belo ante Kristus

⁹bo mosaongu rara ante I'a. Aku nireke Alatala nanoa da'a sabana powiaku mantuki Atura-atura agama, tapi sabana aku nomparasaya Kristus. Kanoana etu nggari Alatala mboto nantuki pomparasaya ka Kristus.

¹⁰To nipodotaku etumo mosinjani belo ante I'a pade mombarasai kuasa to nompakatuwu bali I'a nggari kamatena. Aku madota mombarasai kasusa bo kapari to nirasaina pade matundu sampe mamate nasimbayu ante I'a

¹¹ante panjarumaka aku wo'u mamala rapakatuwu bali nggari tatongo ntau namate.

¹²Aku da'a nanguli etu pura-pura nadupamo riara nggatuwuku atau aku najadi tau da'a ria salana. Tapi aku bate-batena mompasimbuku ala etu kana madupa riara nggatuwuku, sabana etumo patuju Yesus Kristus nompokio aku majadi bagiana.

¹³Sampesuwu-sampesuwu, aku da'a nompekiri etu pura-pura nadupamo riara nggatuwuku. Tapi naria sangele to kupowia, etumo aku bate-batena manggalinga pura-pura to naria ri talikuku pade aku mompasimbuku ante mpu'u-mpu'u raraku mombarata nuapa to naria ri ngayoku.

¹⁴Aku nompari-mpari mongowa mpaka ri panta'ana ala mombarata hadia padagi nggari ja'i Alatala, etumo matuwu mabelo ri suruga ante momparasaya Yesus Kristus, sabana etumo patuju Alatala nompokio kita.

¹⁵Jadi kamaimo kita to naroso pomparasayata mosaongu pombarata ewa etu. Tapi ane maria pombarata komi ntanina, etu wo'u kana rapakanoto Alatala ka komi.

¹⁶To napokona kita kana maroo mantuki noto to naria ri ja'ita sampe we'i-we'i.

¹⁷Sampesuwu-sampesuwu pura-pura, pasialamo pokaingguku pade pariara nta'i wo'u pokainggu tau ntanina to natuwu nantuki jonjo kami.

¹⁸Sabana nadea ngganimo aku nanguli ka komi bopia, pade we'i-we'i ante nageo aku nombasili bali ka komi, nadeamo tau to natuwu ante pokainggu to nanjapuaka kamate Kristus.

¹⁹Natantumo ira kana rasuku sampe ri kasae-saena, sabana “Pue” ira aga dota rara ira mboto to naja'ana. To nepakaeya to nipodamba-damba ira aga powia-powia to nepakaeya. Ira aga nompekiri nuapa-nuapa to naja'ana ri dunia e'i.

²⁰Tapi pokaingguta da'a iwetu, sabana kita todea nu suruga. Pade nggari setumo karata Pue Yesus Kristus, Magau to Mompakasalama to nipopeata ante kalentora nu rarata.

²¹I'a kana mombabali korota to nalente-lente e'i majadi nasimbayu ewa korona mboto to neliu kakuasana ante baraka to nipakena nompatundu pura-pura nuapa ri ja'ina.