Read Da'a Kaili FILIPI 4 Bible Online

FILIPI 4 - Da'a Kaili bible

FILIPI 4

¹Jadi sampesuwu-sampesuwu to nipotoweku bo to nipolentoraku, pakaroomo pomparasaya komi ka i Pue. Komimo to najadi tandaina bagoku naria aselena, komimo to nompakadamba raraku.

²Sampesuwuku Euodia bo i Sintikhe, aku mpu'u-mpu'u merapi ala komi mosaongu rara ewa topomparasaya i Pue.

³Pade kuperapi ka wega rapaku wo'u, tulungimo besi romba'a e'i ala mosaongu rara bali. Ira nokarajaa ntomo ante aku nompatolele Kareba Belo nosanggani-nggani ante i Klemens bo roa-roaku sampokarajaa ntanina. Sanga ira naria nitulisi riara Buku nu Alatala to nompakatantu sema matuwu mabelo sampe ri kasae-saena.

⁴Sampesuwu-sampesuwu pura-pura, ne'e menonto madamba-damba sabana komi nosaongu rara ante i Pue. Sangganipa kuuli ka komi, ne'e menonto madamba-damba!

⁵Komi kana malusu rara ri ja'i ntau pura-pura. Toramo! Mana masaeka i Pue marata.

⁶Ne'e makini-kini rara riara mpengele-ngele, tapi kenimo pura-pura riara mposambaya komi. Perapimo nggari ja'i Alatala ante mosukuru,

⁷pade belo nu Alatala to neliu nggari pompekiri manusia, kana mompakaroo rara nta'i bo pekiri komi to nosaongu rara ante Yesus Kristus.

⁸Kaopuna, sampesuwu-sampesuwu, paraluu komi tunggai mantondoaka nuapa to nakonona, nuapa to masipato rabila bo nuapa to nanoana. Pekirimo nuapa to nagasana, nuapa to nagayana, bo nuapa to nabelo raepe ntau. Tondoakamo pokainggu to neliu nggabelo, bo nuapa to masipato ratoiya.

⁹Tukimo nuapa to nipeguru bo nitarima komi nggari ja'iku, nabeloka to niepe komi, nabeloka jonjo to nikita komi riara nggatuwuku. Ane etu rapowia komi, Alatala, pu'u katuwua nabelo, kana mosanggani-nggani ante komi.

¹⁰Ante nadamba mpu'u raraku aku nantoiya i Pue sabana we'i-we'i komi nantulungi aku wo'umo. Da'a patujuku manguli komi da'a nantora aku bopia, tapi ninjaniku da'apa ria loga komi mompakatu pewai komi ka aku.

¹¹Aku nanguli etu da'a sabana aku nakabu, sabana aku negurumo matuwu masana naupa iwenu-wenu katuwuku.

¹²Ninjanikumo natuwu nakabu pade ninjaniku wo'u natuwu nelabi. Nipegurukumo akala matuwu masana mantingayo mpengele-ngele katuwu, nabeloka tempo nabosu ta'i, nabeloka tempo naoro ta'i, nabeloka aku nelabi, nabeloka aku nakabu.

¹³Aku nompakule mantingayo mpengele-ngele ante petulungi Kristus to nompakaroso aku.

¹⁴Naupa etu, nabelo mpu'umo rara komi nantulungi aku riara kasusaku ri se'i.

¹⁵Sampesuwu-sampesuwu to Filipi, ninjani komi mbotomo tempo Kareba Belo pamulana nipatolele ka komi pade aku nompalasi Propinsi Makedonia, da'a ria topomparasaya ntanina nasintuwu nantulungi aku mompapola bago etu, aga komi mboto.

¹⁶Da'a aga etu, tempo aku danaria ri ngata Tesalonika, da'a aga sanggani komi nompakatu pewai ka aku.

¹⁷Etu da'a batuana aku aga madota mantarima pewai komi. Tapi to nipodotaku ala nggari powia komi etu maria aselena to mantambai rasi ka komi.

¹⁸Nitarimaku puramo pewai nggari ja'i komi, pade etu kakonona neliu nggagana. Pura-pura pewai to nipakatu komi nitarimakumo nggari ja'i Epafroditus sampe nagana puramo to niparaluuku. Pewai komi etu nasimbayu ewa pesomba to nawongi to nikonoa bo nipodamba rara Alatala.

¹⁹Alatalaku kana mompakagana ka komi nuapa pura to niparaluu nantuki kasugina to nelabi-labina to naria ante Yesus Kristus.

²⁰Kana ratoiya bo rabila Umata Pue Alatala sampe ri kasae-saena. Amin!

²¹Pakasampe tabeku ka pura-pura topomparasaya Yesus Kristus ri setu. Pade tarima tabe nggari ja'i roa-roa to nosanggani-nggani ante aku ri se'i.

²²Tarima wo'u tabe nggari ja'i pura-pura topomparasaya ri se'i, neliu-liupa ira nggari sapo Magau Kaisar.

²³Perapi towe belo nggari ja'i Pue Yesus Kristus mosanggani-nggani ante komi pura-pura. Amin! Tabe nggari ja'i, Paulus