Read Da'a Kaili KOLOSE 1 Bible Online

KOLOSE 1 - Da'a Kaili bible

KOLOSE 1

¹Sura e'i nggari ja'iku i Paulus to nionggotaka najadi suro Yesus Kristus nantuki dota Alatala, pade nggari ja'i Timotius, sampesuwuta topomparasaya

²ka topomparasaya ri ngata Kolose to naroo nomparasaya bo nosaongu rara ante Kristus. Perapi Umata Pue Alatala mombagane bo mombawai katuwua mabelo ka komi.

³Butu nggani kami nomposambaya komi da'a nenonto kami nanguli tarima kasi ka Pue Alatala, Uma nu Pueta Yesus Kristus,

⁴sabana niepe kami komi nomparasaya Yesus Kristus pade nompotowe pura-pura todea topomparasaya.

⁵Etu nipowia komi sabana komi bate-batena nanjarumaka rasi bo belo to nipakasadia Alatala ka komi ri suruga. Pura-pura etu niepe komi mamimo tempo tesa to nakonona nipatolele ka komi bopia, etumo Kareba Belo.

⁶Kareba Belo etu natolele sampe ri umba-umba ri dunia pade noasele riara nggatuwu tau-tau to nomparasaya tesa etu. Pade nantambaimo kadea ntau to nomparasayana. Etu nasimbayu ewa to najadi ante komi. Tempo komi nangepe Kareba Belo etu niparasaya komimo sampe komi mpu'u-mpu'u nombarasai towe belo nu Alatala.

⁷Kareba Belo etu niepe komi nggari ja'i Epafras, roa sampokarajaa to nipotowe kami. I'a samba'a batua Kristus to natutu nantulungi komi.

⁸I'amo to nanguli ka kami iwenu komi nosipotowe samba'a bo samba'a ante pekeniaka Nosa Nagasa nu Alatala.

⁹Jadi nompamula nggari tempo kami nangepe lele etu da'a nenonto kami nosambaya ka komi. Kami batena nerapi ka Pue Alatala ala komi rawai noto bo pangginjani nggari ja'i Nosa Nagasana sampe komi mamala mangginjani pura-pura dota Alatala ka komi.

¹⁰Ante iwetu komi mamala matuwu ante pokainggu to masipato ka topomparasaya i Pue pade tunggai mompakadamba rarana. Komi mamala mompowia mpengele-ngele powia to nabelona pade mantambai eona mantambai mosinjani belo ante Alatala.

¹¹Kami nerapi ala Pue Alatala mompakaroso komi ante kuasana to nipogumaa sampe komi mompakule manta'amaka ante mosabara tempo nipandasa,

¹²pade mosukuru ri ja'i Umata Pue Alatala ante madamba rara. Sabana I'amo to nompowia komi masipato mombarata bagia nggari pura-pura nuapa to nipakasadiana ka todeana riara Poparentana to nareme.

¹³I'amo to nanggabasaka kita nggari kuasa karumauna pade nanggeni kita majadi todea Poparenta nu Anana to nipotowena.

¹⁴Nggari Anana etu kita nitolo, etumo silaka-silakata niampungimo.

¹⁵Kristus nasimbayu ntoto ewa Alatala to da'a namala nikita lenjena. I'amo to nireke Ana Ulumbua sabana kuasana neliu nggabete nggari pura-pura to nipajadi.

¹⁶Nggari I'amo pura-pura nuapa to naria ri langi bo dunia nipajadi, nabeloka to namala nikita, nabeloka anu da'a namala nikita, nabeloka malaeka-malaeka i Pue, nabeloka karampua-karampua, nabeloka seta-seta, nabeloka pue-pue ntanina. Pura-pura nuapa to naria nipajadi Kristus ala mombabila bo mompakabete I'a.

¹⁷Kristus naria mamimo tempo da'apa naria nuapa-nuapa ri langi bo dunia. Pade I'a nombakuasai bo nanggeniaka pura-pura etu.

¹⁸Pade I'a wo'u balengga nu todea topomparasaya to namala nipakasimbayu ewa korona mboto. I'amo pu'u katuwua todeana etu. I'amo to niuli Ana Ulumbua, etumo to pamulana natuwu bali nggari kamatena ala manoto I'amo to neliu nggakuasa nggari pura-pura nuapa to naria ri langi bo dunia.

¹⁹Sabana to nipodota Alatala ala pura-pura ingguna bo kuasana maria wo'u ri ja'i Anana.

²⁰Pade dota Alatala wo'u ala nggari Anana etu pura-pura nuapa to nipajadi mamala rapoposinggabelo bali ante I'a, nabeloka to naria ri dunia, nabeloka to naria ri langi. Pura-pura etu nipoposinggabelo bali ante Alatala nggari lei Kristus to natiti tempo I'a namate nipaku ri kayu parika.

²¹Bopia komi wo'u natuwu nakawao nggari ja'i Alatala. Komi najadi bali nu Alatala sabana pekirimu bo pokainggumu naja'a.

²²Tapi we'i-we'i ante kamate nu Anana mboto, komi nipoposinggabelo bali ante Alatala. Patujuna ala mompakagasa komi sampe mana ria sala bara kakura komi riara mpanggitana.

²³Etu kana majadi ane komi maroo momparasaya bo maroso mantuki i Pue ante da'a molengga-lengga pade da'a menonto manjarumaka pojanji-pojanji Alatala to niepe komi riara Kareba Belo. Kareba etu nipatolele sampe ri njumaongu dunia. Pade aku wo'u, i Paulus, nionggotaka najadi topompatolele Kareba etu.

²⁴Jadi sampesuwu-sampesuwu, we'i-we'i nadambamo raraku nombarasai kasusa bo kapari sabana pokarajaaku mantulungi komi. Ante nombarasai kasusa bo kapari riara koroku mboto aku mompakagana kasusa bo kapari to nipakatantu Kristus ka aku riara pokarajaaku mantulungi todea topomparasaya, etumo ira to najadi ewa koro Kristus mboto.

²⁵Aku najadi topantulungi todea topomparasaya sabana aku nionggotaka Alatala mantui bago to niparasayana ka aku, etumo mompasimbayu pura-pura Tesa nu Alatala ka komi.

²⁶Riara Tesa etu nipakanoto nia Alatala to nitabuniaka nggari njobu-njobu mpae naliu tapi we'i-we'i nipopanjanina ka todea topomparasaya I'a.

²⁷I'a madota mompopanjani ka ira niana to neliu nggabelo ka pura-pura manusia ri dunia. Niana etu iwe'i: Kristus kana matuwu riara nta'i komi sampe natantumo komi mombarata bagia riara kuasa bo kagaya nu Alatala to nipogumaa.

²⁸Jadi Kareba Kristus etumo to nipatolele kami ka pura-pura tau nantuki noto to naria ria ja'i kami. Kami nantewai bo nompatuduki ira pura-pura ala kami mamala manggeni ira mantingayo Alatala ante da'a maria kakura nuapa-nuapa sabana ira nosaongu rara ante Kristus.

²⁹Etu sampe aku nokarajaa ntomo, aku mpu'u-mpu'u nompasimbuku ante kuasa nggari ja'i Kristus to nokarajaa riara nta'iku ante naroso.