Read Da'a Kaili KOLOSE 2 Bible Online

KOLOSE 2 - Da'a Kaili bible

KOLOSE 2

¹To nipodotaku ala komi mangginjani iwenu katomona pokarajaaku nantulungi komi bo ira ri ngata Laodikia pade pura-pura tau to da'apa nosinjani ante aku.

²Patujuku nanguli iwetu ala rara komi pura-pura rapakaroso pade komi mosimpotowe samba'a bo samba'a sampe majadi mosaongu rara bo pekiri. Ante iwetu komi kana mpu'u-mpu'u mangginjani ante natantu pura-pura nia Alatala to nitabuniaka nggari lamba pamulana, etumo komi kana mosinjani belo ante Kristus mboto.

³Sabana Kristusmo pu'u nu pura-pura noto bo pangginjani to nabelona.

⁴Tesa etu kuuli ka komi ala ne'e maria tau manggeni komi masalanjala ante tesa-tesa to namomi.

⁵Sabana naupa aku mboto da'a naria ri tatongo komi, nirasaiku ewa aku bate-batena naria nosanggani-nggani ante komi. Pade nadamba mpu'u raraku nangepe lele to nanguli komi nosaongu rara bo naroo nomparasaya Kristus.

⁶Sampesuwu-sampesuwu, nitarima komimo Pue Yesus Kristus riara nggatuwu komi. Jadi komi kana tunggai matuwu mosaongu rara ante I'a.

⁷Komi kana maroo momparasaya I'a sampe majadi maroso nasimbayu ewa kayu to nandala kalena. Komi kana tunggai manjarumaka I'a sampe mantambai maroso nasimbayu ewa sapo nibangu mpakaroso. Komi kana mantambai maroso manjoko pepatuduki to nakonona to nipatuduki ka komi. Pade komi kana tunggai mosukuru ri ja'i Pue Alatala.

⁸Komi kana mainga ala ne'e maria tau mombabagiu komi pade mompasu'u komi mantuki pepatuduki agama to nasala bo da'a ntoto ria gunana. Sabana pepatuduki ira etu aga nopu'u nggari ja'i manusia, nggari ada-ada bo atura-atura ri dunia e'i. Tapi etu da'a nopu'u nggari ja'i Kristus.

⁹Jadi ne'e mantuki pepatuduki ira to nasala, sabana ri ja'i Kristus naria pura-pura inggu bo kuasa Alatala.

¹⁰Pade komi nosaongu rara ante Kristus sampe da'a ria kakura nuapa-nuapa ri ja'i komi, sabana pura-pura nuapa to naria ri ja'i Kristus naria wo'u ri ja'i komi. Pade Kristus neliu nggakuasa nggari pura-pura kuasa ntanina to naria ri langi bo dunia.

¹¹Tempo komi nosaongu rara ante Kristus komi ewa nisuna. Posuna komi etu da'a ewa ada mposuna to nipowia manusia, tapi etu powia Kristus riara nta'imu. Batuana komi nikabasakana nggari kuasa nu dota raramu to naja'a.

¹²Tempo komi nidiu ewa tandaina komi topomparasaya Kristus, komi ewa namatemo pade nitana nosanggani-nggani ante Kristus. Pade komi wo'u nipakatuwu bali mpasanggani-nggani ante Kristus, sabana komi nomparasaya kuasa Alatala to nompakatuwu bali Kristus nggari kamatena.

¹³Bopia tempo komi da'apa nomparasaya Kristus komi da ewa namate sabana komi bate-batena nombaliunaka Atura-atura nu Alatala. Komi batena nikuasai dota rara to naja'a. Tapi tempo etu komi ewa nipakatuwu Alatala bali mpasanggani-nggani ante Kristus. Pura-pura silakata niampunginamo.

¹⁴Ewa naria sura to nompakatantu pura-pura silaka to nipowiata. Kita nipangadu bo nipakasala isi sura etu. Tapi tempo Kristus namate nipaku ri kayu parika sura etu nipakalipo Alatalamo sampe kita mana nireke tau nasala.

¹⁵Pade tempo Kristus namate nipaku ri kayu parika, Alatala nombadagi pura-pura seta, karampua-karampua bo pue-pue ntanina to nakuasa. Ante kamate Kristus ri kayu parika Alatala nompakanoto ka njumaongu dunia I'amo padagi bo iramo to nidagina.

¹⁶Jadi sampesuwu-sampesuwu, ne'e mompariara nta'i tau to mompakasala komi sabana komi nanggoni bara nanginu to nipopali nantuki ada-ada ira. Ne'e mompariara nta'i tau to mompakasala komi sabana komi da'a nantuki eo bete agama Yahudi, ewa eo bete wula nggiki bo Eo Mpenonto.

¹⁷Sabana atura-atura bo ada-ada etu aga nombagambara anu to marata ri purina. Pade to narata ri purina etumo kabelona to niwai Kristus ka komi.

¹⁸Jadi ane maria tau mompakasala komi sabana komi da'a nantuki pepatuduki ira, ne'e rapariara nta'i komi tesa ira. Sabana ira aga tumoni-moni naede rara pade ira nombasomba malaeka-malaeka i Pue. Pade ira nanguli pepatuduki ira etu nakono sabana naria panggita nikita ira. Ira aga nompakalanga rara sabana pepatuduki ira nopu'u nggari pekiri ira mboto to nikuasai dota rara to naja'a. Tapi kakonona da'a masipato ira noinggu iwetu.

¹⁹Ira mana nanjarumaka Kristus to najadi balenggata. Kita topomparasaya namala rarapaka ewa koro Kristus. Ane ri koro manusia balengga to nombakuasai koro, pade pura-pura sipa nu koro niposiumpu bo niposidumpa ante karaua-karauana bo posidumpa nu wuku-wukuna ala majadi saongu. Iwetu wo'u kita topomparasaya. Kristus nompakasaongu kita pade nanggeniaka kita sampe mantambai eona mantambai maroso pomparasayata ewa to nipodota Alatala.

²⁰Tempo Kristus namate kita topomparasaya ewa namate wo'u nosanggani-nggani ante I'a, pade ante iwetu kita mana nisoko nu ada-ada bo atura-atura nggari dunia e'i. [1] Jadi ane iwetu, nokuya komi danatundu riara atura-atura etu nasimbayu ewa tau-tau danipatundu nu ada-ada ri dunia e'i?

²¹Nokuya komi danatundu riara atura-atura to nanguli, “Ne'e manjoko e'i”, “Ne'e mombajila panggoni etu! Ne'e mantui nuapa-nuapa to nipopali”?

²²Atura-atura etu da'a ria gunana ka kita sabana aga nantesa panggoni to nipake sampalai pade nalipo. Kakonona atura-atura etu aga nopu'u nggari parenta-parenta bo pepatuduki manusia.

²³Riara mpanggita manusia atura-atura etu mpu'u-mpu'u nabelo, sabana topantuki atura etu naraji nepue nantuki atura agama to nipakatantu ira mboto. Ira nompakaede rara pade nompandasa koro ira mboto. Tapi kakonona atura-atura etu da'a ntoto ria gunana manta'amaka dota rara manusia to naja'ana.