Read Da'a Kaili KOLOSE 3 Bible Online

KOLOSE 3 - Da'a Kaili bible

KOLOSE 3

¹Tempo Kristus nipakatuwu bali nggari kamatena kita topomparasaya wo'u ewa nipakatuwu bali mpasanggani-nggani ante I'a. Sabana etu pekirimo anu to naria ri suruga, peto'o Kristus nekatoko ri panggana nu Alatala.

²Komi kana tunggai mompekiri katuwumu to nabou nosanggani ante Kristus ri suruga. Ne'e aga mompekiri katuwumu ri dunia e'i.

³Sabana komi ewa namatemo pade we'i-we'i komi ewa natuwu nosanggani ante Kristus ri ngayo Alatala. Katuwumu to nabou etu da'apa namala nikita ntau we'i-we'i.

⁴Tapi tempo Kristus, to najadi pu'u katuwuata, marata bali ri dunia I'a kana mompopokita kuasa bo kagayana to nipogumaa. Pade komi wo'u kana manoto rakita mosanggani-nggani ka I'a ante kuasa bo kagayana etu.

⁵Sabana etu kabasakamo pokainggu-pokainggu to nopu'u nggari dunia to naja'a e'i. Jonjona, ne'e mana mogau sala ante tau da'a rongomu mboto, ne'e mowia pokainggu to nompakatantoru, ne'e mantuki dota raramu to naja'a bo dota-dota ntanina to da'a nabelo. Pade ne'e wo'u maino ka mbara-mbara ntau ante da'a mabasa-basa, sabana etu nasimbayu kaja'ana ante mepue ka pue-pue ntanina.

⁶Pokainggu-pokainggu ewa etumo to nompopeumba rau rara Alatala ka tau-tau da'a natundu ri ja'ina.

⁷Bopia pokainggu komi wo'u nasimbayu ewa etu tempo komi danikuasai inggu-inggu naja'a.

⁸Tapi we'i-we'i kabasakamo pura-pura pokainggu to naja'a. Ne'e mombaboli rau riara nta'imu, ne'e manggarau tau ntanina, ne'e momporau rara ntau, ne'e manguli sinja'i tau ntanina pade ne'e sampe maria tesa-tesa njilaka mesuwu nggari sumbamu.

⁹Ne'e komi mosipodawa samba'a bo samba'a, sabana nabalimo katuwu komi bopia. Nikabasaka komimo pokainggu-pokainggu to naja'a,

¹⁰pade nitarima komimo katuwua nabou. Komi nipajadi Alatala manusia nabou pade I'a bate-batena manggeni komi mompasiala ingguna mboto sampe kaopuna komi mpu'u-mpu'u mosinjani belo ante I'a.

¹¹Ane kita najadi manusia nabou mana ria posisalana ri olo tau-tau to Yahudi bo tau-tau da'a to Yahudi. Mana ria posisalana ri olo tau-tau nisuna nantuki ada-ada agama Yahudi bo tau-tau da'a nisuna iwetu. Mana ria tau nireke tolare bara tau da'a ria adana. Mana ria posisalana ri olo batua bo madika. To neliu nggapokona etumo Kristus, pade I'a neto'o riara nta'i pura-pura tau to nomparasaya I'a.

¹²Sampesuwu-sampesuwu, komi nipotowe Alatala pade nipelisina majadi todeana to nagasa. Etu sampe masipato komi maasi mata manggita roamu. Komi kana mabelo rara samba'a bo samba'a. Komi kana maede raramu, bo malusu pokainggumu, pade komi kana mandate posabaramu ane rapandasa.

¹³Ne'e masalisa makedi rara ri ja'i roamu, tapi ane maria posinggarau, posiampungimo komi samba'a bo samba'a. Ampungimo tau to mowia sala ri ja'imu nasimbayu ewa i Pue nombaampungi silakamu.

¹⁴Tapi to neliu nggapokona, komi kana mosipotowe samba'a bo samba'a. Sabana posipotowe etumo to mpu'u-mpu'u mompakasaongu rara todea topomparasaya.

¹⁵Komi kana tunggai mompaloga Kristus mombakuasai katuwu komi sampe komi bate-batena matuwu mosinggabelo samba'a bo samba'a. Sabana etumo patuju Alatala mompokio komi ala majadi saongu nasimbayu ante saongu koro to nadea sipana. Pade ne'e menonto manguli tarima kasi ka Alatala.

¹⁶Tesa-tesa Kristus kana raboli mpakabelo-belo riara nta'i komi sampe mpu'u-mpu'u moguna riara nggatuwumu. Jonjona: posipatuduki bo posipopanjanimo komi samba'a bo samba'a nantuki pura-pura noto to naria ri ja'imu. Podademo ante tesa-tesa nggari Buku Mazmur bo podade-podade to nantoiya Alatala bo podade-podade nggari ja'i Nosa Nagasa nu Alatala. Podademo ka Alatala ante mosukuru riara nta'imu.

¹⁷Pade nuapa-nuapa rapowia komi bara rauli komi, etu kana rapowia bo rauli ewa to masipato ka tau-tau to nomparasaya i Pue Yesus. Pade ulimo tarima kasi ka Umata Alatala riara sanga i Pue Yesus.

¹⁸Totu'a-totu'a besi, pekoumo ri ja'i rongomu langgai ewa to masipato ka besi-besi to nomparasaya i Pue.

¹⁹Pade totu'a-totu'a langgai, potowemo rongomu besi, ne'e moinggu makasara ri ja'ina.

²⁰Ngana-ngana, tukimo pura-pura parenta nu indo umamu sabana etumo pokainggu to nompakadamba rara i Pue.

²¹Pade sampesuwu-sampesuwu to najadi uma, ne'e mompakaju'a rara ana-anamu ala ne'e ira maopu rara.

²²Sampesuwu-sampesuwu to najadi batua, tukimo pura-pura parenta nu madikamu ri dunia e'i. Ne'e aga mantuki parentana tempo komi nikitana ala komi ratoiyana. Tapi tukimo parentana ante naliongu rara sabana komi nekou ri ja'i Pue.

²³Nuapa-nuapa raparenta ka komi, kawiamo etu ante mpu'u-mpu'u raramu nasimbayu ewa komi nantulungi i Pue da'a aga manusia.

²⁴Sabana ninjani komi i Pue mbotomo to mombabalasi pokainggu komi. I'a kana mombawai ka komi nuapa-nuapa to nijanjina ka ana-anana. Toramo! Kristusmo madika to nitulungi komi.

²⁵Pade isema-sema to mowia kaja'ana kana rabalasi ante pesuku to masipato ante kaja'ana etu, sabana i Pue da'a nanggita lenje.