Read Da'a Kaili KOLOSE 4 Bible Online

KOLOSE 4 - Da'a Kaili bible

KOLOSE 4

¹Sampesuwu-sampesuwu to najadi madika, komi kana moinggu manoa bo makono ri ja'i batua-batuamu, sabana ninjani komi mbotomo naria Madikamu ri suruga.

²Ne'e mabasa-basa mosambaya ka Pue Alatala ante mainga, pade ne'e menonto manguli tarima kasi ka I'a.

³Posambaya wo'u ka kami ala Alatala mombabuka jala ka kami mompatolele niana to nitabuniakana nggari nggaolu to nipakadupa Kristus. Sabana nggari pokarajaaku nompatolele tesa etumo sampe aku nitarunggu we'i-we'i.

⁴Jadi posambayamo ala aku mamala motarangga mpakanoto tesa Kristus etu, sabana etumo bago to masipato kupowia.

⁵Ane komi mosigalo ante tau-tau da'a topomparasaya komi kana moinggu manoto, pade pakemo loga to naria ri ja'imu.

⁶Ane komi motesa ka ira, tesa-tesamu kana malusu bo mabelo. Kana ranjani komi wo'u akala to masipatona mombasono pompekutana ira samba'a bo samba'a.

⁷Sampesuwu-sampesuwu, ane i Tikhikus marata ri ja'i komi, i'a kana mantesa mpakanoto ka komi ewa katuwuku ri se'i. I'a samba'a sampesuwu to nipotoweku. I'a wo'u samba'a roaku sampokarajaa bo batua i Pue to natutu nokarajaa nantulungi todea topomparasaya.

⁸I'a nipakauku mpaka ri ja'i komi ala komi mamala mangginjani ewa katuwu kami ri se'i, pade ala i'a mamala mompakaroso rara komi ri setu.

⁹Pade nosanggani ante i'a nipakauku wo'u Onesimus, sampesuwuta to nipotoweku to natutu nomparasaya. I'a samba'a nggari ngata komi mboto. Ira romba'a kana mompakanoto ka komi nuapa pura to najadi ri se'i.

¹⁰Tabe nggari ja'i Aristarkhus to nosanggani ante aku riara tarunggu ri se'i. Pade tabe nggari ja'i Markus sampesuwu i Barnabas. Toramo to nitewaiku ka komi bopia ewa i Markus etu. Ane i'a momai ri ja'i komi ri setu, tarimamo i'a ante mabelo.

¹¹Tabe wo'u nggari ja'i Yesus to nidae Yustus. Nggari tau-tau to Yahudi to nomparasaya aga ira tolumba'a etu to nokarajaa ante aku we'i-we'i mangelo tau majadi todea nu Poparenta nu Alatala. Iramo to mpu'u-mpu'u nompakaroso raraku.

¹²Pade tabe nggari ja'i Epafras, batua Yesus Kristus nggari ngata komi mboto. I'a tunggai nokarajaa ntomo nomposambaya komi pura-pura ala komi majadi topomparasaya to maroso pade ala komi maroo mantuki pura-pura dota Alatala.

¹³Aku mboto nanggita i'a nokarajaa ante mpu'u-mpu'u rarana nantulungi komi to neto'o ri ngata Kolose bo ira to neto'o ri ngata Laodikia bo ngata Hierapolis wo'u.

¹⁴Tabe wo'u nggari ja'i Dokutoro Lukas to nipotoweku, pade nggari ja'i Demas.

¹⁵Kuperapi pakasampe tabeku ka topomparasaya-topomparasaya ri ngata Laodikia, pade ka i Nimfa bo todea topomparasaya to nasiromu nodade ri sapona.

¹⁶Ane sura e'i naopu nibasa ri ngayo komi pura-pura, kuperapi ala rapakatu ka todea topomparasaya ri ngata Laodikia ala mamala rabasa ka ira ri setu wo'u. Iwetu wo'u komi kana mombabasa suraku to rapapola nggari ngata Laodikia ka komi.

¹⁷Pade ulimo ka Arkhipus, “Pakaopumo pokarajaa to niwai i Pue ka komi.”

¹⁸Tabe nggari ja'iku i Paulus. Kaopu nu sura e'i nitulisi ante paleku mboto. Toramo, aku dariara tarunggu. Perapi towe belo nu Alatala mosanggani ante komi pura-pura. Tabe nggari ja'iku, Paulus