Read Da'a Kaili 1 TESALONIKA 1 Bible Online

1 TESALONIKA 1 - Da'a Kaili bible

1 TESALONIKA 1

¹Sura e'i nggari ja'i kami tolumba'a, etumo, i Paulus, i Silas bo i Timotius, ka topomparasaya i Pue Yesus ri ngata Tesalonika to nosaongu rara ante Umata Pue Alatala bo Pue Yesus Kristus. Perapi Pue Alatala mombagane bo mombawai katuwua mabelo ka komi.

²Kami da'a nenonto nanguli tarima kasi ka Pue Alatala sabana katuwu komi pura-pura, pade kami tunggai nanggeni komi pura-pura riara posambaya.

³Tempo kami nosambaya ka Umata Pue Alatala kami batena nantora powia komi to nompopokita pomparasaya komi. Kami nantora iwenu komi nantulungi tau ntanina ante towe, pade nitora kami wo'u iwenu komi naroo rara tempo nipandasa ntau sabana komi bate-batena manjarumaka Pueta Yesus Kristus.

⁴Sampesuwu-sampesuwu to nipotowe Alatala, ninjani kami komi nipelisi Alatala najadi todeana.

⁵Nanotomo etu sabana tempo kami nompatolele Kareba Belo ka komi, etu da'a nipatolele kami ante tesa bayangi, tapi ante kuasa bo petulungi nggari ja'i Nosa Nagasa nu Alatala. Pade kami mboto nombarasai kuasa Alatala nokarajaa riara nta'i kami tempo kami nompatolele tesa etu ka komi. Ninjani komi mbotomo pokainggu kami tempo kami danaria ri tatongo komi ri setu. Kami noinggu iwetu ala manggeni belo ka komi.

⁶Pade komi nompasiala pokainggu kami etu bo pokainggu i Pue wo'u. Naupa komi nipandasa mpu'u komi nantarima Tesa nu Alatala ante nadamba rara. Nosa Nagasa nu Alatala mbotomo to nompakadamba rara komi.

⁷Etu sampe katuwu komi najadi jonjo to nipasiala pura-pura topomparasaya i Pue Yesus ri Propinsi Makedonia bo Propinsi Akhaya.

⁸Nompamula nggari ngata komi Tesa i Pue natolelemo sampe ri umba-umba ri Makedonia bo Akhaya. Pade da'a aga etu. Tesa ewa pomparasaya komi ka Alatala wo'u natiepe ri umba-umba. Ri umba polumako kami da'a paraluu kami motesa ka tau ewa pomparasaya komi, sabana tesa etu naopu ninjani ira.

⁹Ira mboto notesa ka kami iwenu komi nantarima kami tempo kami narata ri ja'i komi bopia. Pade nitesa ira wo'u iwenu komi nenonto mepue ka pue-pue ntanina pade nompamula mepue ka Alatala to natuwuna bo to nakonona.

¹⁰Nitesa ira wo'u iwenu komi nompopea karata Anana nggari suruga, etumo Yesus. I'amo to nipakatuwu Alatala bali nggari kamatena. Pade I'amo to mombakabasaka kita nggari pesuku Alatala to rapawela ka tau nasilaka banepiana.