Read Da'a Kaili 1 TESALONIKA 2 Bible Online

1 TESALONIKA 2 - Da'a Kaili bible

1 TESALONIKA 2

¹Sampesuwu-sampesuwu, ninjani komi mbotomo karata kami ri ja'i komi da'a narata bayangi, tapi nariamo aselena.

²Ninjani komi da'apa kami narata ri ngata komi, kami mpu'u-mpu'u nipandasa bo nipakaja'a ntau ri ngata Filipi. Tapi naupa nadea tau nangewa kami ri setu, Pue Alatalata nompakaroo rara kami ala kami nabia nompatolele ka komi Kareba Belo nggari ja'ina.

³Pepatuduki kami etu da'a nasala. Da'a wo'u naria patuju kami to naja'ana, atau patuju mombabagiu tau.

⁴Tapi kami nompatuduki ewa tau to nireke Alatala masipato raparasaya ka Kareba Belo etu. Kami da'a notesa ala mompakadamba rara manusia, tapi kami notesa ala mompakadamba rara Alatala, sabana I'amo to nomparesa rara nta'i kami.

⁵Ninjani komi mbotomo da'a ria sanggani kami nompadidi komi, pade da'a wo'u naria akala kami mantabuniaka patuju aga mompakauntu koro kami mboto. Alatala mbotomo mamala mantakono tesa kami e'i!

⁶Kami da'a wo'u miki ratoiya ntau, nabeloka komi, nabeloka tau-tau ntanina. Kakonona masipato kami rabila bo ratoiya komi sabana kami e'i suro-suro Kristus mboto.

⁷Tapi da'a iwetu patuju kami. Tempo kami naria ri tatongo komi ri setu, kami nalusu rara nasimbayu ewa samba'a indo to nompatomi bo nompotowe anana mboto.

⁸Nabete mpu'u pepotowe kami ka komi, sampe kami nasadia nompatolele Kareba Belo ka komi. Pade neliu nggari etu, kami wo'u nasadia mamate mantulungi komi, sabana kami mpu'u-mpu'u nompotowe komi!

⁹Sampesuwu-sampesuwu, tantu danitora komi iwenu kami nokarajaa ntomo ri tatongo komi. Eo wengi kami nokarajaa ala ne'e mompakatomo komi mompekiri katuwu kami tempo kami nompatolele ka komi Kareba Belo nggari ja'i Alatala.

¹⁰Pokainggu kami ri ja'i komi to nomparasaya i Pue Yesus nagasa bo nanoa, pade da'a ria nuapa-nuapa to masipato rasalai. Komi mbotomo bo Alatala wo'u namala mantakono pokainggu kami etu.

¹¹Ninjani komi mbotomo kami tunggai nompatuduki komi nasimbayu ewa samba'a uma nompatuduki anana mboto. Kami nompakaroso rara komi pade kami tunggai nompopatora ka komi ala matuwu masipato ewa samba'a topomparasaya Alatala. I'amo to nompokio komi majadi todea riara poparentana, ala komi mombarata bagia riara kareme bo kagayana to nipogumaa.

¹³Naria sangelepa ntanina sampe kami da'a nenonto nanguli tarima kasi ka Alatala. Etumo tempo komi nangepe Tesa nu Alatala to nipatolele kami ka komi, tesa etu da'a nireke komi aga tesa manusia. Tapi etu nitarima komi ewa tesa nggari ja'i Alatala mboto. Pade etu mpu'u-mpu'u Tesa nu Alatala to nokarajaa riara nggatuwu komi to nomparasaya i Pue Yesus.

¹⁴Sampesuwu-sampesuwu, nuapa to najadi ri ja'i komi nasimbayu ewa to najadi ri ja'i todea topomparasaya Yesus Kristus ri Bagia Yudea. Komi wo'u nipandasa roamu nggari ngata komi mboto nasimbayu ewa ira nipandasa roa ira to Yahudi ri ngata ira mboto.

¹⁵Tau-tau to Yahudi wo'u nompatesi i Pue Yesus bo nabi-nabi nu Alatala pade nompandasa kami wo'u. Ira da'a ntoto nompakadamba rara Alatala, pade ira nobali ka pura-pura tau

¹⁶ante nombalawa kami mompatolele Kareba Belo ka tau da'a to Yahudi ala ira mamala rapakasalama. Ante powia ira etu, silaka ira to Yahudi bate-batena natetambai sampe nadea gagamo. Kaopuna ira nawela pesuku nu Alatala.

¹⁷Tapi, sampesuwu-sampesuwu, nompamula nggari tempo kita nipopoga'a sampalai, nalentora mpu'u rara kami manggita komi. Naupa kita nosinggakawao peto'o, kami batena nalentora nompekiri komi. Jadi ante mpu'u-mpu'u rara kami nompasimbuku masalisa momai mantalioda komi.

¹⁸Naria mamimo nia kami momai ri ja'i komi. Aku mboto nompasimbuku momai ri ja'i komi bara sakuya ngganimo, tapi Magau nu Seta batena nombalawa kami.

¹⁹Nalentora mpu'umo rara kami manggita komi, sabana komimo to nompakadamba rara kami. Komimo to niposabana sampe nariamo panjarumaka kami to natantuna mompopea karata i Pue Yesus bali ri dunia. Kami kana madamba-damba ri ngayona banepia sabana nariamo asele pobago kami.

²⁰Mpu'u-mpu'u nggari komimo sampe kami kana rabila ri ngayo i Pue Yesus. Nggari komimo sampe nadamba mpu'u rara kami.