Read Da'a Kaili 1 TESALONIKA 4 Bible Online

1 TESALONIKA 4 - Da'a Kaili bible

1 TESALONIKA 4

¹Sampesuwu-sampesuwu, kapolana kami merapi bo mompopatora ka komi ante kuasa to niwai i Pue Yesus ka kami, tukimo pepatuduki to niepe komi nggari ja'i kami to nompakanoto pokainggu nuapa to masipato rakawia komi ala mompakadamba rara Alatala. Kakonona, pokainggu komi nantuki pepatuduki etu. Tapi kami merapi ka komi, ratambaipa pokainggu komi to nabelona etu.

²Sabana ninjani komimo atura-atura to nipatuduki kami ka komi ante kuasa nggari ja'i Pue Yesus.

³Iwe'imo dota rara Alatala: komi kana matuwu ante pokainggu to nagasana, bo ne'e mogau sala mosampaturu ante tau da'a rongomu mboto.

⁴Butu mba'a langgai nggari tatongo komi kana mangginjani iwenu matuwu mosanggani-nggani ante rongona ante pokainggu to nagasa bo masipato ratoiya.

⁵Ne'e komi matuwu mantuki dota rara to naja'a nasimbayu ewa pokainggu ntau da'a nangginjani Alatala.

⁶Ri pokainggu langgai bo besi, ne'e komi mompowia silaka ri ja'i sampesuwumu, ne'e mombabagiu i'a ante mangala rongona, sabana Alatala kana mombasuku pura-pura tau to nompowia sala ewa etu. Etu pura-pura nipatuduki bo nipopatora kami ka komi bopia.

⁷Alatala da'a nompokio kita ala mogau sala ante tau da'a rongota mboto. Tapi I'a nompokio kita ala matuwu ante pokainggu to magasa.

⁸Jadi isema-sema to nompoara pepatuduki e'i da'a nompoara pepatuduki manusia, tapi ira nompoara pepatuduki Alatala to nombawai Nosana to Nagasa ka komi.

⁹Sampesuwu-sampesuwu, da'a paraluu aku mantulisi ka komi ewa posipotowe samba'a bo samba'a, sabana Alatala mbotomo nompatuduki etu ka komi.

¹⁰Kakonona nosimpotowemo komi ante pura-pura topomparasaya i Pue Yesus ri njumaongu Propinsi Makedonia. Tapi kami merapi ka komi ante mpu'u-mpu'u, ratambaipa posipotowe komi etu.

¹¹Pasimbukumo matuwu malino mompasiayu bagomu mboto. Ne'e mombagalo urusa tau ntanina. Pokarajaamo mangelo katuwua komi mboto ewa to niparenta kami ka komi bopia.

¹²Ane komi matuwu iwetu, komi kana rabila tau-tau to da'a nomparasaya i Pue Yesus, pade komi da'a metimbaloe ka tau-tau ntanina.

¹³Sampesuwu-sampesuwu, to nipodota kami ala komi mangginjani nuapa kakono-konona majadi ante tau-tau to namatemo ala ne'e komi masusa rara nasimbayu ewa tau-tau ntanina to da'a ria panjarumakana.

¹⁴Kita nomparasaya i Pue Yesus namate natuwu bali. Iwetu wo'u topomparasaya i Pue Yesus to namatemo. Ira kana rapakatuwu Alatala bali nggari kamatena pade rakeni mpasanggani-nggani ante i Pue Yesus.

¹⁵Pepatuduki kami e'i nggari ja'i Pue mboto. Tempo I'a marata bali ri dunia, kita to danatuwu tempo etu da'a meore mosirata ka I'a mokolu ka roa-roata to namatena.

¹⁶Tempo parenta rawai bo tadulako malaeka mongare ante suara to namangga bo kololio Alatala rapopomoni, tempo etu wo'u i Pue Yesus mboto kana mana'u nggari suruga. Pade topomparasaya Kristus to namatemo kana matuwu bali.

¹⁷Naopu etu kita to danatuwu tempo etu kana raore mpasanggani-nggani ante ira riara kulimu mosirata ka i Pue Yesus ri laerawa. Pade kita kana matuwu mpasanggani-nggani ante i Pue sampe ri kasae-saena.

¹⁸Sabana etu, sampesuwu-sampesuwu, posipakawoemo rara komi samba'a bo samba'a ante pepatuduki e'i.