Read Da'a Kaili 1 TESALONIKA 5 Bible Online

1 TESALONIKA 5 - Da'a Kaili bible

1 TESALONIKA 5

¹Sampesuwu-sampesuwu, da'a paraluu kami mantulisi ka komi mompakanoto ewa tempo to natantuna kajadia-kajadia etu pura-pura majadi.

²Ninjani komi mboto ante nanoto karata i Pue Yesus banepia masimbayu ewa karata samba'a topangangga tempo nggawengina ante da'a ninjani-njani ntau.

³Tempo tau-tau aga manguli, “Katuwuta ri dunia nabelo pura, da'a ria nuapa-nuapa to rapokaekata,” ri tempo etumo ira kaliu-liu rasuku. Da'a ntoto maria jala ira malai nggari kasusa etu. Etu kana majadi ante da'a ninjani-njani ira, nasimbayu ewa ju'a samba'a besi ntora moana.

⁴Tapi sampesuwu-sampesuwuku, komi da'a natuwu ri karumauna ewa tau-tau to da'a nomparasaya. Jadi komi da'a rapakatikaja ante karata i Pue Yesus nasimbayu ewa tau rapakatikaja ante karata samba'a topangangga tempo nggawengina.

⁵Komi pura-pura tau to natuwu riara karemena, komi nompowia to nabelona nasimbayu ewa powia ntau ri eona. Kita da'a natuwu ri karumauna, kita da'a nompowia to naja'ana nasimbayu ewa to nipowia ntau tempo nggawengina.

⁶Jadi kita kana mainga bo manoto rarata. Ne'e makanjalia nasimbayu ewa tau-tau to da'a nomparasaya Alatala.

⁷Tau ri karumauna aga nalumpi bo nalangu sampe mana nanoto rarana.

⁸Tapi kita tau to natuwu riara karemena. Etu sampe kita masipato manoto rarata. Kita kana maroo momparasaya Alatala pade mompotowe tau-tau ntanina ala kita maroso nasimbayu ewa tantara to nobaju ase. Kita kana maroo manjarumaka Alatala mompakasalama kita ala kita maroso ewa tantara nosonggo waja.

⁹Sabana Alatala nompelisi kita da'a ala rasuku tapi ala rapakasalama ante momparasaya Pueta Yesus Kristus.

¹⁰I'a namate nantolo silakata ala tempo I'a marata bali ri dunia nau kita damatuwu atau namatemo tempo etu, kita mamala matuwu mpasanggani-nggani ante I'a.

¹¹Sabana etu, sampesuwu-sampesuwu, posipakawoemo rara komi, bo posipakarosomo pomparasaya komi samba'a bo samba'a ewa to nipowia komi mami we'i-we'i.

¹²Sampesuwu-sampesuwuku, kami mpu'u-mpu'u merapi ala komi mombabila topanggeniaka-topanggeniaka to nokarajaa ntomo ri tatongo komi, etumo ira to nipelisi i Pue manggeniaka bo mompatuduki komi.

¹³Bilamo bo potowemo ira ante mpu'u-mpu'u rara, sabana ira mpu'u-mpu'u nokarajaa nantulungi komi. Pade katuwumo mosinggabelo ante pura-pura roamu.

¹⁴Kami wo'u merapi ka komi, uli ka tau-tau nasondo rarana, ira kana mokarajaa. Pakaroomo rara tau-tau to naeka rarana. Tulungimo tau-tau to nalente pomparasayana. Posabaramo komi ri ja'i ntau pura-pura.

¹⁵Pakabelo-belo, ne'e sampe maria komi mombabalasi powia to naja'ana ante kaja'ana, tapi tunggai mompasimbuku mowia to nabelona ka roa-roa komi pade ka pura-pura tau ntanina.

¹⁶Ne'e menonto madamba-damba.

¹⁷Ne'e mabasa mosambaya.

¹⁸Pade posukurumo ri ja'i Alatala riara mpengele-ngele, sabana etumo dota rarana ka komi to nosaongu rara ante Yesus Kristus.

¹⁹Ne'e manta'amaka powia Nosa Nagasa nu Alatala.

²⁰Ne'e manjapuaka tesa nggari ja'i Nosa Nagasa nu Alatala to nipasimbayu roamu,

²¹tapi ujimo pura-pura tesa etu. Pade tukimo nuapa to nabelona.

²²Pakakawao koro komi nggari mpengele-ngele to naja'ana.

²³Perapi Pue Alatala mboto, pu'u katuwua mabelo, mompakagasa pura-pura katuwu komi sampe komi mpu'u-mpu'u magasa riara mpanggitana. Perapi Pue mombajagai pura-pura katuwu komi, nabeloka nosamu, nabeloka wayomu, nabeloka koromu sampe da'a ntoto maria inggumu to nasalana tempo Pueta Yesus Kristus marata bali ri dunia.

²⁴Alatala nompokio kita majadi todeana. Jadi I'amo to mompowia etu pura-pura ka komi sabana I'a namala raparasaya.

²⁵Sampesuwu-sampesuwu, tulungi posambaya wo'u ka kami.

²⁶Pakasampe tabe kami ka pura-pura topomparasaya i Pue Yesus ri setu ante towe.

²⁷Ante kuasa to niwai i Pue aku momparenta komi ala sura e'i rabasa ka pura-pura topomparasaya i Pue Yesus ri setu.

²⁸Perapi Pueta Yesus Kristus mombagane komi pura-pura. Tabe nggari ja'iku, Paulus