Read Da'a Kaili 2 TESALONIKA 2 Bible Online

2 TESALONIKA 2 - Da'a Kaili bible

2 TESALONIKA 2

¹Sampesuwu-sampesuwu, kami madota mompakanoto ka komi nuapa majadi tempo Pueta Yesus Kristus marata bali ri dunia pade kita raore rapasiromu mpasanggani-nggani ante I'a. Kami merapi,

²ne'e komi masasinta gaga maingu atau mawiora rara ane komi mangepe kareba to nanguli narata balimo i Pue Yesus. Ne'e komi maingu naupa maria tau manguli ka komi etu tesa nggari ja'i Nosa Nagasa, atau ira manguli etu to niuli kami atau to nitulisi kami riara sura.

³Nau bara iwenu ntoto kareba etu, ne'e sampe komi mamala rabagiu, sabana da'apa eo etu marata naria rongele kana majadi ntanimo ruru. Pamulana, nadea mpu'u tau kana mombasapuaka bo mangewa Alatala. Pade karongelena, tau to niuli Topangewa Alatala kana meumba. I'a kana mompakalanga korona bo mangewa pura-pura nuapa to nipesomba manusia atau to nireke manusia ewa alatala. Da'a aga iwetu, tapi kaopuna i'a kana mesua mekatoko ri Sapo Mpepue pade manguli i'a mbotomo Alatala. Tapi natantumo i'a kana ratajiaka riara naraka banepia. [1]

⁵Sampesuwu-sampesuwu, natantu nitora komi nuapa pura to nipatudukiku ka komi ewa etu tempo aku danaria nosanggani-nggani ante komi.

⁶Pade ninjani komi Topangewa Alatala etu da'apa neumba sabana we'i-we'i danaria sangele nombalawa i'a. Ninjani komi mbotomo nuapa to nombalawa i'a. Jadi ane marata tempona to nipakatantu Alatala, Topangewa Alatala etu kana meumba.

⁷Kuasa naja'a to nombakuasai i'a nompamula nokarajaa nggalino ri dunia we'i-we'i, tapi korona mboto da'apa neumba sabana i'a danilawa. I'a bate-batena ralawa sampe ri tempo topelawa etu rakaliaka.

⁸Aga maopu etu pade i'a meumba. Tapi tempo i Pue Yesus marata ante kuasana to nipogumaa, I'a kana mompatesi Topangewa Alatala etu. Pue Yesus kana mompakaropu i'a ante nosa nggari sumbana.

⁹Topangewa Alatala etu kana meumba ante kuasa Magau nu Seta pade i'a kana mombabagiu tau ante mompowia mpengele-ngele kabaraka bo tandai-tandai to nipogumaa.

¹⁰I'a kana mompake mpengele-ngele akala to naja'a mombabagiu tau-tau to masipato rasuku Alatala. Ira masipato rasuku Alatala sabana ira da'a madota mantarima bo mompotowe pepatuduki to nakonona nggari ja'i Alatala to namala mompakasalama ira.

¹¹Etu sampe Alatala kana mompakatu ka ira sangele kuasa to mombabagiu ira sampe ira momparasaya dawa nu Topangewa Alatala etu.

¹²Alatala kana mowia iwetu ala pura-pura tau to da'a nomparasaya pepatuduki to nakonona tapi aga nompokono to naja'ana kana rasuku.

¹³Jadi sampesuwu-sampesuwu to nipotowe i Pue, masipato kami da'a nenonto manguli tarima kasi ka Alatala sabana katuwu komi. Kami kana manguli tarima kasi sabana Alatala nompelisi komi nggari lamba pamulana ala komi rapakasalamana. Etu pura-pura najadi nggari powia Nosa Nagasa riara nggatuwu komi ala mompakajadi komi todea Alatala to nagasana. Pade etu najadi sabana komi nomparasaya pepatuduki to nakonona.

¹⁴I'a nompokio komi majadi todeana nggari Kareba Belo to nipatolele kami ka komi. Patujuna ala komi mamala mombarata bagia riara kuasa bo kagaya Pueta Yesus Kristus.

¹⁵Jadi sampesuwu-sampesuwu, sabana etu, pakaroso pomparasaya komi. Komi kana tunggai mantuki pepatuduki to nipatolele kami ka komi, nabeloka to nitesa kami ante sumba, nabeloka to nitulisi kami riara sura.

¹⁶Pue Alatala nompotowe kita pade nggari towe belona mboto I'a nompakaroo rarata sampe ri kasae-saena, pade nombawai ka kita panjarumaka to nabelona. Perapi Pueta Yesus Kristus mboto bo Umata Pue Alatala mompakawoe bo mompakaroso rara komi ala komi tunggai mowia bo motesa nuapa to nabelona.