Read Da'a Kaili 2 TESALONIKA 3 Bible Online

2 TESALONIKA 3 - Da'a Kaili bible

2 TESALONIKA 3

¹Kapolana sampesuwu-sampesuwu, posambayamo ka kami to nompatolele Tesa nu Alatala, ala Tesa etu masasinta matolele pade ratarima bo rabila ntau ante nabelo nasimbayu ewa etu nitarima bo nibila komi bopia.

²Posambaya wo'u ka kami ala kami mamala rakabasaka nggari ja'i tau-tau to nadenggo bo naja'a rarana, sabana da'a pura-pura tau nomparasaya Tesa nu Alatala.

³Tapi da'a ria kaopuna petulungi i Pue. I'a bate-batena mompakaroso rara komi bo mombajagai komi nggari kuasa Magau nu Seta.

⁴Pue to nanggeniaka komi. Jadi etumo sabana natantumo ka kami nuapa to nitewai kami ka komi, etu nituki komi we'i-we'i, pade etu bate-batena ratuki komi.

⁵Perapi Pue mompoewu komi sampe komi mpu'u-mpu'u mangginjani towe Alatala ka komi pade komi maroo rara nasimbayu ewa karoo rara Kristus mboto.

⁶Sampesuwu-sampesuwu, ante kuasa to niwai Pue Yesus Kristus ka kami, kami momparenta komi, ne'e ntoto mowega ante topomparasaya to nasondo rarana mokarajaa pade da'a nantuki pepatuduki to nipatuduki kami ka komi.

⁷Ninjani komi mbotomo pokainggu kami bopia kana masipato rapasiala komi. Kami da'a nasondo rara nokarajaa tempo kami naria ri tatongo komi.

⁸Kami da'a wo'u nanggoni panggoni ntau anu da'a nibayari kami. Tapi eo wengi kami nokarajaa ntomo ala ne'e mompakatomo komi mompekiri katuwu kami.

⁹Kakonona masipato kami merapi tulungi ka komi. Tapi kami da'a madota, sabana kami madota mompopokita ka komi saongu jonjo to namala rapasiala komi.

¹⁰Da'a aga iwetu. Tempo kami danaria ri tatongo komi bopia, kami nomparenta komi iwe'i: “Isema-sema da'a madota mokarajaa, ne'e rapakoni i'a.”

¹¹Sampesuwu-sampesuwu, kami nantulisi tesa e'i ka komi sabana niepe kami naria tau-tau ri setu to nasondo rarana. Ira da'a nasiwu nokarajaa, ira aga nasiwu-siwu mombabago roa-roa ira.

¹²Jadi ante kuasa to niwai Pue Yesus Kristus ka kami, kami momparenta bo mompopatora tau-tau etu, “Pokarajaamo komi ante malino mopaelo katuwua komi mboto.”

¹³Tapi sampesuwu-sampesuwu pura-pura, kami manguli ka komi, “Ne'e mabasa mowia to nabelona.”

¹⁴Ane maria tau da'a madota mantuki tesa to nitulisi kami riara sura e'i, pariara nta'imo i'a. Ne'e mowega ante i'a ala kaopuna maeya mboto matana.

¹⁵Aga ne'e rareke i'a bali komi, tapi patudukimo i'a ewa samba'a sampesuwumu.

¹⁶Perapi Pue mboto bate-batena mombawai ka komi katuwua mabelo riara mpengele-ngele, sabana I'amo pu'u katuwua to nabelona etu. Perapi Pue mosanggani-nggani ante komi pura-pura.

¹⁷Tabe nggari ja'iku i Paulus. Kaopuna sura e'i nitulisiku ante paleku mboto. Etumo tandaina to nitulisiku riara pura-pura suraku ala ranjani komi sura e'i nggari ja'iku mboto. Etumo akalaku mantulisi sura.

¹⁸Perapi Pueta Yesus Kristus mombagane komi pura-pura. Tabe nggari ja'iku, Paulus