Read Da'a Kaili 1 TIMOTIUS 1 Bible Online

1 TIMOTIUS 1 - Da'a Kaili bible

1 TIMOTIUS 1

¹Sura e'i nggari ja'iku i Paulus, ka i Timotius to najadi ewa anaku mboto sabana nomparasaya i Pue Yesus. Aku e'i najadi suro Yesus Kristus nantuki parenta Alatala, Magau to Mompakasalama kita bo Pue Yesus Kristus to nisarumakata. Perapi Umata Pue Alatala bo Pueta Yesus Kristus mombagane komi bo mompopokita asi mata ri ja'i komi bo mombawai katuwua mabelo ka komi.

³Komi kana maroo meto'o ri ngata Efesus ewa to nitewaiku ka komi bopia tempo aku nanggaliwo mpaka ri Propinsi Makedonia. Komi kana maroo ri setu ala mompatuduki tau-tau to nompatolele pepatuduki to nasala ala ira menonto mompatuduki etu.

⁴Pade patuduki ka ira wo'u ne'e mana mompariara tesa-tesa kabali to nipetowali manusia bo tuntu-tuntu ntotu'a nggaolu to da'a ria kaopu-opuna. Tesa-tesa etu aga nompopeumba posinggarau pade da'a nanggeni tau mangginjani nia Alatala. Niana etu aga namala ranjani ante momparasaya i Pue.

⁵Patuju tewaiku e'i ala topomparasaya mosipotowe samba'a bo samba'a. Etu kana majadi ane ira maliongu rara bo magasa rara nta'i bo mpu'u-mpu'u momparasaya i Pue.

⁶Naria bara sakuya mba'a tau mana matuwu ante inggu iwetu. Ira aga notesa-tesa anu da'a ria batuana.

⁷Ira madota majadi guru to mompatuduki Atura-atura agama to nipapola i Musa, tapi ira mboto da'a nangginjani batuana tesa-tesa to nipake ira bo nuapa-nuapa to nisowadaka ira ante nakono.

⁸Ninjanita tesa nggari Atura-atura agama nabelo ane rapake ante nanoa.

⁹Pade ninjanita wo'u Atura-atura etu da'a nipowia ka tau-tau to nanoana tapi ka tau-tau to nadenggona, ka tau-tau to nawatu, tau-tau da'a nantuki dota Alatala, tau-tau to nasilaka, tau-tau da'a nagasa pokaingguna, tau-tau da'a nombabila Alatala, tau-tau to nompatesi indo umana, pade pura-pura topepatesi ntanina.

¹⁰Atura etu nipowia ka tau-tau nogau sala ante tau da'a rongona mboto, tau-tau to nosiporongo mbau langgai bo mbau besi, topanga'e, topodawa, sabi-sabi topodawa, pade ka isema-sema to nanggawia pura-pura pokainggu to da'a masipato ante pepatuduki to nakonona.

¹¹Pepatuduki to nakonona etu naria riara Kareba Belo to niparasaya ka aku, etumo Kareba Belo to nakuasa nggari ja'i Alatala to masipato ratoiya.

¹²Aku notarima kasi ka Pueta Yesus Kristus to nombawai pompakule ka aku mantulungi tau mangginjani Kareba Belo etu, sabana nipekirina aku namala raparasaya mantui bago etu.

¹³Tempo bopia aku e'i nompakakedi I'a, aku nompandasa bo nanjalai I'a. Tapi naupa iwetu Alatala nompotowe aku, sabana ri tempo etu aku da'apa nomparasaya I'a, da'apa nanoto ka aku powiaku etu naja'a.

¹⁴Pade towe belo nu Pueta nipopelabina ka aku nosanggani-nggani ante pomparasaya bo towe nggari ja'i Yesus Kristus.

¹⁵Naria tesa to nakono mpu'u bo masipato ratarima bo raparasaya pura-pura tau iwe'i: “Yesus Kristus narata ri dunia e'i ala mompakasalama tau-tau to nasilaka.” Pade nggari pura-pura tau nasilaka akupa to neliu silakana.

¹⁶Tapi etumo sabana aku nipotowe Alatala ala Yesus Kristus namala mompopokita posabarana to da'a ria kaopu-opuna ri ja'iku to neliu nggaja'a. Ante iwetu aku najadi jonjo ka pura-pura tau ntanina to momparasaya I'a banepia pade mombarata katuwua mabelo sampe ri kasae-saena.

¹⁷Alatalamo Magau nggari lamba pamulana sampe ri kasae-saena. I'a da'a ria mamate-mate, I'a da'a namala rakita, aga I'amo Alatala to nakonona. I'amo to masipato rabila bo ratoiyata sampe ri kasae-saena. Amin!

¹⁸Timotius, anaku, bago etu kuparasaya ka komi nantuki tesa nu Alatala to nipasimbayu nabi-nabina nosinggawela ante katuwu komi. Tesa etu kana majadi ewa bakumu mompakaroso komi mantui bago to nabelo etu ewa samba'a tantara to naroso nangewa balina.

¹⁹Tuimo bago etu ante pomparasaya to naroso bo rara nta'i to nagasa. Naria tau da'a nantuki rara nta'ina to nagasa sampe nageromo pomparasayana.

²⁰Romba'a nggari tatongo ira etumo i Himeneus bo Aleksander. Ira romba'a niwaikumo ka Magau nu Seta ala ira rapatuduki ne'e mana mompakakedi Alatala.