Read Da'a Kaili 1 TIMOTIUS 2 Bible Online

1 TIMOTIUS 2 - Da'a Kaili bible

1 TIMOTIUS 2

¹Jadi iwe'imo tewaiku pamulana: todea topomparasaya kana merapi ka Alatala nuapa-nuapa to niparaluu pura-pura tau, ira kana momposambaya pura-pura tau, ira kana mekakai ka Alatala ala mantulungi pura-pura tau, pade ira kana mosukuru ka Alatala sabana petulungina ka pura-pura tau.

²Ira kana momposambaya magau-magau bo pura-pura tau to nipakakuasa ala kita mamala matuwu masana bo mosinggabelo ante mpu'u-mpu'u mantuki dota Alatala bo moinggu mabelo.

³Masipato kita mosambaya iwetu sabana etumo powia to nabelo to nompakadamba rara Alatala, Magau to Mompakasalama kita.

⁴I'a madota ala pura-pura tau mamala rapakasalama bo mangginjani pepatuduki to nakonona.

⁵Sabana aga samba'a lau Alatala pade aga samba'a lau wo'u tau ntongo to nompoposinggabelo Alatala ante manusia, etumo samba'a manusia to nosanga ka Yesus Kristus.

⁶I'a nombawai korona mboto rapatesi ala mantolo silaka pura-pura manusia. Ante iwetu, ri tempo to natantuna, Alatala nompakanoto ka pura-pura manusia I'a madota mompakasalama ira.

⁷Pade etu sampe aku nionggotaka Alatala majadi topompatolele Kareba Belo, pade nisurona malau mompatuduki tau-tau da'a to Yahudi ala ira momparasaya pepatuduki to nakonona. To nitesaku e'i nakono mpu'u, aku da'a nodawa!

⁸Jadi aku madota ala langgai ri umba-umba mosambaya ante mangonggotaka palena to nagasa ante da'a ria rau rara bara posinggarau.

⁹Iwetu wo'u aku madota ala besi-besi mompakaramba koro ira ante akala to malusu bo masipato. Ira kana mompake pakea to da'a nepakaeya. Ne'e mompengaya-ngaya wo'o. Ne'e wo'u mompake ramba-ramba bulawa, mutiara bo pakea to nasuli-sulina.

¹⁰Aginapa ira mompakaramba koro ira ante pokainggu to nabelo ewa to masipato ka besi to nompangaku korona topomparasaya Alatala.

¹¹Besi-besi kana mangepe pepatuduki mpakabelo-belo ante mekalino pade mekou ri ja'i topanggeni podade.

¹²Aku da'a nompaloga besi-besi mompaguru atau momparenta langgai. Ira kana mekalino,

¹³sabana to nipajadi Alatala pamulana i'amo Adam, pade naopu etu i Hawa.

¹⁴Pade da'a Adam to nibagiu Magau nu Seta, aga i Hawa sampe i'a nombaliunaka parenta Alatala.

¹⁵Tapi naupa iwetu, besi-besi kana rapakasalama sabana moana [1] ane ira maroo momparasaya, mompotowe tau-tau ntanina pade matuwu ante pokainggu to magasa bo masipatona.