Read Da'a Kaili 1 TIMOTIUS 4 Bible Online

1 TIMOTIUS 4 - Da'a Kaili bible

1 TIMOTIUS 4

¹Nosa Nagasa nu Alatala nanguli ante nanoto iwe'i: Tempo namosu kaopu nu dunia banepia kana maria tau to mokanggaura momparasaya. Ira mantuki seta-seta topebagiu pade momparasaya pepatuduki to nopu'u nggari ja'i seta-seta.

²Pepatuduki etu rakeni ntau aga nabelo ri lenje bo nodawa. Rara nta'i ira narumaumo.

³Ira kana mompatuduki tau ala ne'e mana morongo bo ne'e mana manggoni bara sakuya ngele panggoni to nipakatantu. Tapi kakonona panggoni etu nipajadi Alatala ala rakoni ntau to nomparasaya pade nangginjani pepatuduki to nakonona. Panggoni etu namala rakonita ante manguli tarima kasi ka Alatala,

⁴sabana pura-pura to nipajadi Alatala nabelo. Da'a ria sangele to nipopali ane rakonita ante manguli tarima kasi ka Alatala,

⁵sabana panggoni etu nipakagasa ante posambaya nantuki Tesa nu Alatala.

⁶Timotius, ane komi mompatuduki pura-pura etu ka topomparasaya komi majadi batua Yesus Kristus to nabelona. Etu kana majadi ane komi batena mantuki tesa-tesa agama Karistee to napokona bo pepatuduki-pepatuduki to nakonona ewa to nitukimu sampe we'i-we'i.

⁷Tapi pakakawaomo nggari tesa-tesa kabali to da'a ria gunana to nipetowali manusia. Komi kana mompopobiasa koromu matuwu ante pokainggu to nantuki dota Alatala.

⁸Sabana mombalati koro batata aga sakedi lau gunana. Tapi matuwu mantuki dota Alatala nadea mpu'u gunana riara mpengele-ngele. Ante matuwu nantuki dota Alatala kita mombarata rasi to nijanjina, etumo katuwua mabelo nompamula we'i-we'i sampe ri kasae-saena.

⁹Tesa e'i mpu'u-mpu'u nakono bo masipato ratarimata bo raparasayata pura-pura.

¹⁰Etu sampe kita nompasimbuku ante mpu'u-mpu'u rara pade nokarajaa ntomo, sabana kita nanjarumaka Alatala to Natuwuna. I'amo Magau to Mompakasalama pura-pura manusia, neliu-liupa ira to nomparasaya I'a.

¹¹Patudukimo pura-pura etu pade pakaumo topomparasaya mantuki pepatuduki etu.

¹²Ne'e sampe maria tau manjauru komi sabana komi danamuda. Tapi popokitamo jonjo ka topomparasaya riara tesamu, riara pokainggumu, riara towemu, pade riara pomparasayamu bo kagasa katuwumu.

¹³Pade tempo komi mompopea karataku, komi kana maraji mombabasa Buku Nagasa ka todea topomparasaya. Popatoramo ira ala mantuki tesa etu, pade patudukimo ka ira pepatuduki to nakonona.

¹⁴Ne'e rakalinga mompake pompakule nggari ja'i Nosa Nagasa nu Alatala to niwaina ka komi bopia tempo nabi-nabi nompasimbayu tewai Alatala ka komi pade topanggeniaka topomparasaya nombadika pale ira ri balenggamu.

¹⁵Kawiamo bago etu pura-pura ante mpu'u-mpu'u, rara ala pantambai pompakulemu mantui bago etu manoto ka pura-pura tau.

¹⁶Jagaimo pokainggumu bo jagai wo'u pepatudukimu. Komi kana matutu manggawia pura-pura etu, sabana ante iwetu komi kana mompakasalama koromu mboto ante tau-tau to mangepe pepatudukimu etu wo'u.