Read Da'a Kaili 1 TIMOTIUS 5 Bible Online

1 TIMOTIUS 5 - Da'a Kaili bible

1 TIMOTIUS 5

¹Ne'e komi mangontiaka samba'a langgai to natu'ana, tapi popatoramo i'a nasimbayu ewa umamu mboto. Pade popatoramo langgai-langgai to namudana nasimbayu ewa sampesuwumu mboto.

²Pade popatoramo besi-besi to natu'ana nasimbayu ewa indomu mboto, pade popatoramo besi-besi to namudana ante pokainggumu to nagasa nasimbayu ewa tua'imu mboto.

³Tulungimo tobalu-tobalu besi to mpu'u-mpu'u natuwu njamba'ana.

⁴Tapi ane maria anana atau makumpuna, ira etumo to masipato mokolu meguru mompiara totu'ana mboto pade mombabalasi kabelo totu'a ira etu. Sabana etumo pokainggu to nabelo to nikonoa rara Alatala.

⁵Tobalu besi to mpu'u-mpu'u natuwu njamba'ana to da'a naria isema-sema mompiara ira aga natuwu nanjarumaka Alatala. Eo wengi ira da'a nenonto-nonto nosambaya merapi tulungi ka I'a.

⁶Tapi tobalu besi to natuwu nompegaya bo nompesana-sana ewa namatemo pomparasayana naupa korona danatuwu.

⁷Pasimbayumo tewai-tewaiku e'i ka topomparasaya ala ira matuwu ante pokainggu to da'a namala rasalaraka.

⁸Tapi ane maria tau to da'a nompiara sampesuwuna mboto, neliu-liupa ira saongu njapo, tau etu nombasapuaka pepatuduki to niparasayana. I'a neliu nggaja'a nggari tau da'a nomparasaya.

⁹Tobalu besi to masipato sangana rasuaraka riara sanga-sanga tobalu to ratulungi todea topomparasaya aga besi umuruna da'a nakura nggari onompulu mpae to sanggani lau niporongo.

¹⁰Pade i'a wo'u kana ninjani ntaumo ewa besi to nompowia to nabelona. Jonjona, i'a nompiara anana ante nabelo, nadamba rarana nantarima torata riara njapona, i'a nantulungi todea topomparasaya, i'a nantulungi tau-tau to nasusa, pade i'a nabati nompowia mpengele-ngele powia to nabelona.

¹¹Tapi ne'e rasuaraka sanga tobalu-tobalu besi to namudana riara sanga-sanga etu. Sabana ane nasu ira nompone sampe neliu nggaroso nggari towe ira ri ja'i Kristus, ira kana madota raporongo bali.

¹²Ane etu majadi ira mawela pesuku sabana ira manjapuaka pojanji ira ka i Pue bopia.

¹³Pade ira wo'u aga mompopobiasa masondo rara pade manjayo-njayo mompone sou ntau. Pade ira da'a aga mompopobiasa masondo rara, tapi ira wo'u manggeni tesa bo mombagalo urusa tau ntanina bo motesa mpengele-ngele to da'a masipato ratesa.

¹⁴Sabana etu to nipodotaku ala tobalu-tobalu besi to namudana raporongo bali, pade moana bo mompakasiayu awuna mboto ala ne'e mombawai loga ka balita mompakawau sangata.

¹⁵Sampe niuliku iwetu sabana naria mamimo tobalu besi to nasalanjalamo nantuki dota Magau nu Seta.

¹⁶Ane maria topomparasaya [2] to nosampesuwu ante tobalu besi, ira kana mompiara tobalu besi etu. Ne'e sampe mompakatomo todea topomparasaya. Ante iwetu todea topomparasaya mamala mantulungi tobalu-tobalu besi to mpu'u-mpu'u natuwu njamba'ana lau.

¹⁷Topanggeniaka-topanggeniaka to nanggeniaka todea topomparasaya ante nabelo masipato rawai ka pebila bo petulungi to neliu nggari biasa, neliu-liupa ira to nokarajaa ntomo nanggeni Tesa nu Alatala pade nompatuduki todea.

¹⁸Sabana riara Buku Nagasa naria tesa to nanguli iwe'i: “Ne'e mombamumu sumba japi tempo i'a mombalonggo-longgo pae ala maronto nggari bulina, tapi palogamo i'a manggoni sakedi.” [3] Pade naria tesa ntanina to nanguli, “Topokarajaa masipato mantarima gajina.” [4]

¹⁹Ne'e komi mangepe tesa ntau mompangadu samba'a topanggeniaka topomparasaya ane da'a ria romba'a atau tolumba'a sabi mantakono tesa etu.

²⁰Ane maria ira to nowia silaka ira kana raontiaka ri ngayo ntodea topomparasaya ala tau ntanina maeka mowia silaka.

²¹Timotius, ri ngayo Alatala bo Yesus Kristus pade malaeka-malaekana to nagasa, aku mantewai komi ante mpu'u-mpu'u raraku iwe'i: tukimo tewai-tewai e'i ante akala to nanoana. Kawiamo etu pura-pura ante da'a manggita lenje.

²²Ne'e masasinta gaga mombadika palemu ri koro ntau mangonggotaka ira majadi topanggeniaka topomparasaya. Ne'e sampe komi matipakeni mantuki silaka tau ntanina. Jagaimo koromu ala batena matuwu ante pokainggu to nagasa.

²³Ne'e mana aga manginu ue biasa, tapi inumo sakedi anggur ala mompakuli ta'imu bo ju'a-ju'amu ntanina.

²⁴Ne'e masasinta gaga mangonggotaka tau majadi topanggeniaka topomparasaya, sabana naria tau silakana nanoto nau da'apa nitangara, tapi silaka tau ntanina aga majadi manoto ane i'a ratangara.

²⁵Iwetu wo'u pokainggu to nabelo nanoto mami nikita ntau. Tapi naupa da'a kaliu-liu nanoto nikita, pokainggu to nabelo da'a namala matetabuniaka liu. Etu kana ranjani ntau.