Read Da'a Kaili 1 TIMOTIUS 6 Bible Online

1 TIMOTIUS 6 - Da'a Kaili bible

1 TIMOTIUS 6

¹Topomparasaya to najadi batua kana mombabila bo matundu ri ja'i madikana ala ne'e sampe sanga Alatala bo pepatuduki to nakonona rasalaraka ntau.

²Pade ane madika ira samba'a topomparasaya, ne'e ira mantua'i mata i'a sabana i'a nosaongu pomparasaya ante ira. Tapi ira kana mantambai maraji mokarajaa sabana madika to nitulungi ira wo'u topomparasaya to nipotowe ira. Komi kana mompatuduki bo mompopatora ka todea topomparasaya pura-pura pepatuduki etu.

³Ane maria tau mompatuduki pepatuduki ntanina pade i'a da'a nasituju ante pepatuduki to nakono nggari ja'i Pueta Yesus Kristus bo pepatuduki to nanggeni kita matuwu mantuki dota Alatala,

⁴i'a etu nasombo. Da'a ninjanina nuapa-nuapa. Ju'ana tau nompowia iwetu aga nangelo saba bo nosinggarau ka batua nu tesa. Asele powiana etu iwe'i: Tau nosipoju'a ka rara, ira nosipobali bo nosiuli sinja'i, ira tunggai nosibata,

⁵pade ira da'a nenonto nosinggarau. Nageromo pekiri ira pade mana ninjani ira pepatuduki to nakonona. Ira nompekiri mepue ka Alatala aga sangele jala mombarata kakalumana.

⁶Kakonona nauntu mpu'umo tau to mepue ka Alatala ane i'a matuwu masana ante nuapa-nuapa to naria ri ja'ina.

⁷Sabana tempo kita niote da'a ria nuapa-nuapa nikenita riara dunia e'i, pade ane kita mamate da'a ria nuapa-nuapa mamala rakenita nggari dunia e'i.

⁸Jadi ane mariamo panggoni bo pakeata, naganamo.

⁹Tapi tau-tau to madota majadi makalumana kana mawela pesoba. Ira rasoko mpengele-ngele dota rara to naja'a bo nadoyo to mombagero katuwu ira. Dota rara etu mompakanawu ira pade manggeni ira rapandasa sampe ri kasae-saena,

¹⁰sabana pu'u nu pura-pura kaja'ana etumo nompotowe doi. Naria bara sakuya mba'a tau aga nombaraga doi sampe nompalasi pomparasaya ira ka i Pue Yesus pade nompandasa koro ira mboto ante mpengaya-ngaya kasusana.

¹¹Tapi komi, batua nu Alatala, pakakawaomo nggari pokainggu iwetu. Pasimbukumo mowia to nanoana pade matuwu nantuki dota Alatala. Komi kana mantambai momparasaya, potowemo sanggamanusiamu, pakaroo raramu momparasaya tempo nipandasa pade moinggu malusu.

¹²Pasimbukumo mantuki posilumba riara pomparasaya ante mabelo. Pasimbukumo mombarata katuwua mabelo sampe ri kasae-saena, sabana etumo patuju Alatala nompokio komi tempo komi nompangaku i Pue Yesus ri ngayo ntodea bopia.

¹³Ri ngayo Alatala, pu'u katuwu pura-pura anu natuwu, bo Yesus Kristus to nompangaku tesa to nakonona ri ngayo Pontius Pilatus, aku mantewai komi iwe'i:

¹⁴Tukimo parenta-parentaku e'i ante pokainggu to nagasa to da'a namala rasalaraka ntau sampe Pueta Yesus Kristus marata bali ri dunia e'i.

¹⁵I'a kana marata ri tempo to nipakatantu Alatala. I'amo to neliu nggabelo katuwuna. Aga I'amo topoparenta langi bo dunia. I'amo Magau nu pura-pura magau, I'amo Pue nu pura-pura pue.

¹⁶Aga I'a njamba'ana lau to da'a namate. I'a natuwu riara reme to da'a namala rapakamosu. Da'a ria kamba samba'a tau to nanggita I'a, pade da'a wo'u naria to nompakule manggita I'a. Perapi I'a rabila bo makuasa sampe ri kasae-saena. Amin!

¹⁷Tewaimo ka tau-tau nakalumana ri dunia e'i ala ne'e majadi masombo bo ne'e aga manjarumaka kakalumana ira to da'a naroo. Tapi ira kana manjarumaka Alatala to nompakagana ka kita mpengele-ngele ante najoi rarana ala etu rapodamba-dambata.

¹⁸Tewaimo ka ira ala moinggu mabelo bo masugi ante pokainggu to nabelona. Ira kana majoi rara bo masadia mombabagi ka tau ntanina nuapa-nuapa to naria ri ja'i ira.

¹⁹Ante iwetu ira mompasiromu kakalumana to majadi panjarumaka ira to nabelona ri tempo marata ala ira mpu'u-mpu'u mombarata katuwua mabelo sampe ri kasae-saena.

²⁰Timotius, jagaimo mpakabelo-belo nuapa to niparasaya ka komi. Pakakawaomo nggari tesa-tesa njilaka to da'a ria gunana. Pade pakakawaomo nggari posisono-sono to nopu'u nggari tesa to niuli ntau pangginjani to nakono tapi kakonona aga tesa dawa.

²¹Naria mamimo tau to nanguli naria pangginjani etu ri ja'i ira sampe nasalanjalamo nggari pomparasaya to nakonona. Perapi Pue mombagane komi. Tabe nggari ja'iku, Paulus