Read Da'a Kaili 2 TIMOTIUS 1 Bible Online

2 TIMOTIUS 1 - Da'a Kaili bible

2 TIMOTIUS 1

¹Sura e'i nggari ja'iku i Paulus, ka i Timotius, anaku to nipotoweku. Aku nisuro Yesus Kristus nantuki dota Alatala ala mompatolele pojanji Alatala to nanguli isema-sema nomparasaya Yesus Kristus kana matuwu mabelo sampe ri kasae-saena. Perapi Pue Alatala bo Pueta Yesus Kristus mombagane komi bo maasi mata ri ja'i komi bo mombawai katuwua mabelo ka komi.

³Aku nosukuru ri ja'i Pue Alatala to nipesombaku ante rara nta'i to nagasa, nasimbayu ewa totu'aku nggaolu. Eo wengi aku nantora komi riara posambayaku.

⁴Tempo aku nantora kasusa rara komi tempo kita noga'a bopia, nalentora mpu'u raraku manggita komi ala aku mpu'u-mpu'u madamba.

⁵Aku nosukuru ri ja'i Alatala sabana natitora raraku iwenu komi mpu'u-mpu'u nomparasaya i Pue Yesus nasimbayu ewa i Lois, puemu besi bo indomu Eunike. Pade niparasayaku komi batena nomparasaya nasimbayu ewa ira.

⁶Sabana etu aku nompopatora ka komi, kana ratambai rapopoguna pompakule to niwai Alatala ka komi tempo aku nombadika paleku ri koromu bopia. Ne'e maeka mompopoguna pompakule etu,

⁷sabana Nosa Nagasa to nipopana'u Alatala ka kita da'a manggeni kita maeka, tapi I'a nombawai baraka bo towe bo kuasa manta'amaka korota mboto.

⁸Sabana etu ne'e maeya matamu mompatolele tesa i Pueta, pade ne'e wo'u maeya matamu mompekiri aku to nitarunggu sabana aku topomparasaya I'a. Tapi ante kuasa nggari ja'i Alatala mboto komi wo'u kana mantingayo kasusa nasimbayu ewa aku sabana mompatolele Kareba Belo.

⁹Alatala nompakasalama kita bo nompokio kita matuwu magasa da'a sabana powiata to nabelona, tapi etu najadi nggari dota rarana mboto bo towe belona ka kita. Ri lamba pamulana da'apa dunia nipajadi, nipakatantunamo mompopokita towe belona etu ka kita to mosaongu rara ante Yesus Kristus.

¹⁰Pade we'i-we'i towe belona etu nipopokitanamo ante karata Yesus Kristus, Magau to Mompakasalama kita. Pue Yesus nompakaropu kuasa kamatea, pade I'a nompatolele Kareba Belo ka kita to nompakanoto iwenu manusia mamala matuwu mabelo sampe ri kasae-saena.

¹¹Aku mboto nionggotaka Alatala majadi surona nompatolele bo nompatuduki Kareba Belo etu.

¹²Etumo sabana aku nombarasai pura-pura kasusa ewa e'i. Tapi naupa iwetu da'a naeya mataku, sabana ninjanikumo isema to niparasayaku, pade natantumo ka aku I'a nompakule mombajagai nuapa to niparasayana ka aku sampe ri kaopu nu dunia.

¹³Pasialamo jonjoku mompatuduki pepatuduki to nakonona to niepemu nggari ja'iku, pade kawiamo etu ante towe bo pomparasaya to naria ri ja'ita sabana kita mosaongu rara ante Yesus Kristus.

¹⁴Pade ante petulungi Nosa Nagasa nu Alatala to naria riara nta'ita, jagaimo pepatuduki to nakonona to niparasaya ka komi ala etu ne'e rabali ntau.

¹⁵Ninjanimu pura-pura topomparasaya nggari Propinsi Asia nompalasi aku. Romba'a nggari tatongo ira etumo i Figelus bo i Hermogenes.

¹⁶Tapi perapi Pue Alatala maasi mata ri ja'i ira Onesiforus sanjapo, sabana nadea ngganimo i'a narata nompakadamba raraku. Da'a naeya matana nanggita aku riara tarunggu.

¹⁷Iwetu i'a narata ri ngata Roma i'a nangelo-ngelo aku sampe niratana.

¹⁸Ninjanimu mboto ri ngata Efesus bopia nadea mpu'u petulungina ka aku. Perapi Pue maasi matana manggita Onesiforus tempo kaopu nu dunia.