Read Da'a Kaili 2 TIMOTIUS 2 Bible Online

2 TIMOTIUS 2 - Da'a Kaili bible

2 TIMOTIUS 2

¹Jadi Timotius, anaku, komi kana maroso ante petulungi to niwai Yesus Kristus ka kita.

²Pade pepatuduki to niepemu nggari ja'iku ri ngayo ntau dea kana muparasaya ka tau-tau to namala raparasaya bo to nompakule mompatuduki tau ntanina.

³Ewa tantara Yesus Kristus to nabelona komi wo'u kana mantingayo kasusana.

⁴Toramo! Samba'a tantara to nompajala bagona da'a nateka'i ante urusa-urusa ntanina ala i'a mamala mompakadamba rara balenggana.

⁵Komi kana masimbayu ewa samba'a topomore. I'a da'a mamala mombarata hadia padagi ane i'a da'a mantuki atura-atura to nipakatantu.

⁶Komi kana masimbayu wo'u ewa topotinalu to nokarajaa ntomo. I'amo tau pamulana to masipato mantarima asele ntinalu etu.

⁷Pekirimo mpakabelo-belo tesaku e'i pade i Pue kana mantulungi komi mangginjani etu pura-pura ante manoto.

⁸Toramo! Yesus Kristus najadi Muli Magau Daud, pade I'a namate natuwu bali ewa to nitesa riara Kareba Belo to nipatoleleku.

⁹Aku e'i nipandasa sabana nompatolele Kareba Belo etu. Aku niso'o ante rante nasimbayu ewa tau naja'a. Tapi Tesa nu Alatala da'a namala rarante, etu kana matolele ri umba-umba.

¹⁰Etumo sabana aku naroo riara mpengele-ngele kasusana ala tau-tau to nipelisi Alatala mamala rapakasalama ante momparasaya Yesus Kristus sampe ira mombarata bagia nggari kuasa bo reme i Pue sampe ri kasae-saena.

¹¹Nakono mpu'u tesa to nanguli iwe'i: “Ane kita mamate mpasanggani-nggani ante I'a, kita wo'u matuwu mpasanggani-nggani ante I'a.

¹²Ane kita maroo momparasaya, kita kana moparenta mpasanggani-nggani ante I'a. Ane kita mombasapu I'a, I'a wo'u mombasapu kita.

¹³Ane kita da'a mamala raparasaya, I'a batena namala raparasaya, sabana I'a da'a namala manjapuaka korona mboto.”

¹⁴Popatoramo ka topomparasaya pura-pura tesaku etu. Pade tewaimo ka ira riara sanga Alatala ala ne'e ira mosinggarau ka batuana tesa-tesa. Etu da'a ria gunana pade aga nompakagado rara ntau to nangepe etu.

¹⁵Pasimbukumo majadi tau to nikonoa rara nu Alatala ewa samba'a topokarajaa to da'a paraluu maeya matana mantora asele mpokarajaana. Patudukimo Tesa nu Alatala to nakono ante manoa.

¹⁶Pakakawaomo nggari tesa-tesa njilaka to da'a ria gunana, sabana tesa-tesa ewa etu aga nanggeni tau mantambai nasilaka.

¹⁷Tesa-tesa etu nendai nasimbayu ewa ju'a bete to naja'ana. Romba'a tau to noinggu iwetu etumo i Himeneus bo i Filetus.

¹⁸Ira nompalasi pepatuduki to nakonona ante nanguli naopumo Alatala nompakatuwu bali pura-pura tau to namatena. Pepatuduki ira etu nompakagado pomparasaya bara sakuya mba'a tau.

¹⁹Tapi naupa iwetu, pepatuduki Alatala to nakonona batena naroso nasimbayu ewa pondasi to da'a namala ragoya nuapa-nuapa. Riara pepatuduki etu naria nitulisi iwe'i: “Pue nangginjani isema-sema to najadi todeana.” Pade naria tesa ntanina ri setu to nanguli, “Isema-sema to nanguli i'a topomparasaya i Pue Yesus, i'a kana manggabasaka pokaingguna to naja'ana.”

²⁰Riara njapo to nabetena naria mpengele-ngele parewa ri awu. Naria to nipowia nggari bulawa bo salaka, tapi naria wo'u to nipowia nggari kayu bo tana lei. Parewa bulawa bo salaka etu nipake mantande torata to nibila, tapi parewa ntanina etu nipake eo-eo.

²¹Jadi ane tau manggabasaka pura-pura pokainggu to naja'ana, i'a masipato rapake i Pue, nasimbayu ewa parewa bulawa bo salaka to neliu nggabelona etu. I'a nipegasa nggari silakana ala moguna ka Puena. I'a nasadia rapake mompowia mpengele-ngele bago to nabelona.

²²Jadi pakakawaomo nggari pokainggu naja'a to nipodamba ngana-ngana muda. Tapi pasimbukumo matuwu ante manoa rara. Parasayamo pepatuduki to nakonona ante natutu rara; potowemo Alatala bo sanggamanusiamu, pade pasimbukumo mosinggabelo ante pura-pura tau to nekakai ka i Pue ante rara to nagasa.

²³Pakakawaomo nggari ja'i ntau to nadoyo to nekutana anu da'a ria gunana. Ninjanimu mboto etu aga majadi posinggarau.

²⁴Tapi samba'a batua i Pue da'a masipato mosinggarau. I'a kana malusu rara ri ja'i ntau pura-pura. I'a kana mompakule mompatuduki ante mabelo, pade i'a wo'u kana mosabara.

²⁵Ante maede rara i'a kana mompatuduki tau-tau to nangewa i'a, ala ane mamala ira rakeni Alatala majea nggari pokainggu ira to nasala pade mangginjani pepatuduki to nakonona.

²⁶Ante iwetu ira majadi manoto bali pade ira makabasaka nggari kuasa Magau nu Seta to nombabagiu bo nompasu'u ira mantuki dotana.